ʼUluaki Koga: Tou Fai He ʼu Ako Tohi-Tapu ʼe Tuputupu
Koteā Te Ako Tohi-Tapu?
1 ʼI te malamanei katoa, ko te teitei ono miliona ako Tohi-Tapu ʼe fai e te hahaʼi ʼa te ʼAtua ʼi te māhina fuli. Kapau ʼe lelei tatatou faʼahiga faiako, pea ʼe tou lava tokoni anai ki te kau ako Tohi-Tapu ʼaia ke nātou tuputupu ʼo aʼu ki tanatou foaki tonatou maʼuli pea mo papitema pea ke nātou “maʼu te ʼu kalitate moʼo akoʼi ʼo ʼihi.” (2 Tim. 2:2, MN ) ʼE koutou fia tokoni koa kia ia ʼaē ʼe ako mo koutou ke tuputupu? ʼO kamata ʼaki te alatike ʼaenī, ʼe fakahā anai ʼi Te Minisitelio ʼo Te Puleʼaga he ʼu alatike ʼe fakamahino mai anai te ʼu manatu tāfito moʼo fai he ʼu ako Tohi-Tapu ʼe tuputupu.
2 Te Temi ʼAē ʼe Tonu Ai Ke Tohi Ki He Pepa Tānaki Ako: ʼE lau ko he ako Tohi-Tapu, mo kapau ʼe koutou fai palalau tuʼumaʼu mo he tahi ki te Tohi-Tapu pea mo fai hoholo, tatau aipe peʼe nounou, pea mo koutou fakaʼaogaʼi te Tohi-Tapu pea mo he tohi ʼe fai kiai te ako. ʼE toe lau ko he ako Tohi-Tapu, tatau aipe peʼe fai ʼi te matapā peʼe ʼi te telefoni. ʼE feala ke tohi ʼe ko he ako mo kapau ʼe kua fai tuʼa lua ʼi te ʼosi fakahāhā age te faʼahiga fai ʼo te ako pea mo kapau ʼe tou tui ʼe hoko atu anai te ako.
3 Ko te kaupepa Fakamaʼua pea mo te tohi Te ʼAtamai Mālama ʼe ko te ʼu tohi ʼaē ʼe fakaʼaogaʼi moʼo fai te ʼu ako Tohi-Tapu. ʼI te kua ʼosi fai fuli ʼo te ʼu tohi ʼaia, kapau ʼe hā te tuputupu ia ia ʼe ako, tatau aipe peʼe māmālie, pea mo ina leleiʼia te meʼa ʼaē ʼe ina ako, pea ʼe feala ke hoko atu te ako ʼi te tohi Atolasio Ki Te ʼAtua. Ko te kaupepa lahi ʼE Koutou Lava Kaumeʼa Mo Te ʼAtua! ʼe feala ke fai ʼaki te ako ʼa te hahaʼi ʼaē neʼe mole ako pea ʼe mole popoto ʼi te lautohi.
4 ʼE fua lelei te ʼu ako Tohi-Tapu he neʼe tokoni ki te ʼu lauʼi miliona hahaʼi ke nātou liliu ko he ʼu tisipulo moʼoni ʼa Sesu Kilisito. (Mat. 28:19, 20) Kapau ʼe koutou maʼuliʼi te ʼu tokoni ʼaē ʼe foaki atu ʼi te ʼu alatike ʼaē ka hoko mai, pea ʼe feala ke koutou fai he ako Tohi-Tapu ʼe tuputupu.