Taupau ʼAu Manatu
1. Koteā te kupu tāfito ʼo te fakatahi fakasilikō ʼo te taʼu gāue 2013, pea koteā te fakatuʼutuʼu ʼo te polokalama?
1 Neʼe akoʼi e Sesu tana kau tisipulo ke natou ʼoʼofa kiā Sehova ʼaki tonatou loto kātoa mo tonatou sino kātoa pea mo ʼanatou manatu kātoa. (Mat. 22:37, 38) Neʼe fakatuʼutuʼu ia te ʼu fakatahi lalahi ʼaē kā hoko mai moʼo tokoni mai ke tou fakamālohiʼi totatou ʼuhiga Kilisitiano. ʼE lagi kei kotou manatuʼi te kupu tāfito ʼaenī: “Taupau Tou Loto!” ʼo tatatou fakatahi fakatisitilike kua hili atu. Kae ki te fakatahi makehe ʼaho tahi ʼo te taʼu gāue 2013, ko tona kupu tāfito ʼaenī: “Taupau Tou Leʼo ʼo Loto.” Pea ki te ʼu fakatahi fakasilikō ʼaē kā kamata anai ʼi te ʼu māhina ʼaenī kā hoko mai, ko tona kupu tāfito ʼaenī: “Taupau ʼAu Manatu,” ʼe fakatafito ki te koga tohi ʼo Mateo 22:37. ʼE tokoni mai anai te polokalama ʼaia, ke tou vakavakaʼi ʼatatou manatu ke feala ke ʼalutahi mo ʼaē ʼa Sehova.
2. Ko te ʼu tali ki te ʼu fehuʼi fea ʼaē ʼe tou faiga anai ke tou maʼu ʼi te lolotoga ʼo te fakatahi fakasilikō?
2 Te ʼu Puani ʼAē Kā Talanoa Anai Kiai: ʼI te lolotoga ʼo te fakatahi fakasilikō, ʼe tou faiga anai ke tou maʼu te ʼu tali ki te ʼu fehuʼi ʼaenī, ʼaē ʼe ko he ʼu puani tāfito:
• ʼE tou tekeʼi feafeaʼi te ʼu manatu ʼa te tagata?
• ʼE tou lava fakamālamaʼi feafeaʼi ia te ʼu manatu ʼa nātou ʼaē ʼe mole tauhi kiā Sehova?
• Ko te faʼahiga manatu fea ʼaē ʼe tonu ke tou maʼu?
• Koteā te ʼu lelei ʼe tou maʼu mai te metitāsio?
• ʼE tou fakafealagia feafeaʼi kiā Sehova ke ina fakatonutonuʼi ʼatatou manatu?
• ʼE feala ke lagolago feafeaʼi ia te ʼu tagata ʼohoana, mo te ʼu fafine ʼohoana, mo te ʼu mātuʼa pea mo te ʼu fānau ke maʼuli fiafia te fāmili?
• ʼE tou lava nofo teuteu feafeaʼi ki te ʼaho ʼo Sehova?
• Koteā te fakaʼuhiga ʼo tatatou manatu tāfito ʼaē ki te ʼu gāue fakalaumālie?
• Koteā te ʼu tapuakina ʼe maʼu e nātou ʼaē ʼe natou maʼuliʼi te ʼu meʼa ʼe natou ako?
3. He koʼē ʼe maʼuhiga ke tou kau, mo fakalogo lelei ʼi te ʼu ʼaho ʼaia e lua ʼo te fakatahi fakasilikō pea mo maʼuliʼi te ʼu puani ʼaē kā talanoaʼi anai?
3 ʼE faigaʼi mālohi e Satana ke ina fakahalaʼi ʼatatou manatu. (2 Ko. 11:3) Koia, ʼe tonu ke tou faigaʼi ke tou puleʼi ʼatatou manatu ke fiafia ai te loto ʼo Sehova. ʼE ʼaoga ke hoko atu tatatou maʼu te faʼahiga manatu ʼa Kilisito pea mo tauʼi te ʼu fakaneke ʼo te mālama maveuveu ʼaenī. (1 Ko. 2:16) Kotou fai he ʼu fakatuʼutuʼu ke kotou kau ki te fakatahi fakasilikō ʼaia e ʼaho lua. Kotou fakalogo lelei ki te ʼu akonaki. Ko te maʼuliʼi ʼo te ʼu puani ʼaē kā talanoa anai kiai te fakatahi, ʼe tokoni mai anai ke tou gāue fakamālotoloto ki te Puleʼaga.—1 Pet. 1:13.