Taupau Tou Leʼo ʼo Loto
1. Koteā te kupu tāfito ʼo te fakatahi makehe ʼaho tahi ʼo te taʼu gāue 2013, pea koteā te fakatuʼutuʼu ʼo te polokalama?
1 ʼI te ʼaho fuli, ʼe tou tau mo he ʼu ʼaluʼaga ʼe feala ke tuʼutāmakiʼia ai totatou leʼo ʼo loto. Koia, neʼe fakatuʼutuʼu ai te fakatahi makehe ʼaho tahi ʼo te taʼu gāue 2013, ʼaē kā kamata anai ʼi te ʼaho 1 ʼo Sepetepeli 2012, pea ko tona kupu tāfito ʼaenī: “Taupau Tou Leʼo ʼo Loto.” (1 Tim. 1:19) ʼE tokoni mai anai te polokalama ʼaia ke tou tōkakaga lelei ki tatatou faʼahiga fakaʼaogaʼi ia te meʼa ʼofa maʼuhiga ʼaia mai totatou Tupuʼaga.
2. Koteā te ʼu fehuʼi maʼuhiga ʼaē kā maʼu anai ʼona tali ʼi te polokalama?
2 Kotou Fakatokagaʼi Te ʼu Puani ʼAenī: ʼE maʼu anai ʼi te polokalama ʼaia te ʼu tali ki te ʼu fehuʼi maʼuhiga e fitu ʼo ʼuhiga mo te leʼo ʼo loto:
• Koteā ʼaē ʼe feala ke tuʼutāmakiʼia ai te leʼo ʼo loto?
• ʼE tou akoʼi feafeaʼi totatou leʼo ʼo loto?
• ʼE tou lava maʼa feafeaʼi mai te toto ʼo te hahaʼi fuapē?
• Koteā ʼaē ʼe hā ʼi tatatou faʼahiga manatu ʼo ʼuhiga mo te ʼu lao ʼo te Tohi-Tapu pea mo tona maʼuliʼi?
• ʼE tou lava fakaʼapaʼapa feafeaʼi ki te leʼo ʼo loto ʼo ʼihi?
• Kau tūpulaga, ʼe kotou lava tekeʼi feafeaʼi te ʼu fakaneke ʼaē ke kotou fai ia te ʼu meʼa ʼaē ʼe kovi?
• Koteā te ʼu tapuakina ʼe maʼu e nātou ʼaē ʼe natou tuku ʼonatou leʼo ʼo loto ke takitaki e te laumālie māʼoniʼoni?
3. Koteā te ʼu lelei ʼaē kā tou maʼu anai ʼi te fakatahi?
3 ʼAki te tokoni ʼa Sehova, ʼe feala ke tou tauʼi te ʼu faiga ʼa Satana ke ina ʼulihi totatou leʼo ʼo loto. ʼAki te Folafola ʼa te ʼAtua pea mo tana kautahi, ʼe ʼui fēnei mai e tatatou Tamai ʼofa ʼaē ʼe ʼi selō: “Koeni te ala, koutou haele i ai!” (Esa. 30:21) Ko te polokalama ʼaenī, ʼe ko he tahi ʼaia puleʼaki ʼe fakaʼaogaʼi e Sehova moʼo foaki mai ia te takitaki ʼaia. Koia, kotou fai he fakatuʼutuʼu ke kotou kau ki te fakatahi ʼaia. Kotou fakalogo lelei pea mo vakavakaʼi peʼe feafeaʼi hakotou maʼuliʼi te ʼu tokoni ʼaia. Kotou fai palalau mo tokotou kiʼi fāmili ʼo ʼuhiga mo te ʼu puani ʼaenī ʼo te fakatahi. Ko te maʼuliʼi ʼo te ako ʼaē kā tou maʼu anai, ʼe ina fakalotomālohiʼi anai tātou ke tou hoko atu tatatou taupau he leʼo ʼo loto ʼe lelei pea mo tokoni mai ke ʼaua naʼa tou hehē ʼuhi ko te ʼu lelei fakatemi ʼo te mālama ʼa Satana.—1 Pet. 3:16.