Ko Te Polokalama Foʼou ʼo Te Fakatahi Makehe ʼAē ʼe ʼAho Tahi
1 “Koutou liliu ko he ʼu hahaʼi ʼe akoʼi e Sehova,” ʼe ko te kupu tāfito ʼaia ʼo te polokalama foʼou ʼo te fakatahi makehe ʼaho tahi ʼaē ʼe kamata ʼi Sepetepeli. (Soane 6:45) Ko te ako fakaʼatua ʼaē ʼe haʼu mai ia Sehova, ʼe tokoni moʼoni kia tatou ke tou maʼuli fīmālie. ʼE ina fakatuputupu ʼi totatou loto he loto fakafetaʼi ʼo ʼuhiga mo te ʼu koloā fakalaumālie ʼaē ʼe tou maʼu. Ko tatatou ʼu faiga ʼaē ke tou tokoni ki te hahaʼi ke nātou fagono ki te logo lelei, ʼe ina fakaliliu tatou ko he ʼu hahaʼi ʼe ʼaoga ki te sosiete. Ko te fakatahi makehe ʼaho tahi ʼaia, ʼe ina faka maʼuhigaʼi anai te ʼu tapuakina ʼaē ʼe maʼu e te hahaʼi ʼaē ʼe akoʼi e Sehova.
2 Ko te polokalama ʼaia ʼe ina fakakeheʼi anai te ʼu tapuakina ʼaē ʼe tou maʼu ʼaki te ʼu akonaki fakaʼatua, pea mo te ʼu tuʼutāmaki ʼo te ʼu meʼa ʼaē ʼe akoʼi mai e te mālama. ʼE tou mahino lelei anai ki te lelei ʼo te akoʼi ʼo tatou e Sehova—ko te ako ʼaē ʼe fakatafito ki tana Folafola, te Tohi-Tapu. ʼE faka maʼuhigaʼi anai te ʼu koga e tolu ʼo te tauhi, ʼaē neʼe tou maʼu ai te ʼu fua lelei ʼi te akoʼi ʼo tatou e te ʼAtua. Tahi ʼaē meʼa, ʼe fakaloto mālohiʼi anai te kau tūpulaga ke nātou mulimuli ki te ʼu faʼifaʼitaki makehe ʼo te Tohi-Tapu, ohage ko Tavite pea mo Timoteo pea ke nātou faʼufaʼu tonatou maʼuli ʼaki te ʼu gāue fakalaumālie. ʼE fakaloto mālohiʼi anai tatatou tui, pea ʼe toe faka maʼuhigaʼi anai te agatonu ʼo te ʼu tēhina mo tuagaʼane ʼaē kua matutuʼa. Ko te ʼu hahaʼi foʼou ʼaē kua nātou foaki tonatou maʼuli ki te ʼAtua, ʼe feala anai ke nātou papitema. ʼE tonu anai ke nātou fakahā fakatomuʼa ki te tagata taupau pelesita, ʼi muʼa ʼo te fakatahi ʼaho tahi.
3 Ko te akonaki tāfito ʼo te fakatahi makehe ʼaia, ko tona kupu tāfito ʼaenī “ ʼE Akoʼi Tatou e Sehova Ke Tou Fai Tona Finegalo.” ʼE fakahā lelei anai pe koʼe ʼe tonu kia tatou fuli ke tou haga ako, ke tou mālohi ʼi te tui, pea ke hoko atu tatatou tuputupu. ʼE uga anai tatou ke tou faʼifaʼitaki kia Sehova, ʼo tou akoʼi te hahaʼi ki te moʼoni ʼaē ʼe ina taki ki te maʼuli heʼegata. ʼE ʼi ai anai mo te ʼu fakamatala fakaloto mālohi, ʼe nātou fakahā ai anai pe neʼe tokoni feafeaʼi te ʼu tohi ʼa te Sosiete ki te tokolahi ke akoʼi nātou e Sehova. ʼE faka maʼuhigaʼi anai te ʼu fua lelei ʼo te polokalama ako ʼaē ʼe fai ʼi te malamanei katoa ʼo ʼuhiga mo Sehova.
4 Tou fai he ʼu fakatuʼutuʼu ke tou kau ki te fakatahi ʼaia. Tou fakaloto mālohiʼi te hahaʼi fuli ʼaē ʼe fia logo ki te moʼoni ke nātou ʼōmai ki te fakatahi ʼaia. Tou fakatalitali ke akoʼi tatou ʼaki he ʼu meʼa lelei ʼaupito e totatou Faiako Lahi.—Is. 30:20.