Te Fakamanatu ʼo Te Fakatahi Makehe ʼAho Tahi
ʼE fakaʼaogaʼi anai te alatike ʼaenī moʼo fakahā fakatomuʼa pea mo fakamanatu te polokalama ʼo te fakatahi makehe ʼaho tahi ʼo te taʼu 2005. Ko te alatike “Te Fakatuʼutuʼu Foʼou ʼo ʼUhiga Mo Te Fakamanatu ʼo Te ʼu Polokalama ʼo Te ʼu Fakatahi,” ʼaē ʼe tuʼu ʼi te pasina 4 ʼo te pepa ʼaenī, ʼe fakamahino ai peʼe feafeaʼi te fai ʼo te fakamanatu ʼaenī. Lolotoga te fakamanatu, koutou vaevae lelei te temi ke feala hakotou fai fuli te ʼu fehuʼi. ʼE tonu ke fakahā lelei e te fakamanatu peʼe feafeaʼi hatatou maʼuliʼi te ʼu manatu ʼaē neʼe fakahā ʼi te fakatahi.
TE POLOKALAMA ʼO TE UHU
1. He koʼe ʼe tuputupu te fia fakalogo ʼa te hahaʼi kia Sehova? Koteā te faka ʼuhiga ʼo te fakalogo? (“Te ʼu Tupuʼaga Ke Tou Fakalogo Ai Ki Te Leʼo ʼo Sehova”)
2. ʼE lava taupau feafeaʼi e te ʼu famili he polokalama lelei ʼo te ʼu gāue fakalaumālie? (“Ko Te ʼu Famili ʼe Nātou Fakalogo Katoa Ki Te Folafola ʼa Te ʼAtua”)
3. ʼE tou lava fakaʼaogaʼi lelei feafeaʼi te ʼu ʼaluʼaga ʼaē ke tou fai fagonogono faigamālie? (“Koutou Fai Ia Meʼa Fuli Pe Ki Te Kolōlia ʼo Te ʼAtua”)
4. Ko te ʼu ako fea ʼe feala ke tou maʼu mai te fakatokaga ʼaē ʼe tuʼu ia Hepeleo kapite 3 mo te 4? ʼE palalau feafeaʼi mai ia Sehova kia tatou ia ʼaho nei? (“ ʼE Hāofaki Tatou Mokā Tou Fakalogo Ki Te Palalau Mai ʼa Te ʼAtua”)
5. Neʼe ʼaoga feafeaʼi kia koutou te akonaki ʼo te papitema? (“Te Foaki ʼo Kita Pea Mo Te Papitema”)
TE POLOKALAMA ʼO TE HILI HOʼATĀ
6. Koteā ʼaē ʼe feala ke tou mahino ʼo ʼuhiga mo Sesu ʼi tana kei tūpulaga, pea ʼe lava feafeaʼi ki te kau tūpulaga hanatou faʼifaʼitaki kia te ia? (“ ʼE Lotomālohi Tatatou Kau Tūpulaga Mokā Nātou Fakalogo Lelei Ki Te Folafola ʼa Te ʼAtua”)
7. Koteā ʼihi faʼahi ʼaē kua feala ai ki te ʼu mātuʼa ke nātou kamata akoʼi te fakatotonu ʼa Sehova ki tanatou ʼu toe ʼaē kei meamea pea mo tanatou ʼu tamaliki? (“Ko Nātou Liliki ʼe Nātou Fakalogo Ki Te ʼAtua Pea Mo Ako”)
8. Ko te ʼu faʼahi tāfito fea ʼaē ʼe tonu ai ke tou fakalogo kia Sehova, mo tona ʼAlo, pea mo “te tagata kaugana agatonu mo poto”? (Mat. 24:45, MN ) He koʼe ʼe maʼuhiga ʼaupito ke tou fai te faʼahi ʼaia? (“Koutou Tokagaʼi Tuʼumaʼu Te Ako ʼAē ʼe Haʼu Mai Te ʼAtua”)