Tou Fakaʼaogaʼi Lelei Te ʼu ʼUluaki Palalau
1. ʼE tonu ke tou fakaʼaogaʼi feafeaʼi te ʼu ʼuluaki palalau ʼaē ʼe foaki mai?
1 ʼI tatatou ʼu Minisitelio ʼo Te Puleʼaga ʼe ʼi ai tuʼumaʼu te ʼu ʼuluaki palalau faigafua moʼo tufa ʼatatou nusipepa pea mo te tahi ʼu tohi faka Tohi-Tapu. Ka tou kau ki te minisitelio, ʼe mole tonu anai ke tou ako fakaʼatamai ia te ʼu ʼuluaki palalau ʼaia. ʼE foaki mai moʼo tokoni kiā tatou ʼo ʼuhiga mo te ʼu meʼa ʼaē ka tou palalau kiai. ʼI te agamāhani ʼe lelei age mo kapau ʼe tou palalau ʼaki ʼatatou faʼahiga palalau māhani. Ka tou palalau faʼifaʼitaliha pea ʼe feala ai kiā ia ʼaē ʼe fakalogo mai, ke faigafua ia tana fai palalau mo tatou, pea ʼe tou fakahā ai tatatou tokaga moʼoni kiā nātou pea mo tatatou tui moʼoni.—2 Ko. 2:17; 1 Tes. 1:5.
2. He koʼe ʼe tonu ke tou vakavakaʼi fakalelei ia te ʼu agaʼi fenua mokā tou teuteuʼi tatatou ʼu ʼuluaki palalau?
2 Tou Faka ʼAlutahi Tatatou ʼu ʼUluaki Palalau Mo Te Hahaʼi ʼAē ʼe Tou Felāveʼi Mo Nātou: ʼE tonu ke tou tokagaʼi ia te ʼu agaʼi fenua mokā tou fakahā ia te logo lelei. ʼE feala koa ke koutou fefaiʼaki te ʼu mālo fakaʼapaʼapa mo ia ʼo te loto fale pea ʼosi ʼaia ʼe koutou fakahā age leva ia te tupuʼaga ʼo takotou fia palalau mo ia? Peʼe loto koa e te hahaʼi ʼo tokotou telituale ke koutou fakahā fakavilivili age takotou fekau? ʼE tahi ʼalu pe te fenua mo tana aga pea ʼi ʼihi temi ʼe tahi ʼalu pe te tagata mo tana aga. Koia ʼe tonu foki ke kita toe maʼu ia te fakasiosio poto ʼi takita fakaʼaogaʼi ia te ʼu fehuʼi. Ko te ʼu fehuʼi ʼaē ʼe lagi lelei ki niʼihi ʼe lagi mole lelei anai ki ʼihi age. Koia, ʼe tonu ai ke tou tōkakaga pea mo fakaʼaluʼalu lelei ia tatatou ʼu ʼuluaki palalau ʼo mulimuli pe ki te ʼu meʼa ʼaē ʼe māhani kiai ia te hahaʼi ʼo te koga meʼa ʼaia.
3. He koʼe ʼe tonu ke tou tokagaʼi te haʼuʼaga pea mo te manatu ʼa te hahaʼi ʼaē ʼe tou palalau kiai?
3 Tahi ʼaē meʼa, ʼe tonu ke tou tokagaʼi te haʼuʼaga pea mo te manatu ʼa te hahaʼi ʼo totatou telituale mokā tou teuteuʼi tatatou gāue fai faka mafola. Ohage la, ko te koga tohi ʼo Mateo 6:9, 10 ʼe mole tatau anai ia tatatou fakamahino ki he tahi ʼe tauhi fakalelei ʼi te Lotu Katolika mo he tahi ʼe mole ina ʼiloʼi lelei ia te faikole ʼo “Tatatou Tāmai ʼAē ʼe ʼi Selo.” Kapau ʼe teuteuʼi fakatomuʼa ia te ʼu faʼahi ʼaia, ʼi te agamāhani ʼe tou faka faigafua tatatou ʼu ʼuluaki palalau ki te hahaʼi ʼaē ʼe tou felāveʼi mo nātou ʼi te minisitelio.—1 Ko. 9:20-23.
4. He koʼe ʼe tonu ke tou teuteuʼi lelei tatatou fai faka mafola?
4 Tatau aipe mo kapau ʼe tou fakatuʼutuʼu ke tou ako fakaʼatamai he ʼuluaki palalau, ko te meʼa ʼaē ʼe maʼuhiga tuʼumaʼu ko tatatou teuteuʼi lelei tatatou fai faka mafola. ʼE tonu ke tou lau fakalelei ia te alatike peʼe ko te kapite ʼaē ʼe tou fia fakahā, pea mo tou vakaʼi ia te ʼu puani ʼaē ʼe ʼaoga anai ki te hahaʼi. ʼOsi ʼaia, tou fakapipiki ia te ʼu faʼahi ʼaia ki tatatou ʼu ʼuluaki palalau. Kapau ʼe tou ʼiloʼi lelei te ʼu manatu ʼaē ʼe tuʼu ʼi tatatou ʼu tohi, pea ʼe faigafua anai hatatou fakahā fakafiafia ia te ʼu alatike ki te hahaʼi.
5. He koʼe ʼe lelei ke tou teuteuʼi he tahi age ʼu ʼuluaki palalau, pea ʼe tou lava fai feafeaʼi ia te faʼahi ʼaia?
5 Te Tahi ʼu ʼUluaki Palalau: ʼE gata ʼaki pe koa ki te ʼu ʼuluaki palalau ʼaē kua foaki mai? Kailoa. Kapau ʼe faigafua age he tahi ʼu ʼuluaki palalau peʼe ko he tahi age vaega, tou fakaʼaogaʼi. Tāfito la mo kapau ʼe tou fakahā ia te ʼu nusipepa, tou faiga ke tou fakahā ia te ʼu alatike fakaʼosi ʼo te ʼu nusipepa, ʼaē ʼe fia lau anai e te hahaʼi ʼo totatou telituale. ʼI te temi ʼaē ʼe tonu ai ke fai he ʼu faʼifaʼitaki ki te fai faka mafola ʼi te fono gāue, ʼe feala ke fakaʼaogaʼi ai he ʼu faʼahiga fai ʼe fua lelei ʼi te telituale. Kapau ʼe tou fai feiā, pea ʼe feala anai kiā tatou fuli ke tou fakahā fakalelei ia te logo lelei.