Te Polokalama Foʼou ʼo Te Fakatahi Makehe ʼAho Tahi

ʼE fēnei te kupu tāfito ʼo te fakatahi makehe ʼaho tahi ʼaia: “Koutou liliu ko he ʼu hahaʼi lalahi ʼi te fealagia ki te mahino,” pea ʼe kamata ʼi Sepetepeli 2000. (1 Ko. 14⁠:20) He koʼe ʼe maʼuhiga anai ke tou kau kiai? ʼE tou maʼuʼuli ʼi te mālama kua lahi ai te agakovi. Moʼo tekeʼi te faʼahi ʼaia, ʼe tonu ke tou gāueʼi te ʼu fealagia ki te mahino fakalaumālie, ke lava ai hatatou tauʼi te kovi ʼaki te meʼa ʼaē ʼe lelei. Ko te fakatahi makehe ʼaho tahi ʼaia ʼe tokoni anai kia tatou ʼo ʼuhiga mo te faʼahi ʼaia.

ʼE kamata anai te fakatahi ʼaia, ʼaki te akonaki ʼaenī ʼa te tagata taupau faka silikosikilipisio: “Ko He ʼu Tokoni Ke Koutou Liliu Ko He ʼu Hahaʼi Lalahi ʼi Te Mahino Ki Te Tohi-Tapu.” ʼE ina fakahā mai anai peʼe feafeaʼi hatatou nonofo mālohi ʼi te tui faka Kilisitiano. ʼE fakahā lelei anai e te tēhina pe koʼe ʼe maʼuhiga ke fakaʼaogaʼi moʼoni, pea mo maʼuliʼi te ʼu pelesepeto faka Tohi-Tapu, moʼo fakatuputupu te fealagia fakakaukau, heʼe ʼi tana akonaki ʼe fēnei tona kupu tāfito: “Koutou Taupau Tokotou Maʼuli Fakalaumālie ʼo Koutou Fakatuputupu Takotou ʼu Fealagia Fakakaukau.”

ʼO toe feiā mo te kau tūpulaga, ʼe tonu ke nātou maʼu te fealagia ki te mahino. ʼE talanoa anai kiai te ʼu akonaki ʼaenī: “He Koʼe ʼe Tonu Ke Tou Hage Ko He ʼu Kiʼi Tamaliki ʼi Te ʼu Meʼa ʼAē ʼe Kovi” pea “Te Kau Tūpulaga ʼAē Kua Nātou Maʼu Te Lotomahino ʼi Te Temi Nei.” ʼE koutou logo anai ki he kau tūpulaga ʼe nātou fakamatala te ʼu meʼa ʼaē ʼe nātou fai moʼo fakaloto mālohiʼi nātou ʼi te faʼahi fakalaumālie, ke feala hanatou tekeʼi tanatou fia ʼiloʼi te ʼu meʼa kovi ʼo te malamanei pea mo tekeʼi te ʼu fihifihia.

ʼE lava feafeaʼi hatatou maʼu he fiafia lahi age ʼi te maʼuli? ʼE fakamahino anai e te tēhina te faʼahi ʼaia ʼi tana akonaki fakaʼosi, ʼaē ko tona kupu tāfito ʼaenī: “Koutou Maʼu Katoa Te ʼu Fua Lelei ʼo Te Maʼuliʼi ʼo Te ʼu Pelesepeto Faka Tohi-Tapu ʼAki Tokotou ʼAtamai.” ʼE ina tuku mai anai te ʼu faʼifaʼitaki ke tou mahino, ko te maʼuliʼi ʼo te Folafola ʼo te ʼAtua ʼe tokoni mai anai ke tou tauʼi te ʼu fihifihia, mo fai he ʼu tonu, pea ʼe ʼaoga moʼoni anai kia tatou te ʼu meʼa ʼaē ʼe akoʼi mai e Sehova.

Ko nātou ʼaē ʼe nātou fia papitema ʼi te fakatahi moʼo fakahā kua nātou foaki tonatou maʼuli ki te ʼAtua, ʼe tonu anai ke nātou fakahā fakavilivili te faʼahi ʼaia ki te tagata taupau pelesita. Koutou foimo tohi ʼi takotou kaletalio mokā tala atu anai te ʼaho ʼo te fakatahi makehe ʼaho tahi ʼaia, pea mo fai hakotou ʼu fakatuʼutuʼu ke koutou kau ki te polokalama maʼuhiga ʼaia. Koutou kau ki te ʼu koga fuli ʼo te fakatahi makehe ʼaho tahi ʼaia! ʼE ina fakaloto mālohiʼi anai koutou ke koutou kātakiʼi te tuʼu agakovi ʼaenī pea mo nofo agatonu kia Sehova.