Te Polokalama Foʼou ʼo Te Fakatahi Faka Silikosipisio
Koteā te ʼu fua lelei ʼaē ʼe koutou maʼu ʼi takotou haʼele ʼi te temi nei mo Sehova? ʼE koutou lava tauʼi feafeaʼi te ʼu fakahala ʼo te mālama, ke ʼaua naʼa koutou tuku ki muli te ʼu meʼa ʼo te Puleʼaga? (Mat. 6:33) ʼE faigataʼa koa kia koutou hakotou fakakeheʼi te meʼa ʼaē ʼe lelei pea mo te meʼa ʼaē ʼe kovi ʼi te mālama ʼaenī, ʼaē ʼe ina ʼui ʼe lelei te meʼa ʼaē ʼe kovi? (Hep. 5:14) Ko te ʼu faʼahi ʼaia ʼe tali anai kiai te fakatahi faka silikosipisio “Koutou Maʼu ʼi Te Temi Nei He ʼu Lelei ʼi Takotou Haʼele ʼi Te ʼu Ala ʼa Te ʼAtua,” ʼaē ka kamata mai Sepetepeli 1999.—Pes. 128:1.
ʼE ʼi ai anai he agaaga foʼou ʼi te Moeaki ʼo te fakatahi faka silikosipisio ʼaia, heʼe fakahā ai anai peʼe tonu ke fai feafeaʼi te Fono Gāue. ʼE tala atu anai e te tagata taupau faka silikosipisio ʼo takotou kokelekasio, pe koteā te fakatuʼutuʼu ʼaia ke feala hakotou teuteu fuli kiai pea ke koutou leleiʼia katoa te polokalama ʼaia.
Ko te akonaki ʼaē ko tona kupu tāfito “ ʼU Pionie—Koutou Nofo Tokaga Ki Takotou Faʼahiga Haʼele,” ʼe ina fakamahino mai anai peʼe lava feafeaʼi hatatou agapoto pea mo hatatou aga fakapotopoto ke tou fakaʼaogaʼi lelei te temi nei ki te selevisi pionie. (Ef. 5:15-17) Ko te akonaki “Koutou Tokaga Ki Te ʼu Faʼahiga Aga ʼAē ʼe Hage ʼe Lelei,” ʼe ina fakahā mai anai peʼe feala feafeaʼi hatatou ʼiloʼi papau peʼe tali e te ʼAtua te ʼu agaaga fuli ʼo totatou maʼuli. Ko te akonaki “ ʼE Malave Feafeaʼi Kia Koutou Te ʼu Lea Faka Polofeta ʼAē Kua Hoko,” ʼe tokoni mai anai ke tou fakafonu totatou ʼatamai pea mo totatou loto ʼaki te ʼofa ki te Folafola ʼa te ʼAtua. Ko te akonaki ʼaē ka fai ki te kaugamālie, ʼaē ko tona kupu tāfito “Ko Te ʼu Ala ʼa te ʼAtua—ʼe Fua Lelei Anai Kia Koutou!” ʼe ina faka maʼuhigaʼi anai te ʼu fua ʼaē ʼe tou maʼu ʼi te temi nei ʼi tatatou mulimuli ki te ʼu meʼa faitotonu ʼaē ʼe fakamaʼua mai e Sehova.
ʼE koutou fia fakahā koa ki te kaugamālie ʼi takotou papitema ʼi te vai, ʼe koutou fia haʼele ʼi te ʼu ala ʼa te ʼAtua, ʼi tokotou ʼuhiga kaugana ʼaē kua koutou foaki ki ai tokotou maʼuli? Kapau koia, pea koutou fakahā te faʼahi ʼaia ki te taupau pelesita, ke feala hana fai te ʼu fakatuʼutuʼu ʼaē ʼe ʼaoga ki te faʼahi ʼaia.
Koutou lotomālohi ke koutou kau ki te ʼu koga fuli ʼo te fakatahi faka silikosipisio ʼaia. Koutou kau ki te polokalama katoa ʼo te ʼu ʼaho lua ʼaia, koteʼuhi ʼe “manuʼia te tagata fuli pe ʼe manavasiʼi kia Sehova, ʼaē ʼe haʼele ʼi tona ʼu ala.”—Pes. 128:1.