Ko Te Polokalama Foʼou ʼo Te Fakatahi Faka Silikosikilipisio
1 Ko te polokalama foʼou ʼo te fakatahi faka silikosikilipisio ʼaē ʼe kamata ʼi Sepetepeli, ʼe talanoa anai ki te kupu tāfito ʼaenī “Tou Maʼu He Fiafia ʼe Lahi Age ʼi Tatatou Foaki.” (Gāue 20:35) ʼE ʼui fēnei ʼo ʼuhiga mo te fiafia ʼe ko “he agaaga ʼo te manuʼia pea mo te fīmālie.” ʼE tokolahi te hahaʼi ia ʼaho nei ʼe nātou faiga ki te ʼu fiafia kehekehe ʼo te maʼuli, pea ko te ʼu fiafia ʼaia ʼe ko he ʼu fakafiafia faka temi pe ia. ʼE mole ko te fiafia moʼoni ʼaia. Kae, ʼe akoʼi mai e Sehova kia tatou peʼe feafeaʼi hatatou maʼu te fiafia moʼoni pea ke tou maʼu ʼo talu ai. (Is. 48:17; 1 Soane 2:17) Ko te polokalama foʼou ʼo te fakatahi faka silikosikilipisio, ʼe ina fakahā mai anai te maʼuhiga ʼaē ʼo tatatou maʼu te fiafia lahi ʼi tatatou foaki ʼi te faʼahi fakalaumālie.
2 ʼE fakahā mai anai kia tatou te ʼu tokoni ʼe ʼaoga ki totatou minisitelio. Ko ʼihi ʼu akonaki ʼe fai anai e te ʼu tagata taupau ko tona kupu tāfito: “Tou Fai Hotatou ʼu Kaumeʼa ʼAki Te ʼu Koloā Heʼe Faitotonu,” “Tou Fakaʼapaʼapa Ki Te Fakatuʼutuʼu ʼa Te ʼAtua ʼo ʼUhiga Mo Te ‘ ʼu Meʼa ʼOfa Tagata,’ ” pea “Tou Maʼu Te ʼu Faʼahi Kehekehe ʼo Te Fiafia Moʼoni.” Ko nātou ʼaē ʼe fia papitema ʼi te fakatahi ʼaia, ʼe tonu anai ke nātou ʼolo ʼo vakaʼi te tagata taupau pelesita ke feala hana fakatuʼutuʼu mo he ʼu tagata ʼāfea ke nātou vakaʼi mo nātou ʼaia te ʼu fehuʼi ʼo ʼuhiga mo te papitema. Ko tatatou tauhi kia Sehova ʼaki he ʼu felogoi ʼe lelei, ʼe tou maʼu ai anai he fiafia lahi kia nātou ʼaē neʼe hoki papitema.
3 Tahi ʼaē meʼa, ʼe tou maʼu te fiafia moʼoni pea mo te fīmālie, mo kapau ʼe tou fakamoʼoni ki te pule ʼa Sehova ʼe ina ʼaumai ai foki te fiafia moʼoni pea mo te fīmālie. ʼE tonu ke ʼiloʼi e te hahaʼi fuli te faʼahi ʼaia. Koia, ko te akonaki ki te kaugamālie ʼi te fakatahi faka silikosikilipisio ko tona kupu ʼaenī “Tou Fakatahi Mo Te Hahaʼi Fiafia ʼa Te ʼAtua.” Tou fakatuʼutuʼu ke tou fakaafe ia nātou fuli ʼaē ʼe nātou fakahā tanatou fia logo ki te moʼoni ke nātou ʼōmai ki te akonaki ʼaia. ʼE mole nātou maʼu anai te fīmālie moʼoni pea mo te manuʼia heʼegata ʼi te pule fakatagata ʼo te mālama ʼaenī, ʼaē ʼe takoto ʼi te mālohi ʼa Satana. (Tnk. 8:9) Kae ʼe nātou fiafia anai mo kapau ʼe nātou fakatahitahi mo te hahaʼi fiafia ʼa Sehova!—Pes. 144:15b.
4 Logope la te ʼāsili kovi ʼo te ʼu ʼaluʼaga ʼo te tuʼu ʼo te ʼu faʼahiga meʼa ʼaenī, ko nātou ʼaē ʼe nātou maʼu te fiafia lahi ʼi tanatou foaki ʼi te faʼahi fakalaumālie, ʼe tapuakina tuʼumaʼu anai nātou e te ʼAtua fiafia. (1 Tim. 1:11) Ko te polokalama foʼou ʼo te fakatahi faka silikosikilipisio, ʼe ina fakahā anai ko te meʼa ʼaia ʼe moʼoni. Koutou faiga mālohi ke koutou kau ki te fakatahi ʼaia!