Ko Te Polokalama Foʼou ʼo Te Fakatahi Faka Silikosikilipisio
1 Ko tatatou ʼu fakatahi faka silikosikilipisio ʼaē ko tona kupu tāfito “Koutou Fagono pea Koutou Ako Ke Koutou Mulimuli Ki Te Folafola ʼa Te ʼAtua” ʼe kamata anai ʼi Sepetepeli. Ko te kupu ʼaia, ʼe fakatafito kia Teutalonome 31:12, 13, ʼe ina foaki te tafitoʼaga lelei ʼo te polokalama katoa ʼe ina faka maʼuhigaʼi te ʼu ako ʼe ʼaoga ke tou akoʼi pea mo tou maʼuliʼi.
2 Logope la ʼe tokolahi te hahaʼi ia ʼaho nei ʼe fakalogo ki te ʼu palalau ʼe hala, ʼe maʼuhiga kia tatou takitokotahi ke tou fagono ki te Folafola ʼa te ʼAtua pea mo tou ako ke tou maʼuliʼi. (Luka 11:28; 1 Tim. 4:1) ʼO ʼuhiga mo te faʼahi ʼaia, neʼe fakatuʼutuʼu te polokalama ʼo te fakatahi faka silikosikilipisio moʼo fakaloto mālohiʼi pea mo tokoni ki te kau fai faka mafola, te ʼu famili, te ʼu tagata ʼāfea, pea mo te kau pionie. ʼI te Moeaki, ʼe fai anai te akonaki ko tona ʼu koga e fā, ko tona kupu tāfito “Tou Tauʼi ʼOtatou ʼu Fihifihia—ʼAki Tatatou Tokaga Ki Te Folafola ʼa Te ʼAtua.” Pea ʼi te ʼAhotapu uhu, ʼe fai anai he akonaki ko tona kupu tāfito “E feafeaʼi Te Akonakiʼi e Te Tohi-Tapu ʼAki Te Faitotonu.” Ko te polokalama katoa ʼe ina foaki anai he fakaloto mālohi ʼi te faʼahi fakalaumālie koia ʼe tonu ke koutou kau kiai pea mo tokotou famili.
3 ʼI te Moeaki pea mo te ʼAhotapu, ʼe foaki anai te ʼu tokoni ʼe ʼaoga ki te fai faka mafola ʼo fai anai mo he ʼu faʼifaʼitaki. ʼE fai anai mo te ʼu fakamatala fakaloto mālohi pea mo ʼaoga pea mo te ʼu fakafehuʼi ʼo ʼihi. Koia, ko takotou kau ki te fakatahi pea mo takotou fakalogo fakalelei ʼaki te fakatuʼutuʼu ʼaē ke koutou maʼuliʼi te ʼu meʼa ʼe koutou ako, ʼe feala ai ke koutou maʼuliʼi katoa te ʼu fakatotonu ʼa te Folafola ʼa te ʼAtua.
4 Ko he meʼa maʼuhiga ʼo te fakatahi faka silikosikilipisio ko te temi anai ʼaē ʼe papitema ai te ʼu tēhina pea mo te ʼu tuagaʼane foʼou. ʼI muʼa ʼo tanatou fakamoʼoni ia muʼa ʼo te hahaʼi ʼo tanatou foaki tonatou maʼuli ki te ʼAtua, ʼe tonu anai ke nātou fakahā ki te taupau pelesita tanatou loto ʼaē ke nātou papitema, ke feala ke fai he fakatuʼutuʼu ke faka felogoi te ʼu tagata ʼāfea mo nātou ʼaia.
5 Ko te akonaki ki te hahaʼi fuli ʼo te ʼu fakatahi faka silikosikilipisio ko tona kupu tāfito “He Koʼe e Takitaki Tatou e Te Tohi-Tapu?” Tou fakaafe te hahaʼi ʼaē ʼe fia logo ke nātou ʼōmai ʼo fakalogo ki te akonaki ʼaia. Ia muʼa ʼo hakotou maʼu anai te toe fakaloto mālohi pea mo te tokoni ʼaē ʼe ʼaoga kia koutou pea mo tokotou famili, koutou fai he ʼu fakatuʼutuʼu lelei ke koutou kau ki te polokalama katoa.