Ko He Manatu Foʼou ʼo ʼUhiga Mo Te Fai ʼo He ʼu Tisipulo Foʼou
1 ʼI muʼa ʼo tana mavae ʼi te kele, neʼe fakatotonu e Sesu ki tana kau tisipulo ke nātou “fai ni ʼu tisipulo ʼi te hahaʼi ʼo te ʼu fenua fuli pe.” Neʼe maʼua ai ke nātou gāue kinakina ʼi te fai faka mafola pea mo te faiakonaki, pea ke nātou fakaaʼu tanatou gāue ki te potu fuli pe ʼo te kele. (Mateo 28:19, 20; Gāue 1:8) Neʼe nātou faka ʼuhiga koa te gāue ʼaia ʼe ko he kavega neʼe mamafa fau tanatou ʼamo? Kailoa, ohage ko tona hā ʼi te ʼu palalau ʼa te ʼapositolo ko Soane. ʼI tana ʼosi fai ni ʼu tisipulo lolotoga taʼu e 65, neʼe ina tohi fēnei: “Koʼeni te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole mamafa.”—1 Soane 5:3.
2 ʼE fakahā mai e te fakamatala ʼo te Tohi-Tapu ʼo ʼuhiga mo te gāue ʼa te ʼu ʼuluaki Kilisitiano, neʼe nātou gāue fakamalotoloto moʼo fakahoko tonatou maʼua ʼaē ke nātou fai he ʼu tisipulo ʼa Sesu Kilisito. (2 Tim. 4:1, 2) Neʼe mole nātou faka ʼuhiga te faʼahi ʼaia ohage pe ko he fakamaʼua, kae neʼe nātou fai ʼuhi ko tanatou fia fakavikiviki ki te ʼAtua pea mo tanatou fia fakahā ki te hahaʼi te ʼamanaki ʼo ʼuhiga mo te fakamaʼuli. (Gāue 13:47-49) Ko nātou fuli ʼaē neʼe liliu ko he ʼu tisipulo neʼe toe kau mo nātou ki te fai ʼo ni ʼu tisipulo, koia ʼaē neʼe vave ai te tuputupu ʼo te kokelekasio faka Kilisitiano ʼi te ʼuluaki sēkulō.—Gāue 5:14; 6:7; 16:5.
3 Kua Fakavave Te Gāue ʼAē Ko Te Fai ʼo Ni ʼu Tisipulo: ʼI te 20 sēkulō ʼaenī, ʼe lolotoga fai te gāue ʼe lahi tokotahi moʼo fai ni ʼu tisipulo! Kua toko lauʼi miliona te hahaʼi ʼaē kua nātou tali te logo lelei pea mo mulimuli kiai. (Luka 8:15) ʼI te kua nounou ʼo te temi ʼo te tuʼu ʼo te ʼu faʼahiga meʼa ʼaenī, ko “te tagata kaugana agatonu mo poto” ʼe ina foaki mai kia tatou te ʼu meʼa ʼaē ʼe ʼaoga moʼo faka fealagia ki te hahaʼi fakamalotoloto ke nātou ako fakavilivili te moʼoni.—Mateo 24:45.
4 ʼI te taʼu 1995, neʼe tou maʼu ai te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, pea ʼi te taʼu 1996 neʼe muli mai kiai te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? ʼO ʼuhiga mo te tohi Te ʼAtamai Mālama, neʼe ʼui fēnei e Te Tule Leʼo ʼo te ʼaho 15 ʼo Sanualio 1996, ʼi te pasina 14: “Ko te tohi ʼaia ʼe pasina 192 ʼe feala ke ako ʼi he kiʼi temi nounou, pea ko nātou ʼaē ‘ ʼe lotolelei ki te maʼuli heʼegata’ ʼe tonu anai ke feʼauga te ʼu meʼa ʼaē ʼe nātou ako lolotoga tanatou ako, ke feala ai hanatou foaki tonatou maʼuli kia Sehova pea mo nātou papitema.”—Gāue 13:48.
5 Ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ʼaē ko tona kupu tāfito ʼaenī “E Feafeaʼi Hatatou Fai He ʼu Tisipulo ʼAki Te Tohi Te ʼAtamai Mālama,” neʼe ina tuku mai te fakatuʼutuʼu ʼaenī: “Ko te kau ako Tohi-Tapu ʼe nātou tuputupu lelei anai mo kapau ko ia ʼaē ʼe ina fai te ako pea mo ia ʼaē ʼe ako ʼe nā fakatuʼutuʼu ke fai tuʼumaʼu te ako ʼi te vāhaʼa fuli.” Neʼe hoko atu fēnei te alatike: “ ʼAki te temi, ʼe tonu kia ia ʼaē kua ʼosi tana ako te tohi Te ʼAtamai Mālama, ke hā tana faiga fakamalotoloto pea mo te loloto ʼo tana fia tauhi ki te ʼAtua.” ʼI te alatike Te Tali Ki ʼAkotou ʼu Fehuʼi ʼo Te Minisitelio ʼo Te Puleʼaga ʼo ʼOketopeli 1996, neʼe ʼui fēnei ai: “ ʼE tou fakaʼamu ki he tahi ʼe faiva ʼi te faiako, ke feala ʼi he kiʼi temi nounou, ke tokoni kia ia ʼaē ʼe ako, ke ina maʼu he ʼatamai mālama feʼauga moʼo fai ʼo he tonu fakapotopoto ke tauhi ai kia Sehova.”
6 ʼE Fua Lelei Te Tohi Te ʼAtamai Mālama: Neʼe papitema te finemui, pea neʼe ina fakamatala te ʼu meʼa ʼaē neʼe ina logoʼi ʼi tana ʼosi ako te tohi Te ʼAtamai Mālama. Lolotoga he temi loaloaga, neʼe ina ako te tohi Mauli Heegata. ʼI te temi ʼaē neʼe tā ai te tohi Te ʼAtamai Mālama, ko te tuagaʼane ʼaē neʼe ina fai tana ako neʼe ina fakaʼaogaʼi te tohi foʼou ʼaia. Mole tuai, pea neʼe mahino ki te finemui ʼaia, ʼe tonu anai ke ina fai he tonu ʼo ʼuhiga mo ia, pea talu mai ai, neʼe holi mālohi ke tuputupu vave ʼi te faʼahi fakalaumālie. Ko te finemui ʼaia, ʼaē kua papitema ʼi te temi nei, ʼe ina ʼui fēnei: “Ko te tohi Mauli Heegata neʼe tokoni kia ʼau ke ʼau ʼofa kia Sehova, kae ko te tohi Te ʼAtamai Mālama neʼe tokoni mai kia ʼau ke ʼau fai te tonu ʼaē ke ʼau tauhi ki ai.”
7 Koutou fakatokagaʼi te tuputupu vave ʼa te tahi fafine ʼi tana ako te moʼoni. ʼI te ʼosi fai ʼo tana lua ako, neʼe kau ki te fono ʼi te Fale ʼo te Puleʼaga ʼi te lolotoga ʼo te vāhaʼa makehe. ʼI te vāhaʼa pe ʼaia, ʼi tana tolu ako, neʼe ina ʼui age ki te tēhina taupau faka silikosikilipisio, kua ina foaki tona maʼuli kia Sehova pea kua fia fai faka mafola. Neʼe fai palalau mo te kau tagata ʼāfea ʼo nātou fakagafua kia ia ke fai faka mafola, pea neʼe ina kamata ʼi te vāhaʼa ʼaē neʼe hoa kiai. ʼI te lahi ʼo tana fia ako, neʼe ina kole ki tona patolo he ʼu ʼaho mālōlō ke feala hana ako tuʼa lua peʼe tuʼa tolu ʼi te vāhaʼa, pea mo fakaʼaogaʼi he temi lahi ki te minisitelio. ʼI ʼihi lakaga, neʼe nā ako kapite e lua peʼe tolu ʼi te ʼaho pe e tahi. Neʼe ina kamata maʼuliʼi te ʼu meʼa ʼaē neʼe ina ako ʼi te ʼu faʼahi fuli ʼo tona maʼuli, ʼo ina ako katoa te tohi Te ʼAtamai Mālama ia vāhaʼa e fā, pea neʼe tuputupu ʼo aʼu ki tona papitema!
8 Ko te ʼohoana ʼo te tuagaʼane neʼe ina ʼui, ʼe “mole ko he tagata tui.” ʼI te tahi ʼaho, neʼe kole age e te tēhina kia ia peʼe ina fia fai hana ako Tohi-Tapu ʼaki te tohi Te ʼAtamai Mālama, pea ʼe feala anai ke ina fakagata te ako ʼaia ʼi te ʼosi ʼo tana ʼuluaki ako peʼe ki muli age. Neʼe tali lelei e te tagata ʼaia, logope la neʼe mole faʼa lahi te ʼu meʼa ʼaē neʼe ina ako ʼi te faleako, pea neʼe mole ina lau he tohi faka lotu talu mai taʼu e 20. Koteā tana manatu ʼi tana ako te tohi Te ʼAtamai Mālama? Neʼe ina ʼui fēnei: “Neʼe ʼau fiafia ʼi taku sio ʼaē ʼe mahino gafua te tohi ʼaia. ʼI te lelei ʼo te fakamahino ʼo te ʼu meʼa ʼaē ʼe tuʼu ʼi te tohi, mole tuai pea neʼe ʼau fakaʼamu ai ke ʼau ako tuʼumaʼu he kapite foʼou. Ko te tēhina ʼaē neʼe ina fai taku ako, neʼe mulimuli fakalelei ki te ʼu fakatuʼutuʼu ʼaē ʼe tuku mai e te Sosiete ʼo ʼuhiga mo te fai ʼo ni ʼu tisipulo, pea ʼaki te tokoni ʼo te laumālie ʼo Sehova, neʼe ʼau papitema hili kiai māhina e fā. ʼE moʼoni, kapau ʼe tou manako ki te gāue ʼaē ko te fai ʼo ni ʼu tisipulo, mo tou haga kumi te hahaʼi fakamalotoloto ʼi te minisitelio, mo tou fakaʼaogaʼi te tohi Te ʼAtamai Mālama pea mo te tahi ʼu tohi ʼaē ʼe foaki mai e te Sosiete, mo tou fakahoko te faʼahi tāfito ʼaenī ʼaē ko te faikole kia Sehova ke ina takitaki tatou, pea ʼe feala anai hatatou maʼu te pilivilesio ʼaē ke tou fai ni ʼu tisipulo.” Ko te ʼu fakamatala ʼaia neʼe tou vakaʼi ʼe lelei ʼaupito. Kae ko te tokolahi ʼo nātou ʼaē ʼe ako ʼe mole nātou tuputupu vave feiā ʼi te moʼoni.
9 ʼE Mole Tatau Fuli Te Kau Ako: ʼE tonu ke mahino kia tatou, ʼe feala ke kehekehe te ʼu fealagia ʼo te ʼu faiako pea mo nātou ʼaē ʼe nātou ako te Folafola ʼa te ʼAtua. Ko te tuputupu ʼi te faʼahi fakalaumālie ʼe feala ke māmālie peʼe vave. Ko ʼihi kau ako, ʼe feala ke vave tanatou tuputupu ʼi he ʼu kiʼi māhina, kae ko ʼihi ʼe loaloaga age. Ko te tuputupu ʼa he tahi ʼi te faʼahi fakalaumālie, ʼe feala ke fakalogo ki te ʼu meʼa ʼaē neʼe ina ako ʼi muʼa atu, peʼe ki tana faʼahiga mahino ki te ʼu meʼa fakalaumālie, pea mo te loloto ʼo tana fia tauhi kia Sehova. Ko te hahaʼi ʼaē ʼe tou ako mo nātou, ʼe mole nātou maʼu fuli te “fia ʼiloʼi ʼaupito” moʼo ako te Tohi-Tapu ʼi te ʼaho fuli, ohage ko te meʼa ʼaē neʼe fai e te kau Pelea ʼaē neʼe nātou liliu ko he ʼu hahaʼi tui.—Gāue 17:11, 12.
10 Ko te tupuʼaga la ʼaia ʼo te ʼui ʼaenī ʼa te pepa ʼaē ʼe ʼalutahi mo Te Minisitelio ʼo Te Puleʼaga ʼo ʼApelili 1998, ko tona kupu tāfito “ ʼE Tou Kumi He ʼu Ako Tohi-Tapu ʼe Lahi Age”: “ ʼE mahino ia, ʼe mole tatau te tuputupu ʼo nātou fuli ʼaē ʼe nātou ako te Tohi-Tapu. Ko ʼihi ʼe mole lahi tanatou tokagaʼi te ʼu faʼahi fakalaumālie pea ko ʼihi ʼe mole nātou maʼuliʼi atu aipe te ʼu meʼa ʼaē ʼe nātou ako. Ko ʼihi ʼe lagi nātou maʼumaʼua ʼaupito pea ʼe mole feʼauga tonatou temi ke nātou vakaʼi he ʼu palakalafe ʼe lahi ʼi te ʼu vāhaʼa fuli. Koia, ʼe lagi tonu anai ke fai liuliuga te ako moʼo fai he kapite pe e tahi, pea ʼe mole feʼauga anai he taʼu katoa moʼo fakaʼosi te ako ʼo te tohi.”
11 Ko Nātou ʼAē ʼe Nātou Fai Ni ʼu Tisipulo ʼe Nātou Aga Fakapotopoto: ʼE tonu ke tou fakafuafua te vave ʼo te ako ʼo mulimuli ki te ʼu fealagia pea mo te ʼaluʼaga ʼo ia ʼaē ʼe ako. Mai tona ʼuhiga ʼaē ʼe fakaloto mālohiʼi tatou ke tou kamata he ʼu ako Tohi-Tapu ʼaki te kaupepa Fakamaʼua, koia ʼe lagi tonu anai ke tou ako ia māhina e lua peʼe tolu ʼi muʼa ʼo te fakaʼaogaʼi ʼo te tohi Te ʼAtamai Mālama. Kapau ʼe tou fakaʼaogaʼi te ʼu tokoni fuli ʼaē neʼe tuku mai ʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, pea ʼe lagi ʼaoga anai ke tou ako lolotoga māhina e ono, peʼe ko he taʼu katoa peʼe laka age moʼo fakaʼosi te ako ʼo te tohi Te ʼAtamai Mālama. Kapau neʼe hoki koutou kamata he ako Tohi-Tapu ʼaki te tohi Te ʼAtamai Mālama, pea ʼe feala ke koutou fakagata te ako ʼi te tohi ʼaia pea mo koutou kamata ʼaki te kaupepa Fakamaʼua, mo kapau ʼe koutou fakatokagaʼi ʼe faigataʼa te tohi kia ia ʼaē ʼe ako. Kae kapau ʼe tuputupu lelei ia ia ʼaē ʼe ako, pea ʼe lagi ʼaoga anai ke koutou ako te kaupepa Fakamaʼua ʼi te ʼosi ako ʼo te tohi, ʼo koutou fakamanatu fakanounou te ʼu moʼoni tāfito ʼo te Folafola ʼa te ʼAtua. Kae ʼi te ʼu ʼaluʼaga ʼaia e lua, ʼe mole tou fia tāʼofi te mahino lelei ʼa he tahi ki te moʼoni ʼuhi pe ko tatatou fia fakaʼosi vave tana ako. ʼE ʼaoga ki te kau ako fuli ke mālohi te tafitoʼaga ʼo tanatou tui ki te Folafola ʼa te ʼAtua.
12 ʼE tou fakatokagaʼi kua nounou te temi, koia ʼe maʼuhiga ʼaupito ai ke tou tokoni ki te hahaʼi ke nātou ʼiloʼi te moʼoni. ʼO hilifaki ki tatatou haga faikole ke tou kamata he ʼu ako Tohi-Tapu foʼou, tou toe faikole foki maʼa nātou ʼaē kua nātou ako mo tatou. Kapau ʼe tou fai te faʼahi ʼaia, pea ʼe tou fakafiafia anai ʼo hoko atu te papitemaʼi ʼo he tahi ʼu tisipulo “ ʼi te ʼu ʼaho fuli pe ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”—Mateo 28:20.