Ko He Polokalama Foʼou ʼo Te Fakatahi Makehe ʼAho Tahi
Kapau ʼe koutou sio peʼe koutou logo ki he fakatokaga, kae mole koutou fakalogo kiai, ʼe feala anai hakotou tuʼutāmaki. ʼE toe maʼuhiga age te mulimuli ki te takitaki fakalaumālie ʼaē ʼe foaki mai e Sehova. ʼE fakahā lelei anai te faʼahi ʼaia ʼi te polokalama ʼo te fakatahi ʼaho makehe ʼi te taʼu gāue ʼaenī ka hoko mai. Ko tona kupu tāfito “Koutou Tokaga Ki Takotou Faʼahiga Fakalogo.”—Luka 8:18.
ʼI tona ʼuluaki akonaki, ʼe fakamahino mai anai e te tēhina peʼe faka ʼuhiga feafeaʼi kia tatou ia ʼaho nei te ʼu tokoni ʼaē ʼe fai ʼi te ʼu ʼuluaki kapite ʼo te tohi ʼa Paulo ki te kau Hepeleo. ʼI te akonaki fakaʼosi, ʼaē ko tona kupu tāfito “Koutou Tokaga Tuʼumaʼu Ki Te Ako ʼAē ʼe Haʼu Mai Te ʼAtua,” ʼe tokoni anai ki te nofoʼaki katoa ke nātou vakavakaʼi peʼe nātou fakalogo moʼoni kia Sehova, mo tona ʼAlo, pea mo “te tagata kaugana agatonu mo poto.”—Mat. 24:45, MN.
ʼE lahi anai te ʼu faʼahi ʼo te polokalama ʼe ʼaoga tāfito anai ki te ʼu famili. Ko te akonaki ʼaē ko tona kupu tāfito “Ko Te ʼu Famili ʼe Nātou Fakalogo Katoa Ki Te Folafola ʼa Te ʼAtua,” ʼe tokoni mai anai ke tou tekeʼi te ʼu meʼa ʼo te malamanei ʼaē ʼe nātou fakavaivaiʼi tatou ʼi te faʼahi fakalaumālie. ʼE fakafehuʼi anai mo nātou ʼaē neʼe nātou fai he ʼu fetogi moʼo fakamuʼamuʼa te ʼu meʼa fakalaumālie. ʼI te akonaki ʼaē ko tona kupu tāfito “ ʼE Lotomālohi Tatatou Kau Tūpulaga Mokā Nātou Fakalogo Lelei Ki Te Folafola ʼa Te ʼAtua,” ʼe fakafehuʼi anai he kau tūpulaga neʼe nātou fakahā tanatou agatonu ʼi te faleako, mo tanatou ʼu kaugā ako, peʼe ʼi te minisitelio. Ko te akonaki “Ko Nātou Liliki ʼe Nātou Fakalogo Ki Te ʼAtua Pea Mo Ako” ʼe tokoni mai anai ke ʼaua naʼa tou meʼa noaʼi te fealagia ʼa te ʼu tamaliki ke nātou ako. Ko te fakafehuʼi ʼa te ʼu tamaliki mo tanatou ʼu mātuʼa, ʼe tokoni mai anai ke tou sio ki te ʼu fua lelei ʼo te akoʼi ʼo te ʼu tamaliki talu mai tanatou liliki ʼi te ʼu ala ʼa Sehova.
Logola ko Satana “ ʼe ina fakahēʼi te kele katoa,” kae ko Sehova ʼe ina fakahā ki tana kau kaugana agatonu te ala ʼaē ʼe tonu ke nātou haʼele ai. (Apk. 12:9, MN; Isa. 30:21) Kapau ʼe tou fakalogo lelei ki tana ʼu tokoni pea mo maʼuliʼi, ʼe tou liliu anai ʼo popoto, mo fiafia, pea mo taki ai tatou ki te maʼuli heʼegata.—Taag. 8:32-35.