Ko He Fakatahi Fakasilikō Moʼo Tokoni Mai Ke Tou Haofaki Totatou Maʼuli Fakalaumālie
1. Koteā ʼaē ʼe foaki mai e Sehova moʼo tokoni mai ke tou fakahoko ia te gāue ʼaē neʼe ina foaki mai, ko te fakamafola ʼo te logo lelei?
1 Ko Sehova ʼe ina foaki lahi mai te ʼu tokoni, mo te ako, pea mo te ʼu fakalotomālohi ʼaē ʼe ʼaoga kiā tātou ke tou kau ki te gāue ʼaē neʼe ina foaki mai, ko te fakamafola ʼo te logo lelei. (Mat. 24:14; 2 Tim. 4:17) ʼE tou maʼu te ʼu faʼahi ʼaia ʼi tatatou fakatahi fakasilikō ʼaē ʼe fai ʼi te taʼu fuli. Ko te polokalama foʼou ki te taʼu gāue 2010 ʼe talanoa anai ki te kupu tāfito ʼaenī: “Kotou Haofaki Tokotou Maʼuli Fakalaumālie,” ʼaē ʼe toʼo mai iā Loma 8:5 pea mo Suta 17-19. Neʼe fakatuʼutuʼu ke kamata ʼi te vāhaʼa ʼo te ʼaho 31 ʼo ʼAukusitō 2009.
2. (a) Koteā te ʼu fua lelei kā tou maʼu anai ʼi te fakatahi fakasilikō? (b) Neʼe tokoni feafeaʼi atu ia te ʼu fakatahi fakasilikō ʼaē kua ʼosi ki takotou minisitelio?
2 Te ʼu Fua Lelei ʼAē Kā Tou Maʼu Ai: ʼI te polokalama ʼaia, ʼe fakatokagaʼi mai anai kiā tātou ʼo ʼuhiga mo te ʼu tuʼutāmaki, ohagē lā ko te ʼu fakafiafia ʼaē ʼe fakapuli temi pea mo fakalelu tātou mai te ʼu gāue ʼaē ʼe maʼuhiga moʼoni. ʼE tou ako anai peʼe feafeaʼi hatatou tauʼi ia te aga ʼaē ko te tali pea mo te fakagafua ia te ʼu aga fuli pē, pea mo tou vakaʼi anai ia te ʼu agaaga ʼo ia ʼaē ʼe manatu fakalaumālie. Ko te ʼu akonaki ʼaē ʼe pipiki pē ki tona kupu tāfito e tahi ʼaē kā fai ʼi te ʼAhotapu, ʼe fakahā ai anai peʼe feafeaʼi ki te hahaʼi takitokotahi pea mo te ʼu fāmili hanatou fai he ʼu fakatuʼutuʼu ke natou mālolohi ai ʼi te faʼahi fakalaumālie, mokā hoko mai he ʼu fakaneke pea mokā ʼahiʼahiʼi tanatou tui. ʼE tokoni mai anai te polokalama ke tou puipui ia totatou loto, mo taupau ke mālohi totatou ʼaluʼaga fakalaumālie, pea mo tou mahino lelei ki te ʼatu ʼu lelei ʼaē kā maʼu e nātou ʼaē ʼe natou haofaki ia tonatou ʼaluʼaga fakalaumālie.
3. Ko ʼāfea ʼaē kā fai ai takotou fakatahi fakasilikō, pea koteā ʼaē ʼe tonu ke kotou fakatotonu ke kotou fai?
3 ʼI te temi pē ʼaē ʼe kotou ʼiloʼi ai te ʼaho pea mo te koga meʼa ʼaē kā fai ai ia te fakatahi fakasilikō ʼaenī kā hoko mai, kotou fakatuʼutuʼu ke kotou kau pea mo fakalogo lelei ki te polokalama kātoa ʼaē kā fai ʼi te ʼu ʼaho ʼaia e lua. Ke kotou tui papau, ʼe tapuakinaʼi e Sehova ia te ʼu nima ʼo te tagata ʼaē ʼe faʼa gāue.—Taag. 21:5.
4. Koteā ʼaē ʼe tou tui papau kā tou maʼu anai ʼi tatatou fakatahi fakasilikō ʼaē kā hoko mai?
4 ʼE ko Sehova ʼaē ʼe ina Foaki ia te meʼa ʼofa lelei ʼaia. Ko te polokalama ʼaē neʼe teuteuʼi e te kalasi ʼo te tagata kaugana agatonu, ʼe ko te meʼa pē ʼaia ʼaē kā ʼaoga anai kiā tātou moʼo hoko atu ia tatatou gāue ʼi totatou ʼuhiga kau minisi Kilisitiano. ʼE tou fakamālo kiā Sehova ʼo ʼuhiga mo meʼa fuli ʼaē neʼe ina foaki ʼofa mai kiā tātou, moʼo tokoni mai ke tou “taupau maʼu te tala ʼi te kaugamālie ʼo tatatou ʼamanaki ʼo mole tou lotovaivai.”—Hep. 10:23-25; Sake 1:17.