Te Polokalama Foʼou ʼo Te Fakatahi Makehe ʼAho Tahi
Ko te kupu tāfito ʼo te polokalama ʼo te fakatahi makehe ʼaho tahi ki te taʼu gāue foʼou, ʼe fakatafito ki te vaega faka Tohi-Tapu: “Koutou Fakalogo Ki Te Atua—Koutou Fakafehagai Ki Te Temonio.” (Skp. 4:7) ʼE ko he tokoni lelei ʼaia ʼi te ʼu temi faigataʼa ʼaenī! Kapau ʼe tou fakalogo ki te ʼu fakatotonu ʼa te ʼAtua, pea ʼe tou fakafeagai ai kia Satana. ʼE akoʼi mai anai e te polokalama peʼe feafeaʼi hatatou fakafeagai mālohi ki te ʼu fakatuʼutuʼu kovi ʼa te Tevolo moʼo maumauʼi ʼo tatatou tui. Koteā ʼihi koloā fakalaumālie ʼe tou maʼu anai ʼi te fakatahi ʼaia?
ʼE fakahā anai e te tēhina taupau faka silikosikilipisio, peʼe feafeaʼi te “Fakahā ʼo Tatatou Fakalogo Ki Te ʼAtua ʼi Te Maʼuli Faka Famili,” ke fakaloto mālohiʼi ai te ʼu famili ke nātou fakafeagai ki te ʼu fakaneke ʼa te mālama. Ko te ʼuluaki akonaki ʼaē ka fai e te tēhina, ʼaē ko tona kupu tāfito “Te Faka ʼUhiga ʼo Te Fakafeagai Ki Te Tevolo,” ʼe ina fakamahino anai pe koʼe pea mo feafeaʼi hatatou fakafeagai mālohi ki te fakatuʼutuʼu ʼaē ʼa Satana ke ina fakavaivaiʼi tatou ʼi te faʼahi fakalaumālie. Ko koga e lua ʼe faka ʼuhiga tāfito ki te kau tūpulaga, ʼaē ʼe tonu mo nātou ke nātou tokakaga ki te ʼu fakatuʼutuʼu ʼa te Tevolo. Tokolahi te kau Kilisitiano kua nātou lalahi ʼi te temi nei, neʼe mole nātou fia mulimuli ki te ʼu holi ʼo te mālama ʼi tonatou temi tūpulaga. ʼE tou fiafia anai ʼi te fakalogo ki he ʼu meʼa neʼe hoko kia nātou.
ʼE fakamaʼua ki te hahaʼi fuli ke nātou fakalogo ki te ʼu puleʼaga. Koia, ʼe fakaʼosi anai e te tēhina tana akonaki ʼo ina fakahā lelei te ʼu potu e fā ʼaē ʼe tonu ke tou fakahā ai tatatou fakalogo fakaʼatua: (1) ki te ʼu puleʼaga, (2) ʼi te kokelekasio, (3) ʼi te gāue, pea (4) ʼi te famili. ʼE ʼaoga lahi anai kia tatou te polokalama!
Ko nātou ʼaē ʼe nātou fia papitema ʼi te fakatahi makehe ʼaho tahi ʼaia, ʼe tonu anai ke nātou fakahā fakavilivili te faʼahi ʼaia ki te tagata taupau pelesita. Ko tatou fuli ʼe tonu ke tou tohi ʼi tatatou kaletalio, pea mo tou fakatuʼutuʼu ke tou kau ki te polokalama katoa ʼo te fakatahi ʼaia. ʼE tou maʼu anai he ʼu tapuakina heʼegata, pea ʼe tou fakalogo anai kia Sehova ʼo talu ai.