Tou Kumi Fakalelei He ʼu Ako Faka Tohi-Tapu
1 ʼE hoko te tuputupu moʼoni ʼo ʼuhiga mo te mālama ʼāfea ʼaenī ʼe lolotoga maumau (2 Tim. 3:1-5). Koteā koa tona faka ʼuhiga? Ko tona ʼuhiga ko te maʼuli ʼo te hahaʼi ʼe tau mo he faʼahi fakatupu tuʼutāmaki. Koia, ʼe ia tatou te fealagia ke tou tokoni ki niʼihi ke nātou maʼu te maʼuli (Tāʼaga Lea 3:27). ʼO ʼuhiga mo te faʼahi ʼaia, ʼe tonu ke tou faiga fakamalotoloto ʼo kamata he ʼu ako faka tohi-tapu.
2 ʼE lahi te ʼu meʼa lelei neʼe fakahoko ʼaki te tufa ʼo ʼatatou ʼu tohi faka tohi-tapu. Kae ʼe ʼaoga ʼaupito ki te hahaʼi he tokoni takitokotahi ʼaki he ako tuʼumaʼu ʼo te Tohi-Tapu. ʼE feafeaʼi hatatou tokoni kia nātou ke nātou leleiʼia te ʼu ako faka tohi-tapu?
3 ʼE feala ke tou lagaʼi he ʼu fehuʼi ʼe ʼaoga ki te hahaʼi tokolahi. Ko te ʼu taʼi fehuʼi ʼaia ʼe feala ai ke ina fakahā mai pe koteā tana manatu ʼo ʼuhiga mo te kua mālohi ʼaē ʼo te līaki ʼo te ʼu aga ʼaē ʼe tonu ke fai, pe koʼe ʼe haʼele kovi te maʼuli faka famili, pe koʼe ko te aga mālohi pea mo te fai fakapō ʼe ko he tuʼutāmaki, pe koʼe ʼe fakagafua e te ʼAtua ʼofa te ʼu faʼahiga meʼa ʼe hoko ʼi te temi nei, pea mo ʼihi atu meʼa. Ke tou tokaga ki te ʼu alatike pea mo te ʼu logo ʼaē ʼe fia logo tāfito ki ai te hahaʼi ʼi totatou telituale. Tou fakahā age te ʼu tali ʼa te Tohi-Tapu ki te ʼu fehuʼi ʼaia. Tou fakahā age peʼe feafeaʼi te tokoni ʼa te tohi ʼaē ʼe tou tuku ke nātou akoʼi te meʼa ʼe feala ke tokoni kia nātou ke nātou mahino neʼe talanoa te Tohi-Tapu ki te ʼu faʼahi ʼaia pea mo ʼihi age pe ʼu meʼa maʼuhiga ʼe malave kia tatou fuli.
4 ʼE maʼuhiga ke tou fakakau ia ia ʼaē ʼe felogoi mo tatou ki te fai palalau. Tou fakasiosio lelei te ʼu meʼa ʼe ʼaoga ki ai. Faigaʼi tatatou fai palalau ʼo mulimuli ki te meʼa ʼaē ʼe fia logo ki ai peʼe ko tana ʼu tuʼania. Fakahā age he manatu ʼo he tohi, he kaupepa lahi, he nusipepa, peʼe ko he kiʼi pepa lotu ʼe ina fakamahino te puleʼaki ʼa te Tohi-Tapu ʼo ʼuhiga mo te ʼu faigataʼaʼia ʼo te malamanei. ʼI muʼa ʼo te mavete, lagaʼi he fehuʼi e tahi peʼe lua ʼe koutou fia fakatafito anai ki ai te ʼaʼahi ki muli age. ʼI takotou toe liliu ki ai, koutou fakamanatuʼi age te ʼu fehuʼi ʼaia, pea koutou fakaʼaogaʼi te tohi moʼo tokoni ki ai ke ina maʼu te ʼu tali ʼi te Tohi-Tapu.
5 Ko tatatou kamata te ʼu ako pea mo fai tuʼumaʼu ʼe tokoni ai ki te hahaʼi ke fetogi tonatou maʼuli. ʼE ʼaoga ke tou fakahā hatatou tokaga moʼoni ʼo ʼuhiga mo te ʼu meʼa ʼe ʼaoga kia nātou ʼaē ʼe felāveʼi mo tatou ʼi te gāue faka mafola peʼe ko te fagonogono faigamalie. ʼE fakamaʼuaʼi tatou ke tou teuteu lelei moʼo uga mamalie ʼo tanatou fia logo. ʼE fakamaʼuaʼi tatou ke tou faʼa kātaki ʼo fai he ʼu ʼaʼahi moʼo fafaga faka laumālie ʼo nātou. ʼE fakamaʼuaʼi tatou ke tou ʼoʼofa ki te hahaʼi. ʼE tonu ke tou loto fakamalotoloto ʼo tokoni kia nātou ke nātou hāo mai te faka ʼauha kua ōvi mai. Ko tatatou gāue ʼo ʼuhiga mo te ʼu ako faka tohi-tapu ʼe tonu anai ke fai tuʼumaʼu pea mo faikole fakamalotoloto ʼo ʼuhiga mo te faʼahi ʼaia. — 1 Tes. 5:17.
6 ʼE fakaloto mālohi te hā mai neʼe teitei miliona te hahaʼi neʼe papitema ko he ʼu tisipulo ʼi te ʼu taʼu e tolu kua hili (Mat. 28:19, 20). ʼE tou fai ʼi te temi nei te ʼu ako faka tohi-tapu e fā miliona tupu ʼi te māhina fuli, pea ʼe hā ʼaki mai ai tatatou tokaga ʼaē ki te maʼuli ʼo te hahaʼi. Koteā ʼaē ʼe koutou fai? Neʼe koutou faiga fakamalotoloto koa ke koutou kau ki te gāue ʼo ʼuhiga mo te ʼu ako faka tohi-tapu ʼi te ʼu api? Koutou manatuʼi, ko totatou maʼuli pea mo te maʼuli ʼo te hahaʼi ʼe fakalogo tāfito ki tatatou agatonu ʼo ʼuhiga mo te faʼahi ʼaia. — Esk. 3:17-19.