Te Polokalama ʼo Te Fakatahi Makehe ʼAho Tahi ʼAē Ka Hoko Mai
ʼAki te mālohi ʼo te laumālie maʼoniʼoni, neʼe fai e te kau ʼuluaki Kilisitiano ia te toe gāue lahi, ko te tala ʼo te logo lelei. (Gaue 1:8; Kol. 1:23) Ko te polokalama ʼo te fakatahi makehe ʼaho tahi ʼo te taʼu 2007, “Tou Maʼumaʼua Tāfito ʼi Te Folafola” ʼe tokoni mai anai kiā tatou ke tou muliʼi ia tanatou faʼifaʼitaki lelei.—Gaue 18:5.
ʼO ʼuhiga mo te Folafola ʼa te ʼAtua, neʼe ʼui fēnei e Tavite: “Ko te fakamanatu ʼa Sehova ʼe feala takita falala kiai, heʼe ina fakaliliu ke poto ia ia ʼaē ʼe mole heʼeki fakapotopoto.” (Pes. 19:7) Ko te polokalama ʼaē neʼe teuteuʼi lelei ki te fakatahi makehe ʼaho tahi ʼo te taʼu 2007, ʼe ina fakahā anai ia te maʼuhiga ʼo te Tohi-Tapu “moʼo fakatokatoka ʼo te ʼu meʼa” pea mo uga anai tatou ke tou fakaʼaogaʼi te Folafola ʼa te ʼAtua moʼo faka mafola pea mo akoʼi ʼaki hatatou mahino ki te maʼuhiga ʼo temi ʼaenī. (2 Tim. 3:16, 17, MN ) ʼE fakahā anai ʼi te polokalama foʼou ʼaia, ia te faʼahiga tekeʼi ʼo te ʼu fakahala pea mo te ʼu fua lelei ʼe tou maʼu anai mo kapau ʼe tou maʼuliʼi ʼi te ʼaho fuli ia te ʼu pelesepeto faka Tohi-Tapu. ʼE toe tokoni mai anai ke tou fakaʼaogaʼi te Folafola ʼa te ʼAtua moʼo tokoni ki he kau tūpulaga pea mo nātou ʼe foʼofoʼou ke nātou tuputupu ʼi te faʼahi fakalaumālie.
Koutou faiga ke koutou kau ki te kamataʼaga ʼo te polokalama, pea mo koutou fakalogo lelei ki te ʼu akonaki. Koutou tohi te ʼu puani ʼaē ʼe koutou lava maʼuliʼi takitokotahi. Koutou fakahā ia tokotou loto fakafetaʼi ki te ako pea mo te ʼu fakamanatu ʼaē ʼe koutou logo kiai, pea koutou fakakaukauʼi peʼe feafeaʼi anai hakotou maʼuliʼi te ʼu meʼa ʼaē ʼe koutou ako.
Ko te polokalama ʼo te fakatahi makehe ʼaho tahi, ʼe ina fakatuputupu anai tatatou leleiʼia te Folafola ʼa te ʼAtua, ʼo ina fakamanatuʼi mai ke tou haga faʼafai ʼi te faka mafola ia te logo lelei ʼo te Puleʼaga, pea mo fakahā mai ia te tokoni ʼaē ke tou foaki ki te hahaʼi ke toe liliu mo nātou ʼo fai feiā. Tou faiga ke ʼaua naʼa tou hala ʼi he takitaki pea mo he ako fakalaumālie ʼa Sehova ʼi tana ʼu fakatuʼutuʼu ʼaia!—Isa. 30:20b, 21.