Ko He Fakatuʼutuʼu Maʼa Te Kau Minisi Kilisitiano
1. Koteā te fakatuʼutuʼu foʼou neʼe kamata ʼi te taʼu 1938, pea he koʼē neʼe fai ia te ʼu fakatahi lalahi fēia?
1 ʼI te taʼu 1938, neʼe kamata fai e te kautahi ʼa Sehova ia te fakatuʼutuʼu foʼou. Ko ni ʼu kōkelekāsio neʼe fakaafe ke natou kau ki te ʼu fakatahi fakafenua, ʼaē kua higoa ʼi te temi nei ko te ʼu fakatahi fakasilikō. He koʼē neʼe fai te ʼu fakatahi lalahi fēia? ʼE tali fēnei ʼi te pepa Informateur (ʼaē ʼi te temi nei ko Te Minisitelio ʼo Te Puleʼaga) ʼo te māhina ʼo Sānualio ʼo te taʼu 1939: “Ko te ʼu fakatahi lalahi ʼaia ʼe ko he tahi fakatuʼutuʼu ʼa te Kautahi Fakateokalatike ʼa Sehova moʼo takitaki ia te gāue ʼo tona Puleʼaga. Ko te ʼu tokoni ʼaē ʼe foaki ʼi te ʼu fakatahi lalahi ʼaia ʼe maʼuhiga maʼa te hahaʼi fuli pē, ke feala hanatou fakahoko fakalelei te gāue ʼaē neʼe foaki mai.” Kā tou tokagaʼi ia te tuputupu ʼo te kau fai fakamafola ʼo te Puleʼaga, ʼaē neʼe toko 58 000 pē ʼi te taʼu 1938 pea neʼe natou toko 7 000 000 ʼi te taʼu 2009, ʼe hā lelei ai ko te ʼu fakatahi fakasilikō, ʼe natou tokoni moʼoni ki te kau minisi ke natou “fakahoko . . . te gāue ʼaē neʼe foaki mai”!
2. Koteā te ʼu akonaki ʼaē kā fai anai ʼi tatatou fakatahi fakasilikō ʼi te taʼu gāue ʼaenī kā haʼu?
2 Te Kupu Tāfito ʼo Te Fakatahi Fakasilikō ʼo Te Taʼu Kā Haʼu: ʼE tou fakaʼamu ke hoko mai lā ia te fakatahi fakasilikō ʼaē kā kamata ʼi Sepetepeli pea mo te ʼu fakalotomālohi ʼaē kā foaki mai ai anai. ʼE ko tona kupu tāfito ʼaenī: “ ʼE Mole Kotou Kau ʼi Te Mālamanei” neʼe toʼo mai iā Soane 15:19. Koteā ʼihi akonaki ʼaē kā ʼaoga moʼoni anai ki te kau minisi Kilisitiano? ʼI te Moeaki, ʼe tou fakalogo anai ki te akonaki ko tona kupu tāfito “Ko Te Selevisi Temi Kātoa ʼe Ina Puipui Tātou—ʼO Feafeaʼi?” ʼE toe fai anai mo te akonaki ʼe koga tolu, ko tona kupu tāfito “ ʼAua Naʼa ʼUlihi Koutou e . . . ” “Te Manu Fekai,” “Te Fafine Paomutu Lahi,” pea mo “Te Kau Fakatau Koloa Feʼoloʼaki.” ʼI te ʼAhotapu, ʼe fai anai te ʼu akonaki ʼe fakapipiki tāfito ki te kupu tāfito “ ʼOʼofa Kiā Sehova, Kae Mole Ki Te Mālamanei.” ʼE toe ʼi ai mo te tahi ʼu akonaki ko tonatou ʼu kupu tāfito ʼaenī: “Ke Kotou Hagē Pē Ko He ‘Kau Matāpule Pea Mo He Hahaʼi ʼe Nonofo Fakatemi ʼi He Fenua’ ” pea “Kotou Lototoʼa! ʼE Feala Ke Kotou Mālo ʼi Te Mālamanei.”
3. Koteā te ʼu lelei ʼe feala ke tou maʼu ʼi tatatou kau ʼaē ki te fakatahi fakasilikō?
3 ʼI tana ʼosi kau ki te fakatahi fakasilikō neʼe hoki ʼosi atu nei pē, ko te tuagaʼane neʼe mole kei lagolago mālohi ki te minisitelio, neʼe faitohi ʼo ʼui ko te polokalama neʼe ina uga ia ia ke ina toe vakavakaʼi tona ʼaluʼaga pea mo ina fakatotonu ai ke “kau ki te selevisi pea ke tuku tana kumi he ʼu takuʼaki!” ʼE mahino ia ko te polokalama ʼo te fakatahi fakasilikō ki te taʼu gāue ʼaenī kā haʼu, ʼe tokoni mai anai kiā tātou fuli ke tou ʼoʼofa kiā Sehova kae ke mole tou ʼoʼofa ki te mālamanei. (1 Soa. 2:15-17) Kotou kau ki te fakatahi lahi ʼaia pea mo fakalogo fakalelei ki te polokalama kātoa ke feala ai hakotou maʼu kātoa ia te ʼu lelei ʼo te fakatuʼutuʼu ʼofa ʼaia maʼa te kau minisi Kilisitiano!