Koutou Teuteuʼi Te Fakahāhā ʼo Takotou ʼu Nusipepa
1 ʼE tou leleiʼia te ʼu nusipepa ʼo Te Tule Leʼo pea mo te Réveillez-vous! ʼaē ʼe tou maʼu tautonu pea mo tona ʼu alatike lelei ʼaē ʼe tou maʼu ai, heʼe talanoa ki te ʼu meʼa ʼaē ʼe hoko ʼi te malamanei pea mo “te ʼu meʼa loloto ʼa te ʼAtua.” (1 Ko. 2:10) ʼE tou manatuʼi fuli te ʼu logo pea mo te ʼu meʼa fakaloto mālohi ʼaē neʼe tou lau ʼi te ʼu nusipepa ʼaia, ʼaē ʼe fakaʼaogaʼi e Sehova moʼo fakahāhā māmālie ʼo te moʼoni. (Taag. 4:18) ʼE tou fakaʼamu ke lahi tatatou tufa te ʼu nusipepa ʼaia.
2 Koutou Sivi Fakalelei Tokotou Telituale: E feafeaʼi te hahaʼi ʼaē ʼe nonofo ʼi tokotou kolo? Kapau ʼe nātou fakavilivili tuʼumaʼu, pea ʼe tonu ke koutou teuteuʼi he faʼifaʼitaki ʼe nounou pea mo matala lelei. Pea kapau ʼe mole feiā te hahaʼi ʼi tokotou telituale, ʼe feala ke fuafualoa takotou palalau mo nātou. Kapau ʼe tokolahi te hahaʼi ʼaē ʼe gāue, pea ʼe lagi lelei age anai ke koutou ʼaʼahi nātou ʼi te hili hoʼatā peʼe ʼi te afiafi. ʼE feala ke koutou felāveʼi mo niʼihi lolotoga takotou fagonogono ʼi te ala peʼe ʼi te fale koloā. Ko ʼihi kaugā fai faka mafola neʼe nātou maʼu te ʼu fua lelei ʼi tanatou fagonogono faigamālie ʼi te ʼu tauʼaga motokā pea mo te ʼu ʼōloto ʼaē ʼe ʼolo kiai te hahaʼi ʼo mālōlō ai.
3 Koutou Fakamāmāhani Mo Te ʼu Nusipepa: Koutou foimo lau te ʼu nusipepa fuli ʼi te temi pe ʼaē ʼe koutou maʼu ai. Koutou fili he ʼu alatike ʼe koutou manatu ʼe ʼaoga anai ki te hahaʼi ʼo tokotou telituale. Koteā te ʼu alatike ʼaē ʼe ʼaoga kia nātou? Koutou kumi he puani tāfito ʼe feala ke koutou fakaʼaogaʼi ʼi te alatike ʼaē ʼe koutou fakatuʼutuʼu ke koutou fakahā. Koutou fakakaukauʼi he fehuʼi ʼe feala ke koutou lagaʼi ke tupu ai he fia logo ʼa te hahaʼi. Koutou fili he vaega ke koutou lau kia ia ʼaē ʼe palalau mo koutou, mo kapau ʼe maʼu he faigamālie ki te faʼahi ʼaia. Koutou fakakaukauʼi peʼe feafeaʼi te fakahā ʼo te apone pea mo koutou fakatuʼutuʼu he tahi ʼaʼahi.
4 Koutou Teuteuʼi Takotou ʼu ʼUluaki Palalau: Koutou fili fakalelei te ʼu palalau ʼaē ʼe feala ke koutou fakaʼaogaʼi moʼo fakahā ʼo koutou pea mo kamata ʼo te fai palalau. Ko ʼihi neʼe nātou maʼu te ʼu fua lelei ʼaki te ʼu ʼuluaki palalau ʼaenī: “Neʼe ʼau lau te alatike lelei ʼi te nusipepa ʼaenī, pea ʼe ʼau fia fakahā te alatike ʼaia ki te hahaʼi.” ʼE kamata e te tokolahi ʼaki he fehuʼi ʼo fakatafito ki te ʼu puani ʼaē ʼe nātou fakatuʼutuʼu ke nātou fakaʼaogaʼi. Ohage la:
5 Kapau ko he alatike ʼe ina faka maʼuhigaʼi te kua lahi ʼo te fai fakapō, ʼe feala ke koutou fehuʼi age:
◼ “Koteā te meʼa ʼaē ka ina faka fealagia anai kia tatou ke tou momoe ʼi te pōʼuli ʼo mole tou tuʼania naʼa kaihaʼa hatatou meʼa, peʼe hoko kia tatou he tuʼutāmaki?” Koutou fakamahino age ki ai, ʼe koutou fia fakahā age te puleʼaki ʼo ʼuhiga mo te meʼa ʼaē ka ina fakatokatoka anai te fihifihia ʼaia. Ko te puleʼaki ʼaia ʼe ina pulihi anai te tahi ʼu faʼahiga tokakovi faka sosiale kehekehe. Koutou fakaʼaogaʼi he meʼa ʼi te nusipepa ʼe talanoa ki te ʼamanaki ʼaia. ʼI takotou toe liliu ʼo fai te ʼaʼahi, ʼe feala ke koutou fakahā kia ia te kapite 1 ʼo te tohi Te ʼAtamai Mālama.
6 Ka koutou fakahā he alatike ʼe talanoa ki te maʼuli faka famili, ʼe feala ke koutou ʼui age fēnei:
◼ “E lahi te ʼu mātuʼa ʼe nātou fakatokagaʼi ʼe ko he meʼa faigataʼa te taupau ʼo he famili ʼi te ʼu ʼaho ʼaenī. ʼE lahi te ʼu tohi neʼe fai ʼo ʼuhiga mo te faʼahi ʼaia, kae māʼiape la mo te ʼu tagata popoto ʼe mole nātou manatu tahi ʼo ʼuhiga mo te faʼahi ʼaia. ʼE ʼi ai koa he tahi ʼe feala ke ina foaki mai he ʼu tokoni ʼe tāu mo falala?” Koutou fakahā he puani ʼi te nusipepa ʼe hā ai te tokoni poto ʼaē ʼe maʼu ʼi te Tohi-Tapu. Ka koutou liliu ʼo fai te ʼaʼahi, koutou palalau ki te ʼu manatu faka Tohi-Tapu ʼo ʼuhiga mo te taupau tamaliki, ʼaē ʼe tuʼu ʼi te tohi Te ʼAtamai Mālama, ʼi te pasina 145 ki te 148.
7 ʼI takotou fakahā age he alatike ʼo ʼuhiga mo te fihifihia faka sosiale, ʼe feala ke koutou ʼui fēnei:
◼ “ ʼE lahi te hahaʼi ʼe nātou tau mo te ʼu fihifihia ʼuhi ko te ʼu temi faigataʼa ʼaē ʼe tou maʼuʼuli ai. ʼI takotou manatu, neʼe loto koa ia te ʼAtua ke tou maʼuʼuli feiā?” Tou faka maʼuhigaʼi he alatike ʼe fakahā ai peʼe feafeaʼi hatatou tauʼi te ʼu fihifihia ʼaia ia ʼaho nei, pea mo tou fakahā age ʼe ina foaki mai he ʼu tupuʼaga ke tou ʼamanaki ai ki he ka haʼu ʼe tou ʼāteaina ai anai mai te tuʼania. ʼI takotou toe liliu ʼo ʼaʼahi ia ia, koutou fakahā te paki pea mo te talanoa ʼaē ʼi te pasina 4 ki te 5 ʼo te tohi Te ʼAtamai Mālama, pea koutou fai ai he ako Tohi-Tapu.
8 Koutou Faka ʼAlutahi ʼAkotou Palalau Mo Te Meʼa ʼAē ʼe Fia Logo Kiai Te Hahaʼi: ʼE koutou felāveʼi anai mo he ʼu hahaʼi ʼe mole tatau te ʼu meʼa ʼaē ʼe nātou fia palalau kiai, pea ʼe kehekehe tonatou ʼu faʼahiga maʼuli. Koutou teuteuʼi he faʼifaʼitaki ʼe feala ke tali tonu ki te ʼu meʼa ʼaē ʼe loto kiai te ʼu hahaʼi ʼaia. ʼE feala hakotou teuteuʼi peʼe feafeaʼi takotou fakaʼaveʼave takotou ʼu palalau ki he tagata, ki he fafine, ki he tahi kua matuʼa, peʼe ki he tūpulaga. ʼE mole fai he ʼu lekula ki te ʼu faʼahiga palalau ʼaē ʼe tonu ke koutou talanoa kiai. Koutou fai te ʼu palalau ʼaē ʼe koutou sio ʼe faigafua kia koutou pea mo fua lelei. Kae, ke koutou loto māfana, mo koutou palalau ʼaki tokotou loto, pea ke koutou fakalogo lelei. Ko nātou ʼaē ʼe “lotolelei” ʼe nātou fakatokagaʼi anai takotou fakamalotoloto pea ʼe nātou tali lelei anai te moʼoni.—Gāue 13:48.
9 Tou Fetokoniʼaki: ʼI tatatou fefakahāʼaki tatatou ʼu manatu, ʼe tou maʼu ai anai he ʼu faʼahiga palalau foʼou ki tatatou fai faka mafola. Ko tatatou teuteuʼi fakatahi ʼo tatatou ʼu palalau ʼe ina foaki mai kia tatou te poto pea mo te falala. (Taag. 27:17) Kapau ʼe koutou fai liuliuga te ʼu palalau ʼaē ka koutou fai, ʼe faigafua takotou palalau ki te hahaʼi. ʼE maʼuhiga ki te ʼu mātuʼa ke nātou fakaʼaogaʼi tonatou temi moʼo tokoni ki te ʼu palalau ʼaē ka fai e tanatou ʼu tamaliki, ʼo fakalogo kia nātou ʼi tanatou fai tanatou ʼu faʼifaʼitaki, pea mo foaki kia nātou he ʼu tokoni ke nātou tuputupu. Ko te ʼu kaugā fai faka mafola foʼou ʼe feala ke nātou maʼu he ʼu fua lelei mo kapau ʼe nātou fai faka mafola mo nātou ʼaē kua māhani.
10 ʼE mole tonu ke faigataʼa te teuteuʼi ʼo takotou ʼu faʼahiga palalau moʼo tufa ʼo te ʼu nusipepa. Ko te meʼa ʼaē ʼe tonu ke koutou manatuʼi ʼe ko te alatike ʼaē ka koutou talanoa kiai, pea mo fakahā fakalelei te alatike ʼaia. Kapau ʼe koutou fai he ʼu fakatuʼutuʼu fakatomuʼa, pea ʼe feala anai ke koutou teuteuʼi he faʼifaʼitaki lelei, ʼe koutou maʼu ai anai he ʼu fua lelei.
11 Ko te tufa ʼo te ʼu nusipepa ʼe ko he faʼahi maʼuhiga moʼo faka mafola ʼo te logo lelei ʼo te Puleʼaga ʼi te malamanei. Kapau ʼe koutou tufa Te Tule Leʼo pea mo te Réveillez-vous! ki te hahaʼi fakamalotoloto, pea mo koutou fai he ʼu apone, ʼe feala ke ʼiloʼi e te hahaʼi te moʼoni ʼi tanatou lau te ʼu nusipepa ʼaia. Tou manatuʼi tuʼumaʼu te maʼuhiga ʼo te ʼu nusipepa ʼaia pea mo te logo ʼaē ʼe maʼu ai, ʼaē ʼe feala ke ina hāofaki te maʼuli ʼo te hahaʼi. Ko te faʼahiga ‘fai ʼaia ʼo te meʼa ʼaē ʼe lelei pea mo vaevae mo te hahaʼi’ ʼe leleiʼia ʼaupito e Sehova.—Hep. 13:16.