Te Polokalama Foʼou ʼo Te Fakatahi Faka Silikosikilipisio
“Tou Manatuʼi Te ʼAho ʼo Sehova ʼAē Kua Ōvi Mai” ʼe ko te kupu tāfito ʼaia ʼo te fakatahi faka silikosikilipisio ʼaho lua ʼaē ʼe kamata ʼi Sepetepeli. (2 Pet. 3:12) Neʼe fai moʼo uga ʼo tatou ke tou mahino ki te kua maʼuhiga ʼo te temi. Kua vave hoko anai ki te hahaʼi ʼo te kele te ʼu fakamāu ʼa Sehova. Ko ai koa ʼaē ka hāo anai ʼi “te ʼaho lahi ʼo te ʼAtua Māfimāfi”? ʼE gata pe kia nātou ʼaē ʼe nonofo ʼaʼala ʼi te faʼahi fakalaumālie pea mo nātou tuku he faʼifaʼitaki lelei ʼi tanatou “ ʼu aga fakamaʼoniʼoni pea mo te ʼu gāue ʼaē ʼe fakaʼiloga ʼaki ai ʼe nātou pipiki ki te ʼAtua.”—Fkhā. 16:14; 2 Pet. 3:11.
Ko te papitema ʼe maʼuhiga ki he tahi ke hāo anai ʼi te ʼaho ʼo Sehova. (1 Pet. 3:21) Ko te ʼu kaugā fai faka mafola ʼaē ʼe fia papitema ʼi te fakatahi ʼaia ʼe nātou fakahā anai ki te tagata taupau pelesita, ʼaē ka ina fai anai he ʼu fakatuʼutuʼu ʼe ʼaoga ki te faʼahi ʼaia.
Ko te akonaki ko tona ʼu koga e fā, “Ko Te Faʼahiga Tagata Feafeaʼi Anai Ia Tatou,” ʼe fakahā lelei ai ko tatatou ʼu gāue ʼe pipiki kiai tatatou manatuʼi ʼaē te kua ōvi mai ʼo te ʼaho ʼo Sehova. Ko te akonaki ki te kaugamālie, “Tou Gāue Fakapotopoto ʼi Te Kua Ōvi Mai ʼo Te ʼAho ʼo Sehova,” ʼe ina fakamahino anai te faka ʼuhiga ʼo te ‘kumi ʼo Sehova, mo te faitotonu, pea mo te agavaivai,’ ke feala ai hotatou hāofaki.—Sofo. 2:3.
ʼE fakaʼosi anai te fakatahi faka silikosikilipisio ʼaki te ʼu akonaki e lua ʼe fakaloto mālohi ʼe fai e te ʼu tagata taupau feʼaluʼaki, ko tonā ʼu kupu tāfito: “ ʼE Fakatafito Koa Tokotou Maʼuli Ki Te Moʼoni?” pea “Ke Koutou Manatuʼi Te ʼAho ʼo Sehova ʼi Takotou ʼu Fakatuʼutuʼu ʼo ʼUhiga Mo Te Ka Haʼu.” Ko te ʼu akonaki ʼaia ʼe nā uga anai tatou ke tou sivi totatou maʼuli pea mo tou fai he ʼu fetogi ʼe ʼaoga. Ko te lea faka polofeta ʼa te Tohi-Tapu pea mo te ʼu meʼa ʼaē ʼe hoko ʼi te malamanei ʼe hā lelei ai ko te ʼaho ʼo Sehova kua ōvi mai. Ko te polokalama ʼo te fakatahi ʼaia ʼe ina fakaloto mālohiʼi anai tatou ke tou ‘aga fakapotopoto pea ke tou nonofo ʼalaʼala.’ (1 Pet. 5:8) Koutou fakatuʼutuʼu ke koutou kau ki te ʼu ʼaho ʼaia e lua.