Ko Te Polokalama Foʼou ʼo Tatatou Fakatahi Makehe ʼAho Tahi

Neʼe kamata fai te ʼu fakatahi makehe ʼaho tahi ʼi te taʼu 1987. Ko te ʼu fakatahi ʼaho tahi ʼaia neʼe ko he meʼa fakaloto mālohi ki te ʼu kaugana ʼa Sehova pea mo te hahaʼi foʼou ʼaē ʼe fia logo ki te moʼoni. ʼO kamata atu ʼi Sepetepeli 1998, ʼe fakahā anai te polokalama foʼou ʼo te fakatahi ʼaho tahi. Ko te ʼu akonaki e hiva pea mo te ʼu fakafehuʼi ʼaē ka fai anai, ʼe fua lelei anai kia koutou ʼi te faʼahi fakalaumālie.

Ko te kupu tāfito ʼaenī ʼo te polokalama foʼou, “Koutou Fakahā Takotou Loto Fakafetaʼi Ki Te Laupapa ʼa Sehova.” (Isaia 65:14; 1 Ko. 10:21) ʼE ina fakamālohiʼi anai tatatou holi ʼaē ke tou fakamuʼamuʼa te tauhi ʼaē kia Sehova ʼi totatou maʼuli. (Pes. 27:4) Ko te akonaki ʼo te tagata taupau faka silikosikilipisio ʼe talanoa anai ki tatatou kau ki te ʼu fono ʼo fakatafito ki te kupu ʼaenī, “Tou Sivisivi Te ʼu Holi ʼo Totatou Loto.” Ko te tagata ʼāfea ʼaē ka ina ʼaʼahi te fakatahi, ʼe ina fakahā mai anai kia tatou te meʼa ʼaē ʼe feala ke tou fai ke “Tou Taupau Totatou Maʼuli Fakalaumālie ʼo Tou Kai Ki Te Laupapa ʼa Sehova.” ʼE toe fai anai mo he ʼu tokoni ki te kau tūpulaga ʼo te kautahi ʼa Sehova, ke nātou haga tauhi agatonu aipe ki te ʼAtua. Ko te akonaki tāfito ʼo te tagata ʼāfea ʼaē ka ina ʼaʼahi te fakatahi ʼaē ko tona kupu tāfito ʼaenī, “ ʼE Fakamālohiʼi Tatou ʼi Te Faʼahi Fakalaumālie Ke Tou Lototoʼa ʼi Te Fai Faka Mafola,” ʼe ina fakahā mai anai peʼe ʼaoga feafeaʼi kia tatou te ʼu fakatuʼutuʼu ʼaē ʼe fai ʼi te kokelekasio ke tou lototoʼa ʼi te fai faka mafola. ʼE koutou fia logo koa ki te ʼu akonaki fuli ʼaia?

Ko nātou fuli ʼaē kua nātou foaki tonatou maʼuli ki te ʼAtua pea mo nātou fia papitema, ʼe tonu ke nātou foimo fakahā te faʼahi ʼaia ki te tagata taupau pelesita. ʼE ko te taʼu 12 ʼaenī ʼaē ʼe tou fakatuʼutuʼu ai he fakatahi makehe ʼaho tahi, pea ʼe tou falala ko nātou fuli ʼaē ka nātou kau anai kiai, ʼe fakamālohiʼi anai nātou ʼi te faʼahi fakalaumālie ke nātou fakahoko te gāue ʼaē ka hoko mai.