Koutou Fakaʼaogaʼi Te ʼu Faʼifaʼitaki ʼAē ʼe Fua Lelei!
1 ʼE foaki tuʼumaʼu mai pe e Te Minisitelio ʼo Te Puleʼaga he ʼu faʼifaʼitaki kehekehe ke tou fakaʼaogaʼi ʼi te minisitelio. ʼE tou maʼu ai he ʼu manatu foʼou moʼo fakatupu ʼaki te fia logo ʼa te hahaʼi ʼo ʼuhiga mo te logo ʼo te Puleʼaga. ʼE lagi koutou faiga mālohi ʼi te ʼu māhina fuli ke koutou ako he faʼifaʼitaki e tahi peʼe laka age ʼi te ʼu faʼifaʼitaki ʼaia. Kae ʼe ʼui e ʼihi kau fai faka mafola, ʼe hoki ʼosi age pe tanatou kamata fakaʼaogaʼi he faʼifaʼitaki, pea mo te foaki mai ʼo te tahi Minisitelio ʼo Te Puleʼaga ʼaki te tahi ʼu faʼifaʼitaki. ʼE mahino papau ia, ʼe mole feala kia tatou fuli ke tou ako he faʼifaʼitaki foʼou ka mole heʼeki tou ʼiloʼi lelei te faʼifaʼitaki ʼāfea.
2 ʼE mahino ia, ʼe ʼi ai te toko lauʼi afe kau pionie pea mo te tahi kau fai faka mafola, ʼe lahi te temi ʼe nātou fakaʼaogaʼi ki te gāue fai faka mafola. Tahi ʼaē meʼa, ʼe lahi te ʼu kokelekasio, ʼe ʼaoga pe kia nātou he ʼu kiʼi vāhaʼa moʼo gāueʼi katoa tonatou telituale. ʼI te ʼu ʼaluʼaga ʼaia, ʼe fiafia te kau fai faka mafola ʼi tanatou maʼu he ʼu manatu foʼou moʼo fakahā ʼaki te logo lelei. Ko te faʼahi ʼaia ʼe tokoni foki kia nātou ke nātou tuputupu ʼi te fai faka mafola, ʼo toe lelei age tonatou minisitelio, pea mo fua lelei, pea mo tokoni kia nātou ke nātou lavaʼi te ʼu fihifihia ʼaē ʼe hoko kia nātou.
3 Kae tatau aipe pe koteā tokotou ʼaluʼaga, kapau neʼe koutou teuteuʼi he faʼifaʼitaki ʼe tupu ai te fia logo ʼa te hahaʼi, pea koutou haga fakaʼaogaʼi te faʼifaʼitaki ʼaia! ʼE mole ko he maʼua ke koutou tuku takotou fakaʼaogaʼi te faʼifaʼitaki ʼaia mo kapau ʼe fua lelei ʼi te telituale. Koutou fai pe he ʼu kiʼi fetogi ʼi te faʼifaʼitaki ʼaia ke ʼalutahi mo te tohi ʼaē ʼe tufa ʼi te māhina. ʼI takotou toe vakaʼi te ʼu tokoni ʼaē ʼe maʼu ʼi Te Minisitelio ʼo Te Puleʼaga, koutou kumi te ʼu puani ʼaē ʼe feala ke koutou hilifaki ki takotou faʼifaʼitaki.
4 Koia, ka koutou maʼu takotou pepa foʼou ʼo Te Minisitelio ʼo Te Puleʼaga, koutou manatuʼi ko te ʼu faʼifaʼitaki ʼaē ʼe maʼu ai ʼe ko he ʼu tokoni pe ia. Kapau ʼe feala hakotou fakaʼaogaʼi, pea ʼe lelei. Kae kapau kua koutou maʼu he faʼifaʼitaki ʼe fua lelei ʼi tokotou telituale, pea koutou fakaʼaogaʼi te faʼifaʼitaki ʼaia! Ko te meʼa ʼaē ʼe maʼuhiga tāfito, “ke katoa [tokotou] minisitelio” ʼi he ʼaluʼaga ʼe lelei, ʼo koutou kumi te hahaʼi ʼaē ʼe tāu mo te moʼoni pea mo tokoni kia nātou ke nātou liliu ko he ʼu tisipulo.—2 Tim. 4:5.