Te Polokalama ʼo Te Fakatahi Makehe ʼAho Tahi ʼAē Ka Hoko Mai
Ko te mata ʼe ko he faʼu taulekaleka. (Pes. 139:14) Kae ko te mata ʼe feala pe tana sio fakahagatonu ki he meʼa e tahi. Ko te faʼahi ʼaia ʼe moʼoni mokā tou sio ʼaki ʼotatou mata moʼoni, pea ʼe toe feiā pe ki totatou ʼu mata fakatātā. Ke lelei tatatou sio ʼi te faʼahi fakalaumālie, ʼe tonu ke kātoa tatatou tōkakaga ki te fai ʼo te finegalo ʼo te ʼAtua. Kua fakaʼāsili te ʼu fai fakahala ʼo te mālama ʼa Satana, koia ʼi te polokalama ʼo te fakatahi ʼaho tahi ʼo te taʼu gāue 2006, ʼe matatonu ia tona kupu tāfito “Ke Fakamaʼamaʼa Takotou Sio”!—Mat. 6:22.
Koteā te meʼa ʼaē ʼe tonu ke tou fai ke tou maʼu te ʼu tapuakina ʼa Sehova? (Taag. 10:22) ʼE tali anai ki te fehuʼi ʼaia te akonaki ʼaē ko tona kupu tāfito “Te ʼu Tapuakina ʼAē ʼe Tou Maʼu Mo Kapau ʼe Fakamaʼamaʼa Tatatou Sio.” ʼE fakahā anai e te ʼu tēhina pea mo tuagaʼane ʼaē ka fakafehufehuʼi, te ʼu fua lelei ʼo tatatou maʼuliʼi te ʼu pelesepeto faka Tohi-Tapu. ʼI te ʼuluaki akonaki ʼaē ka fai anai e te tēhina ʼaē ʼe ina ʼaʼahi te fakatahi, ko tona kupu tāfito, “Tou Taupau He Sio ʼe Fakamaʼamaʼa ʼi He Mālama ʼe Puleʼi e Te Kovi,” ʼe ina fakatokagaʼi mai anai te ʼu meʼa ʼaē ʼe feala ke mafasia ai totatou maʼuli pea mo nātou taʼomia māmālie totatou maʼuli fakalaumālie. ʼE tou toe vakaʼi ai anai pe koteā tona faka ʼuhiga ke tou filifili ia “te vahe ʼaē ʼe lelei.”—Luka 10:42, MN.
ʼE lava fakaloto mālohiʼi feafeaʼi e te ʼu mātuʼa pea mo te ʼu tēhina mo tuagaʼane ia te kau tūpulaga Kilisitiano ke nātou leleiʼia te ʼu meʼa fakalaumālie? ʼI te ʼu akonaki ʼaē ko tona kupu tāfito “Ko He ʼu Mātuʼa ʼe Nātou Fakahaga Lelei Tanatou ʼu Kauʼi Nahau” pea “Ko He Kau Tūpulaga ʼe Nātou Fai Tanatou ʼu Fakatuʼutuʼu Fakalaumālie,” ʼe tou logo ai anai ki te ʼu fakamatala ʼa te ʼu mātua pea mo te ʼu tūpulaga ʼo ʼuhiga mo te faʼahi maʼuhiga ʼaia. (Pes. 127:4) Ko te akonaki fakaʼosi ʼa te tēhina ʼaē ʼe ina ʼaʼahi te fakatahi, ʼe talanoa anai peʼe feafeaʼi hatatou haʼele fakatahi mo te kautahi ʼa Sehova, ʼi totatou ʼuhiga takitokotahi, ʼi te maʼuli faka famili, pea mo te kokelekasio.
ʼE maʼuhiga ke tou ‘fakamaʼamaʼa tatatou sio,’ tatau aipe peʼe heʼeki fualoa tatatou ʼi te moʼoni peʼe kua fualoa hatatou tauhi kiā Sehova. Pea ko te polokalama ʼo te fakatahi makehe ʼaho tahi, ʼe tokoni mai anai kiā tatou ke tou fakahoko ia te faʼahi ʼaia.