Polokalama ʼo Te Fakatahi Faka Kolo
1 ʼO fakalogo ki te ʼu palalau ʼa Sesu ia Mateo 6:33, ko te ʼu kilisitiano moʼoni neʼe nātou tuku tuʼumaʼu ki muʼa te Puleʼaga ʼi tonatou maʼuli. Koia, “koutou haga kumi muʼa te Puleʼaga” ʼe ko te kupu tafito ʼaia ʼo te polokalama ʼo te fakatahi faka kolo ʼaē ʼe kamata anai ʼi sepetepeli 1993.
2 ʼI te kamataʼaga ʼo te polokalama ʼe fakahāhā anai te ʼu puani tafito ʼo ʼuhiga mo te moʼoni ʼo te Puleʼaga, te faʼahiga gāue ʼa te puleʼaga ʼi tona telituale, tana kau takitaki, tana hahaʼi fakalogo, pea mo tana ʼu lao. Koia, ʼe lahi te ʼu lao ʼa te ʼu puleʼaga faka tagata ʼe maʼu e te sosiete ia ʼaho nei neʼe fakatafito ki te ʼu lao ʼo Tohi-Tapu.
3 Ko te taupau pea mo te ʼu tapuakina ʼe tou maʼu, ko te fua ʼaia ʼo tatatou tuku ki muʼa ia te Puleʼaga ʼi te ʼu faʼahi fuli ʼo totatou maʼuli. ʼE foaki mai anai te ʼu tokoni ʼo fakahā peʼe feafeaʼi hatatou fakamamaʼo mai te ʼu tuʼania mole hona ʼuhiga. Ko te ʼu akonaki, te ʼu faʼifaʼitaki, pea mo te ʼu fai palalau ʼe fakahāhā mai anai pe koʼe ʼe maʼuhiga ke tou maʼu he sio ʼe lelei.
4 ʼI te fakatahi ʼi te moeaki, ko nātou ʼaē ʼe papitema ʼe nātou fakahā anai ia muʼa ʼo te hahaʼi tanatou foaki ia nātou kia Sehova. Pea ʼi te ʼaho tapu, ʼe tou fia kau fuli anai ki te akonaki ki te hahaʼi, ko tona kupu, “Koteā anai te meʼa ka fai e te Puleʼaga ʼo te ʼAtua maʼa te malamanei.”
5 ʼE tou faiga anai ke tou kau ki te ʼu ʼaho ʼaia e lua ʼo te fakatahi fakakolo. Ko te polokalama ʼo te fakatahi ʼo kau ai mo te fakatahi fakafiafia mo te ʼu tēhina ʼe foaki mai anai he ʼu manatu fakapotopoto pea mo fakaloto mālohi ʼo mole feala ai ke tou hāla ʼi te fakatahi ʼaia.