Koutou Gāueʼi Tokotou ʼu Fealagia Fakakaukau

¹ ʼI te ʼu ʼaho fakamuli pea mo faigataʼa ʼaenī, ʼaē ʼe tou maʼuʼuli ai, kua ʼāsili te ʼu fihifihia pea mo te ʼu ʼahiʼahi kehekehe ʼaē ʼe hoko ki te hahaʼi ʼa te ʼAtua ʼi te potu fuli pe. (2 Tim. 3:1-5) ʼE ʼaoga ke fakaloto mālohiʼi ia tatou fuli ke tou nonofo mālohi ʼi te tui. (1 Ko. 16:13) ʼE tou lava fai te faʼahi ʼaia ʼaki te tokoni ʼa Sehova, ʼo tou kai tuʼumaʼu te ʼu meʼa kai ʼo tana Folafola, mo tou falala ki tona laumālie, pea mo tapiki maʼu ki tana kautahi.—Pes. 37:28; Loma 8:38, 39; Apk. 2:10.

² Koia neʼe lelei ai te kupu tāfito “Koutou Liliu Ko He ʼu Hahaʼi Lalahi ʼi Te ʼu Fealagia Ki Te Mahino,” ʼo te fakatahi makehe ʼaho tahi ʼo te taʼu ʼaenī kua ʼosi. Neʼe fakatafito kia 1 Kolonito 14:20 (MN ), ʼaē ʼe tou lau ai te ʼu palalau ʼaenī ʼa te ʼapositolo ko Paulo: “ ʼU tēhina, ʼaua naʼa koutou liliu ko he ʼu kiʼi tamaliki ʼi te fealagia ki te mahino, kae koutou hage he ʼu kiʼi tamaliki ʼi te meʼa ʼaē ʼe kovi; kae ʼi te faʼahi ʼo te ʼu fealagia ki te mahino, koutou liliu ko he ʼu hahaʼi kua katoa te ʼuhigaʼi tagata.” Neʼe koutou leleiʼia koa te polokalama?

³ “Neʼe fakaloto mālohi!” “Neʼe ʼaoga kia tatou te ʼu akonaki ʼaia!” Neʼe lahi te tahi ʼu tali lelei ʼo ʼuhiga mo te polokalama ʼaia. Māʼia mo te tagata ʼe mole ko he Fakamoʼoni, neʼe haʼu ki te fakatahi makehe ke sio ki te papitema ʼo tona kiʼi ʼofafine ʼe taʼu 12, pea neʼe ina ʼui neʼe ina leleiʼia ʼaupito te ʼu akonaki, pea neʼe mahino ai kia ia ʼe ʼaoga te faʼahi ʼaia ki tona famili. Neʼe feiā koa mo koutou? Tou fakamanatuʼi ʼihi puani ʼo te polokalama.

⁴ Ko Te ʼAtamai Mālama Totonu ʼe ʼAoga Moʼo Fakatuputupu Te ʼu Fealagia Fakakaukau: ʼI te ʼuluaki akonaki, “Koutou Fakatuputupu ʼi Te Temi Nei Takotou ʼu Fealagia Ki Te Mahino,” koteā ʼaē neʼe ʼui e te tēhina faiakonaki ʼe ʼaoga moʼo kātakiʼi te ʼu fihifihia ʼo te temi nei? ʼE mole gata ʼaki pe he fealagia fakakaukau mālohi. ʼE tonu ke tou gāueʼi pea mo fakaloloto tatatou ʼu fealagia moʼo mahino ki te Tohi-Tapu, naʼa tou taʼomia ʼi te ʼu agakovi fuape ʼaē ʼe tou sio kiai. Ke tou maʼu te mahino ʼaia, ʼe ʼaoga kia tatou te takitaki ʼa te ʼAtua. Ohage ko te tagata fai pesalemo, ʼe tonu ke tou faikole kia Sehova ke ina fakamahino mai tana ʼu lao pea mo tana ʼu fakamanatu, ke feala hatatou tauhi kia te ia ʼaki totatou loto katoa.—Pes. 119:1, 2, 34.

⁵ ʼI te akonaki ʼaē neʼe hoa kiai, neʼe ʼui e te tagata taupau faka silikosikilipisio, ko Sehova, ʼaki tana Folafola pea mo tana kautahi, ʼe ina foaki mai “Te ʼu Tokoni Ke Tou Liliu Ko He ʼu Hahaʼi Lalahi ʼi Te Mahino Ki Te Tohi-Tapu.” Neʼe ʼui ko te mahino “ ʼe ko te fealagia ke kita sioʼi he meʼa, pea mo kita mahino ki te gāue tahi ʼo tona ʼu koga kehekehe, pea mo kita mahino katoa kiai.” Ko ai ʼaē ʼe lava tokoni mai kia tatou moʼo fakatuputupu te fealagia ʼaia? Neʼe foaki mai e Sehova te ʼu meʼa ʼofa ko te ʼu tagata, moʼo tokoni kia tatou ke tou tuputupu ʼi te faʼahi fakalaumālie. (Ef. 4:11, 12) Ko tona kautahi fakakelekele ʼe ina uga tatou ke tou lau te Folafola ʼa te ʼAtua ʼi te ʼaho fuli, pea mo tou kau tuʼumaʼu ki te ʼu fono fuli. (Pes. 1:2) ʼE akoʼi mai peʼe feafeaʼi te fakaʼaogaʼi ʼo te Tohi-Tapu pea mo te ʼu tohi faka Tohi-Tapu ʼi te ako takitokotahi, pea mo te ako faka famili, ʼo feiā mo te teuteuʼi ʼo te ʼu fono pea mo te faka mafola. ʼE koutou fakaʼaogaʼi koa te ʼu fakatuʼutuʼu fuli ʼaia? ʼE ʼi ai koa hakotou polokalama ke koutou lau tuʼumaʼu te Tohi-Tapu? ʼE maʼuhiga te faʼahi ʼaia, heʼe ina puipui anai tatou ke mole tou tō ki te ʼu hele ʼo te mālama, mo tana ʼu aga, mo tana ʼu filosofia, pea mo tana ʼu kākā.—Kol. 2:6-8.

⁶ ʼE Tonu Ke Akoʼi Totatou ʼu Fealagia Fakakaukau: ʼI tana ʼuluaki akonaki, ʼaē ko tona kupu tāfito “Koutou Akoʼi Takotou ʼu Fealagia Fakakaukau Moʼo Hāofaki Tokotou Maʼuli Fakalaumālie,” neʼe fakamahino e te tēhina faiakonaki, ʼe mole feala ki te hahaʼi ʼo te malamanei ke nātou fakakeheʼi te meʼa ʼaē ʼe lelei pea mo te meʼa ʼaē ʼe kovi. (Isa. 5:20, 21) ʼE tupu ko tanatou fakafisi ki te ʼatamai mālama ʼa te ʼAtua pea mo tanatou mole fia mulimuli ki te ʼu lekula faitotonu ʼa te ʼAtua. Kae ko tatou ʼaē neʼe tou ako te ʼu meʼa fakalaumālie ʼi te kautahi ʼa Sehova, ʼe tou fakamoʼoni ki te ʼu lekula ʼa te ʼAtua, ʼaē ʼe nātou takitaki tatatou ʼu gāue pea mo tatatou aga. Koia, ʼe feala ke tou ʼiloʼi papau ai te meʼa ʼaē ʼe lelei, mo te meʼa ʼaē ʼe leleiʼia e Sehova, pea mo te ʼu meʼa ʼaē ʼe ʼalutahi mo tona finegalo haohaoa.—Loma 12:2.

⁷ Moʼo tekeʼi te ʼu fakakaukau kovi ʼa te mālama pea mo tona ʼu fua kovi, ʼe tonu ke tou akoʼi tuʼumaʼu totatou ʼu fealagia fakakaukau. E feafeaʼi tona fai? Ohage ko tona tuʼu ia Hepeleo 5:12-14, neʼe ʼui e te ʼapositolo ko Paulo ʼe mole tonu pe ke kita ʼinu ki te “huapipi” ʼo te folafola. E tonu ke tou fakaʼaogaʼi te meʼa kai fakalaumālie mālohi, ohage ko te meʼa ʼaē ʼe tou fakaʼaogaʼi ʼi tatatou Ako Tohi, ʼaki Te Tohi ʼo Te ʼu Hisitolia Faka Tohi-Tapu. Pea ʼe tonu ke tou foimo maʼuliʼi te ʼu meʼa ʼaē ʼe tou ako. Kapau ʼe tou fai feiā, pea ʼe tou sio anai ʼe totonu te ʼu pelesepeto pea mo te ʼu lekula ʼa Sehova. Tahi ʼaē meʼa, ʼe tou akoʼi ai totatou ʼu fealagia fakakaukau moʼo fakakeheʼi lelei te meʼa ʼaē ʼe lelei pea mo te meʼa ʼaē ʼe kovi.

⁸ Meʼa fakaʼofaʼofa, ko ʼihi neʼe nātou hēʼia ʼi te faʼahi fakalaumālie. Koteā tona tupuʼaga? He neʼe mole nātou tokagaʼi te ʼu meʼa ʼaē ʼe lelei pea mo faitotonu kia mata ʼo Sehova. Koia neʼe nātou tali ai te ʼu fai palalau ʼi te lātio pea mo te televisio ʼe fakafeagai mo te manatu ʼo te Tohi-Tapu, mo fakalogo te ʼu musika kovi, pea mo tali te ʼu fai palalau kovi ʼaē ʼe fai ʼi te Internet. Kapau ʼe tou aga fakapotopoto, pea ʼe mole tou tuku anai ke fakahēʼi tatou e te ʼu hahaʼi ʼaē ʼe nātou fai te ʼu aga heʼeʼaoga, mo agavale pea mo agakovi.—Taag. 13:20; Kal. 5:7; 1 Tim. 6:20, 21.

⁹ ʼE Tonu Ki Te Kau Tūpulaga Ke Nātou “Hage Ko He ʼu Kiʼi Tamaliki ʼi Te Meʼa ʼAē ʼe Kovi”: Neʼe ʼi ai te ʼu koga e lua ʼo te polokalama, neʼe fakaloto mālohiʼi tāfito ai te kau tūpulaga ke nātou gāueʼi tonatou ʼu fealagia fakakaukau. Neʼe fakamahino e te ʼu tēhina faiakonaki “ko he ʼu kiʼi tamaliki ʼi te meʼa ʼaē ʼe kovi,” ko tona faka ʼuhiga, ke tou hage ko te ʼu tamaliki liliki, ke mole tou ʼahiʼahiʼi te ʼu meʼa ʼaē ʼe kovi, ʼo ʼuhiga mo te ʼu meʼa ʼaē ʼe heʼemaʼa kia mata ʼo Sehova. (1 Ko. 14:20, MN ) Neʼe fakaloto mālohiʼi ia tatou fuli ke tou tokakaga lelei peʼe tou fakaʼaogaʼi feafeaʼi totatou temi, ke tou tekeʼi te ʼu aga kovi kehekehe, pea mo ʼaua naʼa tou pikisia ai. (Ef. 5:15-17) Neʼe fakaloto mālohiʼi tatou ke tou fakafuafua peʼe ko temi e fia ʼe tou fakaʼaogaʼi moʼo lau te ʼu tohi ʼaē ʼe mole tokoni ki tatatou tuputupu ʼi te faʼahi fakalaumālie. Neʼe koutou fai koa te faʼahi ʼaia? Koteā ʼaē neʼe koutou maʼu? ʼO hilifaki ki tatatou lau ia te Tohi-Tapu ʼi te ʼaho fuli, tou faiga mālohi ke tou lau tuʼumaʼu mo te ʼu koga tohi ʼaē ʼe hinoʼi mai e te Sosiete ke tou lau. Kapau ʼe tou fai te faʼahi ʼaia, pea ʼe tokoni mai anai kia tatou fuli, ʼo kau kiai mo nātou liliki, ke tou “maʼu mo te ʼatamai.”—Taag. 4:7-9.

¹⁰ “Te ʼu Fua Lelei ʼo Te Maʼuliʼi ʼo Te ʼu Pelesepeto ʼo Te Tohi-Tapu ʼAki Te Mahino”: Neʼe ko te kupu tāfito ʼaia ʼo te akonaki fakaʼosi ʼo te polokalama ʼo te fakatahi makehe. Neʼe fakamahino e te tēhina faiakonaki, ko Sehova ʼe ko te Matapuna ʼo te mahino ʼaē ʼe ina foaki mai te maʼuli, pea ʼe māʼoluga age ʼi te mahino ʼaē ʼe maʼu e te malamanei. Koutou fakakaukauʼi age muʼa, ʼe tou lava maʼu te mahino mai ia Sehova! ʼE ina foaki lahi ki te hahaʼi ʼaē ʼe nātou kumi fakamalotoloto te mahino ʼaia, pea mo nātou kole age ki ai ʼaki te tui. (Taag. 2:3-5, 9; 28:5) ʼE koutou fakaʼaogaʼi katoa koa te fealagia ʼaia?

¹¹ Neʼe fakaloto mālohiʼi tatou ke tou ako ke tou ʼiloʼi te ʼu pelesepeto mokā tou lau ia te Tohi-Tapu. (2 Tim. 3:16, 17) Tou ako fakalelei te ʼu pelesepeto ʼaia ke tou maʼu te mahino totonu ʼo ʼuhiga mo te ʼu meʼa ʼaē ʼe tala mai e Sehova. Koutou fakaʼaogaʼi he temi moʼo metitasioʼi te ʼu pelesepeto ʼaia, pea mo fakahū ki tokotou ʼatamai pea mo tokotou loto. Ko te faʼahi ʼaia ʼe ina akoʼi anai takotou ʼu fealagia fakakaukau, ke maui mālie tokotou maʼuli mokā koutou fai he ʼu tonu. (Sos. 1:8) Tou vakaʼi he ʼu ʼaluʼaga ʼe hoko ki te tokolahi, pea mo tou vakaʼi peʼe koteā tona ʼu fua lelei kia tatou mokā tou maʼuliʼi te ʼu pelesepeto faka Tohi-Tapu.

¹² ‘ ʼE tonu koa ke ʼau mulimuli ki te ʼu faʼahiga teuteu pea mo te faʼahiga gaohi ʼo te ulu?’ ʼE tau hā te agatuʼu ʼa te mālama ʼi te ʼu faʼahiga teuteu pea mo te faʼahiga gaohi ʼo te ulu. Ohage la ko te taʼi aga ʼaia ʼe ina uga te hahaʼi ke nātou fakaʼaoʼaoganoa ʼi tanatou teuteu, pea mo nātou tui he ʼu mutuʼi meʼa ʼe ina fakaʼasi lelei ai te ʼu koga ʼo te sino. Koteā te ʼu pelesepeto faka Tohi-Tapu ʼe ʼaoga anai moʼo tokoni kia tatou ke mole tou mulimuli ki te ʼu aga ʼaia? Kapau ʼe tou akoʼi tatatou ʼu fealagia fakakaukau, pea ʼe tou tokagaʼi anai te pelesepeto ʼaē ʼe tuʼu ia 1 Timoteo 2:9, 10, ke tou teuteu “fakapotopoto pea mo maʼa . . . , [ʼi hona ʼaluʼaga] e tuha mo [te hahaʼi] lotu.” ʼE ʼi ai te tahi ʼu pelesepeto ʼe ʼaoga ki te faʼahi ʼaia, ʼe tuʼu ia 2 Kolonito 6:3 pea mo Kolose 3:18, 20.

¹³ ‘Koteā ʼaē ʼe ʼau lava fai moʼo taupau mālohi te ʼu felogoi ʼo toku famili?’ ʼE maʼuhiga he felogoi lelei ʼi te famili. ʼE ʼui fēnei ia Sakopo 1:19, MN: “ ʼE tonu ki te tagata fuli pe, ke vave ʼi te fagono, ke tuai ʼi te palalau, mo tuai ʼi te ʼita.” ʼE tonu ki te famili ke nātou fepalalauʼaki pea mo fefakalogoʼaki, heʼe ko te felogoi faka famili, ʼe mole ko he tokotahi pe ʼaē ʼe palalau. Tatau aipe peʼe moʼoni te ʼu meʼa ʼaē ʼe kita palalau kiai, kae kapau ʼe kita fai ʼaki he ʼu palalau agamālohi pea mo fefeka, ʼe mole fua lelei anai, kae fua kovi. Koia, peʼe ko tatou ko he tagata ʼohoana peʼe ko he fafine ʼohoana, peʼe kita maʼu fānau peʼe ko kita ko he fānau, kae ʼe tonu ki tatatou ʼu palalau ke “lelei tuʼumaʼu . . . pea ke konakonaʼi ʼaki te māsima.”—Kol. 4:6, MN.

¹⁴ ‘ ʼE ʼau fia maʼu koloā koa?’ Ko te fia maʼu koloā ʼe ko he fakaneke ʼa te mālama, pea ʼe ina faka faigataʼa totatou maʼuli. ʼE mole kita maʼu ai te fiafia. (Tnk. 5:10; Lu. 12:15; 1 Tim. 6:9, 10) Moʼo tokoni kia tatou ke mole tou tō ki te hele ʼo te fia maʼu koloā, neʼe akoʼi mai e Sesu te pelesepeto maʼuhiga ʼaenī: Ke faka faigafua totatou maʼuli. Moʼo fakafuafua lelei totatou maʼuli, pea mo faka faigafua, ʼe tonu ke tou haga fakamuʼamuʼa te ʼu gāue ʼo te Puleʼaga, kae fai fakamuli te ʼu meʼa fuli ʼaē ʼe mole faʼa maʼuhiga.—Mat. 6:22, 23, 33.

¹⁵ Koteā Tatatou Fakatuʼutuʼu?: ʼE tou maʼu ʼi te Folafola ʼa te ʼAtua ia te matapuna ʼo te ʼu pelesepeto faitotonu moʼo takitaki te ʼu tonu ʼaē ʼe tou fai. ʼE tonu ke tou ako te ʼu pelesepeto ʼaia, ke tou metitasioʼi, pea mo tou mahino peʼe feafeaʼi tonatou maʼuliʼi. Kapau ʼe tou ‘akoʼi totatou ʼu fealagia fakakaukau moʼo ʼiloʼi te kehekehe ʼo te lelei pea mo te kovi,’ pea ʼe fua lelei anai kia tatou pea mo faka maʼuhigaʼi ai ia Sehova.—Hep. 5:14.