ʼE Feafeaʼi Hatatou Teuteuʼi Te Fakahā ʼo He Nusipepa?
1. He koʼe ʼe lelei age ke tou teuteuʼi e tātou takitokotahi he faʼahiga fakahā ʼo te ʼu nusipepa, ʼi hatatou maʼu loto ia te ʼu faʼifaʼitaki ʼaē ʼe tuʼu ʼi Te Minisitelio ʼo Te Puleʼaga?
1 ʼE lagi kotou ʼui anai ‘pe koʼe ʼe tonu ke tou teuteuʼi te fakahā ʼo te ʼu nusipepa, mo kapau ʼe kua ʼosi tohi tonatou ʼu faʼahiga fakahā ʼi Te Minisitelio ʼo Te Puleʼaga ʼaē ʼe tufa ʼi te māhina fuli?’ Logolā ko te tokolahi kua natou tokagaʼi te ʼaoga ʼo te ʼu faʼifaʼitaki ʼaia, kae ʼe toe ʼaoga foki ke tou teuteuʼi e tātou takitokotahi. Heʼe kapau ʼe fua lelei tona faʼahiga fakahā ʼi he telituale, ʼe mole faka ʼuhiga leva ʼe fua lelei anai ʼi he tahi age telituale. Koia, ʼe mole maʼua ke tou fakaʼaogaʼi kātoa ia te ʼu kupuʼi palalau ʼaē ʼe tohi ʼi Te Minisitelio ʼo ʼuhiga mo te fakahā ʼo te ʼu nusipepa, pea kapau leva ʼe tou fia fakaʼaogaʼi he faʼahiga faʼifaʼitaki, ʼe lelei age ke tou fakaʼaogaʼi te ʼu kupuʼi palalau ʼaē ʼe faigafua kiā tātou.
2. Koteā ʼaē ʼe maʼuhiga ke kotou fai moʼo filifili te ʼalatike ʼaē kā kotou fakahā?
2 Kotou Filifili He ʼAlatike: ʼUluaki, kotou lau ia te nusipepa pea mo kotou filifili he ʼalatike ʼe kotou leleiʼia, pea ʼe lelei anai ki tokotou telituale. ʼE lagi fia lau anai tatatou ʼu nusipepa e te hahaʼi, mo kapau ʼe tou tui papau ki te ʼu meʼa ʼaē ʼe tou palalau kiai pea mo kapau ʼe tou palalau ʼaki he loto fiafia. Logolā ʼe kotou filifili anai he ʼalatike ʼe fia lau anai e te hahaʼi ʼo tokotou telituale, kae ʼe toe lelei foki ke kotou ʼiloʼi mo te tahi ʼu ʼalatike ʼo te nusipepa. Heʼe kapau ʼe kotou fai feiā, pea ʼe feala anai hakotou fakahā he tahi ʼalatike mo kapau ʼe kotou felāveʼi mo he tahi ʼe fia palalau ki he tahi age manatu.
3. Koteā ia te ʼu ʼuluaki palalau ʼaē ʼe kotou fai ke tupu ia he felōgoi?
3 Kotou Lagaʼi He Fehuʼi: Lua, kotou teuteuʼi te ʼu ʼuluaki palalau ʼaē kā kotou fai, heʼe maʼuhiga takotou faʼahiga kamata ia te fai palalau. ʼE lagi lelei anai hakotou lagaʼi he fehuʼi ʼe ina uga he tahi ke ina fakakaukauʼi, pea mo tupu ai hana fia lau ia te ʼalatike ʼaē neʼe kotou filifili. ʼI te agamāhani, ʼe fua lelei mokā tou fehuʼi peʼe koteā tana manatu ʼo ʼuhiga mo te faʼahi ʼaē ʼe tou palalau kiai. ʼAua naʼa tou palalau ki he faʼahi ʼe mole maʼu ai anai he felōgoi peʼe fakatupu ai anai he fihi.
4. He koʼe ʼe lelei ke tou lau ia he vaega Tohi-Tapu ki he tahi, mokā ʼe ko he faʼahi ʼe feala?
4 Kotou Lau Age He Vaega Tohi-Tapu: Tolu, kotou filifili he vaega Tohi-Tapu ke kotou lau age kiā ia ʼaē ʼe kotou fai faka mafola ki ai, ʼo mulimuli ki te ʼu ʼaluʼaga, lagi ko he vaega ʼe tuʼu ʼi te ʼalatike ʼaē ʼe kotou fakahā. Ko te lau ʼo he vaega Tohi-Tapu, ʼe ina faka fealagia anai ki he tahi ke sio ko te logo ʼaē ʼe tou faka mafola, ʼe haʼu mai te Folafola ʼa te ʼAtua. (1 Tes. 2:3) Tahi ʼaē meʼa, tatau aipē peʼe fakafisi ki te ʼu nusipepa, kae ʼe kua sio ki tona ʼu fakamoʼoni. Ko ʼihi neʼe natou fakatupu te fia logo ʼa te hahaʼi, he neʼe natou ʼuluaki lau age he vaega pea natou lagaʼi leva ia he fehuʼi. Moʼo fakaʼaogaʼi ʼo he vaega Tohi-Tapu, ʼe lagi feala hakotou kamata fēnei takotou ʼu palalau, “ ʼE au fia ʼiloʼi tau manatu ʼo ʼuhiga mo te vaega Tohi-Tapu ʼaenī.” ʼOsi ʼaia pea kotou fakahā age te ʼalatike ʼo te nusipepa ʼaē ʼe talanoa ki te faʼahi ʼaia, pea mo fakamatala fakanounou ke tupu hana fia lau, ʼi muʼa ʼo takotou tuku age ia te nusipepa.
5. Ko te ʼu faʼahi tāfito fea ʼaē ʼe tonu ke tou mulimuli kiai mokā tou teuteuʼi te fakahā ʼo he nusipepa?
5 ʼE mole ʼi ai he ʼu lēkula kua tukupau ʼo ʼuhiga mo te ʼu palalau ʼaē ʼe tonu ke kotou fai mokā kotou tufa ia te ʼu nusipepa. ʼI te agamāhani, ʼe lelei age ke faigafua pea mo nounou takotou fakahā ia te ʼu nusipepa. Kotou fai ni ʼu palalau ʼe faigafua maʼa koutou pea mo fua lelei. Kotou faka maʼuhigaʼi ia te lelei ʼaupitō ʼo te ʼu nusipepa, pea mo kotou palalau ʼaki he loto fiafia. Kapau neʼe kotou teuteuʼi lelei, pea ʼe faigafua anai hakotou tufa ia Te Tule Leʼo pea mo te Réveillez-vous! ki te hahaʼi ʼaē ʼe “lotolelei ki te maʼuli heʼegata.”—Gaue 13:48, MN.