Tou ʼOʼofa Ki Te Hahaʼi ʼo Tou Teuteuʼi Lelei Tatatou Gāue
1 Ko te teuteuʼi lelei ʼo tatatou fai faka mafola ʼe tokoni mai ke tou fakahā totatou ʼofa ki te hahaʼi. ʼO feafeaʼi? Kapau neʼe tou teuteuʼi lelei tatatou fai faka mafola, pea ʼe mole tou hoha fau anai ʼo ʼuhiga mo te ʼu palalau ʼaē ka tou fai, kae ʼe tou fakalogo lelei anai kiā ia ʼaē ʼe palalau mai. Tahi ʼaē meʼa, kapau neʼe tou teuteuʼi lelei pea ʼe mole tou tuʼania anai pea ʼe tou fai anai he ʼu palalau ʼe haʼu mai totatou loto. Kae ʼe feafeaʼi hatatou teuteuʼi ia he ʼu palalau ʼe fua lelei?
2 Tou Fai He ʼu Palalau ʼe Tāu: Koutou filifili ʼi Te Minisitelio ʼo Te Puleʼaga ʼo Sānualio 2006 he palalau ʼe feala ke koutou fakaʼaogaʼi ʼi takotou telituale, pea koutou vakaʼi peʼe feafeaʼi hakotou fai ʼaki takotou faʼahiga palalau ʼa koutou. Koutou fai he ʼu palalau ʼe tāu anai mo te hahaʼi ʼo takotou telituale. Ohage la, kapau ʼe koutou māhani ʼi te felāveʼi mo he ʼu hahaʼi ʼo he faʼahiga lotu peʼe ʼo he faʼahiga lanu, koutou fakakaukauʼi te ʼu palalau ʼaē ʼe feala ke koutou fai ke tupu ai hanatou fia fakalogo. ʼE hā anai tokotou ʼofa moʼoni ki te hahaʼi ʼaē ʼe koutou fai faka mafola ki ai, mo kapau ʼe koutou faka ʼalutahi takotou ʼu palalau mo te ʼu meʼa ʼaē ʼe ʼaoga kiā nātou.—1 Ko. 9:22.
3 ʼO ʼuhiga mo takotou ʼu ʼuluaki palalau, koutou haga faiga ke toe lelei age. Mai tona ʼaluʼaga ʼaē ʼe maʼuhiga ʼaupito te ʼu ʼuluaki palalau, koutou vakaʼi peʼe malave feafeaʼi ki te hahaʼi. ʼE nātou fia logo koa ki te puani ʼaē ʼe koutou talanoa kiai? ʼE nātou tali koa ki te ʼu fehuʼi ʼaē ʼe koutou lagaʼi age? Kapau ʼe mole tali, pea koutou fetogi tona ʼu faʼahi ʼaē ʼe ʼaoga ʼo aʼu ki takotou maʼu he ʼu ʼuluaki palalau ʼe malave.
4 Te ʼu Tokoni Ke Feala Hatatou Manatuʼi: ʼE faigataʼa ki te tokolahi hanatou manatuʼi tanatou ʼu ʼuluaki palalau, mokā kua nātou tutuʼu ʼi te muʼa matapā. Kapau ʼe koutou feiā, neʼe koutou ʼahiʼahiʼi koa te gāueʼi ʼo takotou ʼu ʼuluaki palalau ki he tahi? Kapau ʼe koutou fai feiā, pea ʼe faigafua anai hakotou maʼu fakaʼatamai te ʼu manatu tāfito pea mo fai takotou ʼu palalau ʼaki he ʼu palalau ʼe faigafua pea mo fakatokatoka. ʼAki ia te faʼahi ʼaia, ʼe feala anai hakotou fai ia he ʼu palalau ʼo mulimuli ki te ʼu hahaʼi kehekehe ʼaē ʼe koutou felāveʼi mo nātou.
5 Ko te tahi faʼahi ʼe feala ke tokoni atu, ko te tohi fakanounou ʼo takotou ʼu palalau ʼi he kiʼi moʼi pepa pea mo koutou fakasiosio ʼi muʼa ʼo takotou fisifisi ia he matapā. Maʼa ʼihi, ko te vakaʼi fakavilivili ʼaia ʼo tanatou kiʼi moʼi pepa, ʼe tokoni kiā nātou ke mole nātou hoha pea feala ai ke nātou fai palalau mo te hahaʼi. Kapau ʼe tou teuteuʼi lelei ʼo ʼuhiga mo te ʼu ʼaluʼaga ʼaia, ʼe tou fakahā ai anai totatou ʼofa ki te hahaʼi pea mo hikihiki ʼo tatatou fakahā ia te logo lelei.