Ko He Polokalama Foʼou ʼo Te Fakatahi Faka Silikosikilipisio

“Koutou Taupau Te ʼu Fakatotonu ʼa Te ʼAtua Pea Mo Koutou Maʼuʼuli,” ʼe ko te kupu tāfito ʼaia ʼo te polokalama ʼo te fakatahi faka silikosikilipisio ʼaho lua ʼaē ka kamata ʼi Sepetepeli. (Taag. 4:4) ʼE fakahā tāfito ai anai pe koʼe ʼe mole faka mafasia te fakalogo ki te ʼu fakatotonu ʼa te ʼAtua. Pea tahi ʼaē meʼa, ʼe ina fakahā mai anai peʼe lava feafeaʼi hatatou maʼu he fīmālie pea mo he fiafia ʼi te fai ʼo te finegalo ʼo te ʼAtua, pea mo he ʼamanaki ki te ka haʼu.​—Mateo 11:28-30; Soane 13:17.

Ko nātou ʼaē ʼe nātou fia papitema ʼi te fakatahi, moʼo mulimuli ki te fakatotonu ʼa Kilisito, ʼe tonu ke nātou fakahā ki te taupau pelesita, pea ʼe ina fai anai te ʼu fakatuʼutuʼu ʼaē ʼe ʼaoga.​—Mateo 28:19, 20.

ʼE fakamahino anai e te ʼu akonaki te ʼu meʼa ʼaē ʼe feala ke tou fai moʼo fakahā totatou ʼofa ki te ʼAtua pea mo tatatou ʼu tēhina. (Soane 13:34, 35; 1 Soane 5:3) ʼE kau anai ki te polokalama he ʼu tokoni fakaloto mālohi ʼe toʼo mai ia Pesalemo 19 pea mo te kapite 119. Logope la neʼe tohi te ʼu tokoni fakaʼatua ʼo te ʼu Pesalemo kua hili kiai te ʼu taʼu ʼe lauʼi afe, kae ʼe tou vakaʼi anai tonatou ʼaoga kia tatou takitokotahi ʼi te temi ʼaenī.

ʼE fai anai e te tagata taupau faka silikosikilipisio te akonaki ki te kaugamālie ʼaē ko tona kupu tāfito ʼaenī “Koutou Manavasiʼi Ki Te ʼAtua Pea Mo Taupau Tana ʼu Fakatotonu.” (Tnk. 12:13) Ko te akonaki fakaʼosi ʼo te tagata taupau faka silikosikilipisio ʼe ina fakahā mai anai peʼe lava feafeaʼi ki te kau tūpulaga ke nātou fakaʼaogaʼi lelei tonatou maʼuli pea he koʼe ʼe feala ke nātou falala ki he ka haʼu heʼegata. ʼE fakaʼosi anai e te tagata taupau faka silikosikilipisio te polokalama ʼo ina fakahā te ʼu fua lelei ʼaē ʼe tou maʼu mai “te lao faka hau” ʼo te ʼofa. (Sake 2:8) Koia, ʼe ko he fakatahi ʼe tou fia kau fuli anai kiai!