Te Tali Ki ʼAkotou ʼu Fehuʼi
◼ ʼE tonu ke fualoa feafeaʼi te fai ʼo te ako Tohi-Tapu mo he tahi ʼi te tohi Te ʼAtamai Mālama?
ʼE tapuakina e Sehova tana kautahi ia ʼaho nei. ʼE tou sio ki te moʼoni ʼo te faʼahi ʼaia, heʼe ʼi te taʼu fuli ko te lauʼi afe hahaʼi ʼe nātou tali te moʼoni. Ko te tohi ʼo Te ʼAtamai Mālama, ʼe ko he meʼa gāue lelei moʼo fakahoko ʼo te faʼahi ʼaia. Ko te alatike ʼo Te Tule Leʼo ʼo te ʼaho 15 ʼo Sanualio 1996, ʼe ina fakahā ai ko te tohi ʼaia neʼe fai moʼo tokoni ki te kau ako Tohi-Tapu ke nātou tuputupu fakavilivili ʼi te faʼahi fakalaumālie, ʼo lagi feala ai hanatou papitema ʼi te hili kiai ʼo he ʼu māhina.
Ko te tupuʼaga la ʼaia, ʼo te fai e Te Tule Leʼo pe ʼaia ʼi te pasina 17 te tokoni ʼaenī: “Ka ʼosi ako e he tahi te tohi Te ʼAtamai Mālama pea mo papitema, ʼe lagi mole kei ʼaoga ke ina ako he tahi age tohi mo ia.”
ʼE feafeaʼi anai mo kapau ko he tahi ʼe mole heʼeki papitema ʼi tana ʼosi ako te tohi Te ʼAtamai Mālama? Ko Te Minisitelio ʼo Te Puleʼaga 1996 ʼo Sūnio ʼi te pasina 6, ʼi te palakalafe 23, ʼe ina fakamanatuʼi mai te puani ʼaē ʼe tuʼu ʼi Te Tule Leʼo, ʼaē ʼe mole tou toe ako anai he tahi age ʼu tohi mo ia ʼaē ʼe ako, ʼi te ʼosi ʼo te tohi Te ʼAtamai Mālama. ʼE faka ʼuhiga koa te faʼahi ʼaia ʼe mole tou fia tokoni kia ia ʼaē ʼe ako Tohi-Tapu mokā ʼosi tana ako? Kailoa. ʼE tou loto ke mālama te hahaʼi ki te ʼu akonaki tāfito ʼo te moʼoni. Kae, ʼe tou fakaʼamu ke feala he tokoni ʼa he tahi ʼe faiva ʼi te faiako kia ia ʼaē ʼe ako, ke ina maʼu he ʼatamai mālama feʼauga moʼo fai ʼo he tonu fakapotopoto ke tauhi ai kia Sehova ʼi he kiʼi temi nounou. ʼUhi ko tonatou ʼu ʼaluʼaga takitokotahi, ko ʼihi kau ako Tohi-Tapu ʼe lagi nātou loto anai ke mole fai tuʼa tahi te ako ʼi te vāhaʼa.
ʼE mahino ia, ko ʼihi kau ako Tohi-Tapu ʼe nātou tuputupu māmālie anai ʼi ʼihi age. Kae kapau ʼi te ʼosi ʼo te ako ʼo te tohi Te ʼAtamai Mālama, ʼaē ʼe lagi loaloaga fau anai tona fai, ʼe mole heʼeki fai ʼe ia ʼaē ʼe ako he tonu peʼe gāue anai mo te kokelekasio, pea ʼe tonu anai ke palalau te kaugā fai faka mafola mo he tagata ʼāfea ʼo te Komite Gāue ʼo te Kokelekasio ʼo ʼuhiga mo te faʼahi ʼaia. Kapau ʼe pipiki kiai he ʼu faigataʼaʼia ʼi tona maʼuli, ʼe lelei anai ke toe foaki he tokoni ki ai. Ko te faʼahi ʼaia ʼe ʼalutahi mo te fakatuʼutuʼu ʼaē ʼe fakahā ʼi te palakalafe 11 pea mo te 12 ʼi te pasina 17 ʼo Te Tule Leʼo ʼo te ʼaho 15 ʼo Sanualio 1996.
ʼE tonu anai ke uga ia ia ʼaē ʼe ako e tana loto fakafetaʼi ki te ʼu meʼa ʼaē kua mālama kiai ʼo ʼuhiga mo te moʼoni, ke kau ki te ʼu fono faka Kilisitiano. Ko te faʼahi ʼaia ʼe ina fakamoʼoni anai tana fia tauhi ʼaē kia Sehova. Kapau ʼe mole ina fakahā he loto fakafetaʼi ki te ʼu meʼa fakalaumālie ʼaia, ʼi tana ʼosi ako te tohi Te ʼAtamai Mālama lolotoga he temi, pea ʼe lagi lelei anai ke fakagata te ako.