Te Polokalama Foʼou ʼo Te Fakatahi Faka Silikosikilipisio
Ko te tahi faka ʼuhiga ʼo te manavasiʼi, ʼe ko te “fakaʼapaʼapa ʼaupito pea mo he faka maʼuhiga ʼe fai tāfito ki te ʼAtua.” ʼE ko te faka ʼuhiga ʼaia ʼi te Tohi-Tapu ʼo te manavasiʼi ʼaē ʼe ʼui ʼe ko “te kamata ʼo te poto.” (Pes. 111:10) Kae ʼe ʼi ai te tahi faʼahiga manavasiʼi ʼe maʼu ʼi te mālama ʼaenī ʼaē ʼe puleʼi e Satana. ʼE tou lava tekeʼi feafeaʼi te taʼi mataku ʼaia kae tou fakatuputupu he manavasiʼi lahi kia Sehova? ʼE tali ki te fehuʼi ʼaia ʼi te polokalama foʼou ʼo te ʼu fakatahi faka silikosikilipisio ʼo te taʼu gāue 2002. Koʼeni tona kupu tāfito: “Koutou Manavasiʼi Ki Te ʼAtua Pea Mo Koutou Faka Kolōlia Kia Te Ia.” (Apk. 14:7, MN ) ʼE tou mahino anai ki te ʼu faʼahiga ʼaluʼaga ʼaē ʼe ʼaoga ai te manavasiʼi kia Sehova kia tatou takitokotahi pea mo totatou kautahi.
Logola ko te manavasiʼi ʼe lava faka ʼuhiga ki he tuʼania peʼe ki te mataku, pea mo te mole fia kātakiʼi ʼo te ʼaluʼaga faigataʼa, kae ʼe ʼui fēnei e te Tohi-Tapu: “Manuʼia te tagata fuli pe ʼe manavasiʼi kia Sehova.” (Pes. 128:1) Ko te polokalama ʼo te fakatahi ʼe ina fakahā mai anai te ʼu faʼahi ʼaē ka tokoni mai ke tou kātakiʼi te ʼu faigataʼaʼia ʼaē ʼe pipiki ki te tauhi moʼoni. ʼE tou vakaʼi anai peʼe feafeaʼi hatatou tokoni ki te hahaʼi foʼou ke nātou maʼu te manavasiʼi lelei ʼaia ki te ʼAtua, ʼaē ka ina uga moʼoni anai nātou ke nātou fia tauhi kia te ia ʼaki tonatou loto katoa, tonatou nefesi katoa, tonatou ʼatamai katoa, pea mo tonatou mālohi katoa. (Mko 12:30) Ko te ʼuluaki ʼaho ʼe fakaʼosi anai ʼaki te akonaki ʼa te tagata taupau faka tisitilike “Koutou Pipiki Mālohi Kia Nātou ʼAē ʼe Koutou ʼOʼofa Ki Ai.” ʼE ina fakamahino anai peʼe koteā ʼaē ʼe tou lava fai, moʼo nofo tokaga ki te ʼu faiga ʼa te Tevolo, ke ina fakamaliu tatou mai ia Sehova, mo totatou famili, pea mo totatou ʼu tēhina faka Kilisitiano.
ʼI te lua ʼaho, ʼe fai anai te ʼu akonaki e fā ʼe fakatafito ki te kupu tāfito ʼaenī “Koutou Manavasiʼi Kia Sehova, Ka Mole Ki Te Tagata.” ʼE ina fakamahino mai anai pe koʼe ʼe tonu ke tou tauʼi pea ʼe feafeaʼi te tauʼi ia te mataku ʼaē ʼe ina tāʼofi tatou ke mole tou fakahoko katoa totatou minisitelio, pea mo tou taupau tatatou agatonu pea mo he leʼo ʼo loto ʼe maʼa ʼi te faleako pea mo totatou fale gāue. Ko te akonaki ki te kaugamālie “Koutou Manavasiʼi Ki Te ʼAtua Pea Mo Taupau Tana ʼu Fakatotonu” ʼe fakatafito ki te ʼu meʼa ʼaē ʼe talanoa kiai ia Apokalipesi kapite 14. Ko te fakatahi faka silikosikilipisio ʼe fakaʼosi anai ʼaki te uga fakaloto mālohi ʼaenī “Koutou Haga Haʼele ʼi Te Manavasiʼi Kia Sehova.”
Ko te Ako ʼo Te Minisitelio Faka Teokalatike, te faʼahiga fai ʼo te Fono Gāue, te akonaki ʼo te papitema, pea mo te fakanounou ʼo te ako ʼo Te Tule Leʼo, ʼe ko te tahi ʼaia ʼu puani maʼuhiga ʼo te polokalama ʼaē ʼe tonu ke koutou logo kiai. Koutou fakaafe takotou ʼu ako Tohi-Tapu ke nātou ʼōmai mo koutou ki te fakatahi ʼaia. Ko ia ʼaē ʼe fia papitema ʼe tonu ke ina foimo fakahā ki te taupau pelesita. Ko tatou fuli ʼe tou fia fakahā anai tatatou manavasiʼi katoa kia Sehova, pea mo tou faka kolōlia kia te ia, ʼo tou kau ki te polokalama katoa pea mo maʼuhiga ʼaia!