Te Polokalama ʼo Te Fakatahi Fakakolo Ka Haʼu
1 Ko te kupu tāfito ʼaē ka talanoa anai kiai ʼi te polokalama ʼo te fakatahi fakakolo ʼaē ʼe kamata anai ʼi Sepetepeli ke “Koutou nonofo ʼalaʼala, koutou tāʼofi maʼu ʼi te tui, koutou liliu ʼo mālolohi.” Ko te manatu ʼaia ʼe fakatafito ki te ʼu palalau fakaloto mālohi ʼa te ʼapositolo ko Paulo ki te kau Kilisitiano ʼo te ʼuluaki sēkulō ʼe tuʼu ia 1 Kolonito 16:13.
2 ʼE kamata anai te polokalama ʼaki te fakamahino ʼo te ʼu meʼa ʼaē ʼe ʼaoga tuʼumaʼu kia tatou ʼi te faʼahi fakalaumālie ke feala ai hatatou sivi ia tatou totonu. Moʼo tou maʼuliʼi fakalelei te meʼa ʼaē ʼe totonu ʼi te “ ʼu ʼaho fakaʼosi” ʼe ʼaoga ke tou maʼu he manatu ʼe totonu ʼo ʼuhiga mo tatatou felogoi mo Sehova pea mo totatou tuʼulaga ʼi tona kautahi fakakelekele. (2 Tim. 3:1) ʼE fakamanatuʼi mai anai kia tatou te mahino ʼa te ʼAtua ki tatatou gāue kinakina. ʼE ʼaoga ke akoʼi tatou ke feala ai he fakatuputupu ʼo totatou ʼu kalitate faka Kilisitiano pea mo tou taupau he aga ʼe lelei.
3 ʼE toe faka maʼuhigaʼi anai te ʼaoga ʼaē ʼo te gāue mālohi ʼi te fai ʼo ni ʼu tisipulo pea mo te faiga ʼaē ke tou haʼele ki muʼa ʼi te faʼahi fakalaumālie pea mo te fakaʼamu ʼaē ki he ʼu pilivilesio. ʼE fakahā ai te ʼu manatu ʼe ʼaoga ʼo ʼuhiga mo te fealagia ʼo tatou takitokotahi peʼe faka famili ke tou taupau tuʼumaʼu he polokalama ʼo ʼuhiga mo te meʼa kai fakalaumālie ʼaki he ʼu akonaki kehekehe, he ʼu faʼifaʼitaki, pea mo he ʼu fai palalau.
4 ʼI te moeaki ko nātou ʼaē ka papitema ʼe nātou fakahā anai ki te hahaʼi tanatou foaki ia nātou ʼaki tanatou papitema ʼaē ʼi te vai. ʼOsi ʼaia, ʼi te ʼahotapu ʼe tou loto fuli anai ke tou mulimuli ki te akonaki ki te hahaʼi, ko tona kupu tāfito “ ʼE Koutou Feafeaʼi Koa Ia Muʼa ʼo Te ʼAtua?”
5 Ko te polokalama ʼe fakaʼosi ʼaki anai he fakaloto mālohiʼi ʼo tatou ke tou nonofo maʼu ʼi te tui, ke tou felogoi tuʼumaʼu mo niʼihi ʼi te ʼofa pea mo te tokalelei. Ko te fakatahi fakakolo ʼe ko he fealagia makehe ʼe foaki mai e Sehova ke feala ai kia tatou fuli hatatou ‘fetokagaʼaki ke tou feʼugaʼaki ki te ʼofa pea mo te ʼu gāue lelei.’ (Hep. 10:24, 25) Ke tou fai he ʼu fakatuʼutuʼu ke tou kau ki te polokalama katoa ʼi te ʼu ʼaho ʼaia e lua.