Te Tohi Te Ako Mai Te Tohi-Tapu—Te Tohi Tāfito Moʼo Fai ʼAki Te ʼu Ako Tohi-Tapu
1 Neʼe tou fiafia ʼaupito ʼi tatatou maʼu te tohi Koteā ʼAē ʼe Akoʼi Moʼoni Mai ʼi Te Tohi-Tapu?, ʼi te Fakatahi Faka Tisitilike ʼaē neʼe ko tona kupu tāfito “Te Fakalogo Ki Te ʼAtua.” Neʼe fiafia te nofoʼaki ʼi te tufa age ʼo tanatou tohi ʼi te fakaʼosi ʼo te polokalama ʼo te Moeaki. ʼE tou lava fakaʼaogaʼi feafeaʼi anai te tohi foʼou ʼaia? Neʼe fakatuʼutuʼu ke fakaʼaogaʼi tāfito te tohi ʼaia moʼo fai te ʼu ako Tohi-Tapu. Logola ʼe tou tufa anai te tohi foʼou ʼaia ʼi Malesio, kae ʼe fakaloto mālohiʼi te ʼu kaugā fai faka mafola ke nātou fakaʼaogaʼi te tohi ʼaia ʼi te temi nei moʼo kamata pea mo fai ʼo he ʼu ako Tohi-Tapu.
2 Te ʼu Ako Tohi-Tapu ʼAē ʼe Fai ʼi Te Temi Nei: Ko te kau fai faka mafola ʼaē ʼe nātou fai he ʼu ako Tohi-Tapu ʼaki te tohi ʼAtamai Mālama peʼe ko te kaupepa lahi Fakamaʼua, ʼe tonu ke nātou fakasiosio lelei, peʼe feafeaʼi anai hanatou fakaʼaogaʼi ia te tohi foʼou ʼaia ʼi te ako pea ko te temi fea ʼaē ka nātou kamata fakaʼaogaʼi anai te tohi ʼaia. Kapau neʼe hoki kamata pe te ako Tohi-Tapu, pea ʼe feala ke koutou kamata mai te kamataʼaga ʼo te tohi foʼou. Kapau kua lakalaka ki muʼa takotou ako ʼi te tohi ʼAtamai Mālama, pea ʼe lagi feala ke koutou vakaʼi ʼi te tohi Te Ako Mai Te Tohi-Tapu ia te kapite ʼaē ʼe ʼalutahi mo te kapite ʼaia,ʼo hoko atu ai takotou ako. Kapau kua vave ʼosi takotou ako ʼi te tohi ʼAtamai Mālama, ʼe lagi koutou fia hoko atu anai ʼo aʼu ki tona fakaʼosi.
3 ʼE mahino ia ʼe lahi te ʼu hahaʼi ʼe tou ʼiloʼi ʼe ʼaoga anai kiā nātou te ako ʼo te tohi Te Ako Mai Te Tohi-Tapu. He koʼe ʼe mole koutou fakaafe te hahaʼi fuli ke nātou fai hanatou ako Tohi-Tapu ʼaki te tohi ʼaia ʼaē ʼe fakahā māmālie ai te ʼu moʼoni ʼo te Tohi-Tapu? Ohage la, ko nātou ʼaē neʼe nātou ako te kaupepa Fakamaʼua peʼe ko te tohi ʼAtamai Mālama, kae neʼe mole nātou tuputupu ʼo aʼu ki te papitema, ʼe lagi nātou loto anai ke toe kamata tanatou ako ʼaki te tohi foʼou ʼaia. ʼE feala ke fakatotonu e te ʼu mātuʼa ke nātou fakaʼaogaʼi te tohi ʼaia ʼi tanatou akoʼi ki tanatou fānau ia te ʼatamai mālama ʼo ʼuhiga mo te finegalo ʼo te ʼAtua.—Kol. 1:9, 10.
4 Te Ako ʼo He Tahi Tohi: ʼE ʼi ai koa he fakatuʼutuʼu maʼa he tahi ʼe ina ako te Tohi-Tapu, ke ina ako he tahi tohi mokā kua ʼosi tana ako ʼi te tohi Koteā ʼAē ʼe Akoʼi Moʼoni Mai ʼi Te Tohi-Tapu? Ei. Kapau ʼe hā te tuputupu ʼo te ako ʼaia, tatau aipe peʼe tuputupu māmālie, kae ʼe loto fakafetaʼi ki te ʼu meʼa ʼaē neʼe ina ako, pea ʼe feala ke hoko atu tana ako ʼaki te tohi Koutou Atolasio Ki Te ʼAtua Moʼoni Pe e Tahi. ʼE tou tui papau ko te tohi Te Ako Mai Te Tohi-Tapu ʼe ko he meʼa gāue mālohi anai ʼe tou fakaʼaogaʼi moʼo fakahoko te fakatotonu ʼaē ke tou fai ʼo ni ʼu tisipulo.—Mat. 28:19, 20.