Ko He Polokalama Foʼou ʼo Te Fakatahi Faka Silikosikilipisio
ʼI “te ʼu temi maʼuhiga ʼaupito pea mo faigataʼa” ʼaenī, ʼe ʼaoga kia tatou te poto fakaʼatua ke tou maʼu pea mo taupau te ʼofa ʼo Sehova. (2 Tim. 3:1, MN ) Ko te polokalama ʼo te fakatahi faka silikosikilipisio ʼo te taʼu 2005 ʼe ina foaki mai anai he ʼu tokoni pea mo he ʼu fakaloto mālohi ʼi te kupu tāfito “Ke Takitaki Tatou e ‘Te Poto Mai Oluga.’ ”—Skp. 3:17.
Ko te ʼu ʼuluaki akonaki ʼaē ko tona kupu tāfito “Tou Fakahā ‘Te Poto Mai Oluga’ ʼi Totatou Maʼuli,” ʼe tokoni mai anai ke tou mahino ki te ʼuhiga ʼaē ke tou maʼa, mo tokalelei, mo fakapotopoto, pea mo fakalogo. Pea talanoa anai te tagata taupau faka silikosikilipisio ki te tahi ʼu faʼahi e tolu ʼo te poto ʼaē mai te ʼAtua. ʼE fakaʼosi anai e te tagata taupau faka tisitilike te ʼuluaki ʼaho ʼo ina fakahā peʼe lava feafeaʼi ki te kau minisi Kilisitiano hanatou palalau ki te poto ʼo te ʼAtua, logola te ʼui ʼaē ko he ʼu hahaʼi “neʼe mole ako pea ʼe ko [he ʼu hahaʼi] māhani.”—Gaue 4:13, MN.
ʼI te lua ʼaho, ko te ʼu akonaki ʼaē ʼe fakatafito ki te kupu tāfito “Koutou Kumi Te ʼu Meʼa ʼAē ʼe Nātou Fakaloto Mālohi,” ʼe tokoni mai anai ke tou ʼiloʼi pea mo tekeʼi te ʼu faʼahi ʼaē ʼe feala ke tou lotovaivai ai ʼi te faʼahi fakalaumālie. ʼE toe fakahā mai anai e te ʼu akonaki ʼaia peʼe feafeaʼi hatatou fakaloto mālohi totatou ʼu tēhina mo tuagaʼane ʼi te ʼu fono ʼo te kokelekasio, ʼi te fai faka mafola, pea ʼi te loto fale. Ko te akonaki ki te kaugamālie, ʼaē ko tona kupu tāfito “Te ʼu Fua Lelei ʼo Te Poto Mai Te ʼAtua,” ʼe ina fakaloloto anai tatatou loto fakafetaʼi ki te ʼu lelei ʼaē ʼe tou maʼu mokā tou maʼuliʼi te ʼu pelesepeto ʼa te ʼAtua ʼi totatou maʼuli. Ko te akonaki fakaʼosi ʼaē ko tona kupu tāfito, “Ko Te Poto ʼAoga ʼAē Mai Te ʼAtua ʼe Ina Hāofaki Tatou,” ʼe ina fakaloto mālohiʼi tatatou fakatotonu ʼaē ke tou kumi te poto mai ia Sehova ʼAtua ʼi te ʼu ʼaho fakamuli ʼaenī.
Ko te faʼahi maʼuhiga ʼo te ʼu fakatahi fuli ʼe ko te papitema ʼo te ʼu tisipulo foʼou. ʼI te polokalama, ʼe ʼi ai mo te Ako ʼo Te Minisitelio Faka Teokalatike pea mo te ako ʼo Te Tule Leʼo. ʼE loto e Sehova ke tou maʼu fuli te poto ʼaē ʼe ina foaki mai. ʼE lahi anai te ʼu tapuakina fakalaumālie ʼaē ka tou maʼu ʼaki te ʼu tokoni pea mo te ʼu fakaloto mālohi ʼo tatatou fakatahi faka silikosikilipisio.—Taag. 3:13-18.