Te ʼu Fakatuʼutuʼu ʼAoga Kia Nātou ʼe Foʼofoʼou Pea Mo Te ʼu Minisi Faiva
1 Neʼe fai e te tagata fai pesalemo ko Tavite te fehuʼi ʼaenī: “ ʼE Sehova, ko ai anai ka nofo ʼi tou fale fehikitaki? Ko ai anai ka nofo ʼi tou moʼuga maʼoniʼoni?” Neʼe tali e Tavite ʼaki te ʼu palalau neʼe fili fakalelei: “Ko ʼaē ʼe haʼele fakahagatonu pea mo maʼuliʼi te faitotonu pea mo palalau ki te moʼoni.” (Pes. 15:1, 2) Ko te ʼu fakatuʼutuʼu ʼaia mole heʼeki fetogi. Ia ʼaho nei ko nātou fuli ʼaē ʼe ʼomai ki te kokelekasio faka kilisitiano ʼe tonu ke nātou līaki tanatou ʼu aga heʼeʼaoga pea mo te ʼinu kava fakavale. ʼE mole ʼi ai he lapalasi ʼi te hahaʼi ʼa Sehova maʼa nātou ʼaē ʼe fia fuhu, peʼe ko nātou ʼaē ʼe aga mālohi, peʼe ko nātou ʼaē ʼe palalau kovi. Tatau aipe peʼe ko te ʼu minisi foʼou peʼe ko te hahaʼi faiva, ʼe tonu ke tou agatonu ʼo taupau maʼu te ʼu fakatuʼutuʼu ʼe hinoʼi mai e te Folafola ʼa te ʼAtua. — Kal. 5:19-21.
2 Tokolahi te hahaʼi foʼou kua fakatahi mai ki te kautahi ʼa Sehova. Ko te ʼu tūpulaga ʼo feiā aipe mo te hahaʼi matutuʼa kua fetogi tanatou fakakaukau ʼo nātou mulimuli ki te ʼu fakatuʼutuʼu ʼa te ʼAtua ʼi tonatou maʼuli. Ko te tūpulaga ʼi te potu toga ʼo Amelika neʼe lahilahi age ia neʼe mole ina maʼu te taki ʼa tana ʼu mātuʼa pea neʼe tuputupu ia ia te ʼu fihifihia. ʼI tona taʼu 18, neʼe popūla ia ki te toloke pea neʼe pilisoni foki ia ʼuhi ko tana kaihaʼa moʼo faka fealagia ʼo tona maʼuli popūla. Kae ʼi tana ako te Tohi-Tapu, neʼe tuku ai leva tana faka kaugā mo tona ʼu kaumeʼa ʼāfea, ʼo ina maʼu tona ʼu kaumeʼa foʼou ʼi te kau Fakamoʼoni ʼa Sehova, pea kua foaki tona maʼuli ki te ʼAtua.
3 ʼO feiā pe mo tatou, ʼe tonu ke tou faiga fakamalotoloto ke leleiʼia tatou e te ʼAtua ʼi tatatou aga katoa, “ ʼi he faitotonu pea mo he agatonu”. (Ef. 4:24.) ʼE fakamaʼuaʼi tatou ke “huʼi ia te ʼuhigaʼi tagata ʼāfea mo tana ʼu aga” pea ke tou “kofuʼi [ʼe tatou totonu] te ʼuhigaʼi tagata foʼou, ʼaē ʼe fakafoʼou, ʼaki te mālama totonu” mokā ʼe tou fia nonofo ʼi te kautahi ʼa te ʼAtua ʼaē ʼe hage ko he moʼuga. — Kol. 3:9, 10.
4 Ko te Folafola ʼa te ʼAtua ʼe mālohi ʼaupito: Ko te natula ʼo Sehova ohage ko tana fakahā mai ʼi te Tohi-Tapu ʼe feala ke uga mālohi ai ʼatatou manatu pea mo ʼatatou ʼu aga ʼi he ala ʼe lelei (Lom. 12:2). Ko tana Folafola ʼe ʼi ai te mālohi moʼo fetogi ʼo te fakakaukau pea mo tokoni ki ʼotatou mamahi (Hep. 4:12). ʼE akoʼi mai e te Tohi-Tapu ko te finegalo ʼo Sehova ʼe ina fakamaʼuaʼi ke tou maʼuli ʼaki te aga ʼaē ʼe totonu, ke tou kau katoa ki te minisitelio, pea ke ʼaua naʼa tou loto noa ʼo ʼuhiga mo te ʼu fono faka kilisitiano.
5 ʼI te ʼu temi faigataʼa ʼaenī, ko te tuputupu ʼo te ʼu fihifihia ʼe feala ke ina uga he kilisitiano ke lituʼa ki te ʼu lao ʼa te ʼAtua. Kapau ko te ako takitokotahi, ko te ako faka famili, ko te ʼu fono ʼi te kokelekasio, peʼe ko te minisitelio ʼe tōtō tona fai, tatau aipe pe ko he kilisitiano neʼe mālohi ʼe feala ke mamaʼo mai te tui, lagi ʼi hana fai he aga ʼe kovi. Ko ia ʼaē neʼe faitohi ai Paulo kia Timoteo: “Ke ke tokaga tuʼumaʼu kia koe, pea mo tau faiako.” pea, “Manatu tuʼumaʼu ki te meʼa neʼe ʼau talanoa ki ai.” — 1 Tim. 4:16; 2 Tim. 2:7.
6 Peʼe tou foʼofoʼou peʼe tou faiva ʼuhi ko te ʼu meʼa ʼaē neʼe hoko ʼi te lolotoga ʼo totatou maʼuli, ʼe tonu ke tou taupau maʼu te ʼu fakatuʼutuʼu ʼa te ʼAtua ke mālama lelei kia tatou, ke tou fuafua fakalelei totatou minisitelio, pea mo tou taupau maʼu tatatou ʼamanaki ke mālohi mo kapau ʼe tou fia hāofaki totatou maʼuli (1 Pe. 1:13-16). ʼI te ʼaho fuli pe, ko te muliʼi ʼo te faitotonu ʼa te ʼAtua ʼe ko te fakatuʼutuʼu tāfito ʼaia ʼe tonu ke fai.
7 Fai hakotou fakatuʼutuʼu ke koutou kau ki te gāue faka mafola lolotoga te māhina fakaʼosi ʼaenī ʼo te taʼu gāue 1993. Ke tou faiga ʼo tokoni ki niʼihi ke lahi tanatou tui pea mo fakatuputupu tanatou gāue ʼi te minisitelio (Lom. 1:12). Ke tuku ʼakotou ʼu manatu ki te ʼu meʼa ʼaē ʼe totonu ʼaki te fai tuʼumaʼu ʼo te ako takitokotahi , he ako faka famili, pea mo kau ki te ʼu fono (Filp. 4:8). Ko ʼakotou faiga ke leleiʼia koutou e te ʼAtua ʼo koutou mulimuli ki tana ʼu fakatuʼutuʼu ʼe mole ū anai. — Kol. 3:23, 24.