Tou Fai He ʼu Ako Tohi-Tapu ʼAki Te Tohi Atolasio Ki Te ʼAtua

Neʼe fai te tohi Koutou Atolasio Ki Te ʼAtua Moʼoni Pe e Tahi moʼo tokoni kia nātou ʼaē ʼe foʼofoʼou ke nātou tuputupu ʼi te moʼoni pea mo lahi age tonatou loto fakafetaʼi kia Sehova pea mo tana kautahi. ʼE ko he lua tohi ʼe feala ke tou fakaʼaogaʼi mo hoko atu te ʼu ako Tohi-Tapu. ʼI Te Minisitelio ʼo Te Puleʼaga ʼo Sūnio 2000, ʼi te pasina 4, neʼe fakamahino fēnei: “Kapau ʼe hā lelei ko he tahi ʼe tuputupu ʼi tana ako, tatau aipe peʼe tuputupu māmālie, pea ʼe tuputupu tana leleiʼia ia te ʼu meʼa ʼaē ʼe ina ako, pea koutou hoko atu tana ako Tohi-Tapu ʼi te tahi tohi, kapau kua ʼosi ina ako te kaupepa Fakamaʼua pea mo te tohi Te ʼAtamai Mālama. . . . Ko te meʼa ʼaē ʼe maʼuhiga, ʼe tonu muʼa ke ʼuluaki ako te kaupepa Fakamaʼua pea mo te tohi Te ʼAtamai Mālama. Ko te ako Tohi-Tapu, te ʼu ʼaʼahi, pea mo te temi ʼaē ʼe koutou fakaʼaogaʼi moʼo hoko atu te ako, ʼe tonu ke koutou tohi ʼi takotou pepa tānaki gāue, tatau aipe pe kua papitema ia ia ʼaē ʼe ako, ka heʼeki katoa tana ako te lua tohi.”

Ko ai koa ʼaē ʼe feala ke toe ʼaoga ki ai ia te ako ʼo te tohi Atolasio Ki Te ʼAtua? ʼE toe hoko atu fēnei e te alatike pe ʼaia: “Kapau ʼe koutou ʼiloʼi he ʼu hahaʼi neʼe nātou ako ki muʼa atu [te kaupepa Fakamaʼua pea mo] te tohi Te ʼAtamai Mālama, kae neʼe mole heʼeki nātou aʼu ki te foaki ʼo tonatou maʼuli ki te ʼAtua pea mo papitema, ʼe lagi koutou fia vakaʼi anai peʼe nātou toe fia fai tanatou ako Tohi-Tapu.” Tou faiga tāfito ke tou kamata he ʼu ako Tohi-Tapu ʼaki te tohi Atolasio Ki Te ʼAtua mo te ʼu hahaʼi ʼaia lolotoga te māhina ʼaenī.