Tou Palalau Ki Te ʼu Meʼa ʼAē ʼe Fia Logo Kiai Te Hahaʼi
1 Neʼe tuku e te ʼapositolo ko Paulo ia te faʼifaʼitaki lelei ʼi tana faka mafola ia te logo lelei ki te hahaʼi kehekehe ʼo mulimuli pe ki tanatou ʼu agaʼi fenua pea mo te ʼu meʼa ʼaē neʼe ʼi ʼonatou loto. (1 Ko. 9:19-23) ʼE tonu mo tatou ke tou fai feiā. Kapau ʼe tou teuteu fakatomuʼa, pea ʼe tou fakaʼaogaʼi tuʼumaʼu anai ia te ʼu ʼuluaki palalau ʼaē ʼe tuʼu ʼi te ʼu Minisitelio ʼo Te Puleʼaga ʼo mulimuli pe ki te ʼu meʼa ʼaē ʼe fia palalau kiai te hahaʼi ʼo totatou telituale. Kapau ʼe tou fakaōvi ki he muʼa matapā, tou fakasiosio ki te ʼu tafaʼaki peʼe ʼi ai ni ʼu meʼa ʼe feala ai ke tou kamata ʼaki te fai palalau mo te tagata ʼo te loto fale ʼaia. Kae ʼe ʼi ai te tahi faʼahiga fai ʼo tatatou ʼu palalau moʼo faka ʼalutahi mo te ʼu meʼa ʼaē ʼe ʼaoga ki te hahaʼi.
2 Tou Mulimuli Ki Te ʼu Meʼa ʼAē ʼe Fia Logo Kiai Te Hahaʼi: Ka tou faka mafola ia te logo lelei ki te hahaʼi, ʼi te agamāhani ʼe tou fai te fehuʼi pea ʼe tou fakaafe ke fai mai hanatou tali. Koteā anai te meʼa ʼaē ka koutou fai ʼo ʼuhiga mo tanatou tali? ʼE koutou fakamālo age pe koa ki tanatou tali pea koutou hoko atu te fai palalau ʼo mulimuli pe ki te ʼu meʼa ʼaē neʼe kua koutou teuteu ke koutou palalau kiai? Peʼe koutou fakahā anai koa ʼaki te tali ʼaē ka koutou fai age neʼe koutou tokagaʼi ia tanatou manatu? Kapau ʼe koutou tōkakaga fakamalotoloto ki te ʼu meʼa ʼaē ʼe talanoa kiai te hahaʼi, pea ʼe feala anai ke koutou fakaʼaogaʼi lelei he ʼu fehuʼi moʼo ʼiloʼi ia te ʼu meʼa ʼaē ʼi ʼonatou loto. (Taag. 20:5) Koia ʼe feala anai ke koutou talanoa ki he ʼu faʼahi ʼo te Puleʼaga ʼe ʼalutahi mo te ʼu meʼa ʼaē ʼe nātou tuʼania kiai.
3 Koia ʼe tonu ai ke tou fai palalau mo te hahaʼi ʼo mulimuli ki te ʼu meʼa ʼaē ʼe neʼe tou ʼuluaki fai palalau kiai. Kapau neʼe tou kamata talanoa ki he fihifihia neʼe fakahā ʼi te ʼu tala logo, kae palalau mai ia te hahaʼi ki he tahi fihifihia neʼe hoko ʼi te kolo peʼe kiā nātou, pea ʼe tonu ke tou tōkakaga tāfito ki te ʼu meʼa ʼaē ʼe nātou fia palalau kiai, ʼo tou fakahā ai tatatou tōkakaga moʼoni ʼaē kiā nātou.—Filp. 2:4.
4 Tou Faka ʼAlutahi Te Fai Palalau Pea Mo Te Fia Logo ʼa Te Hahaʼi: Kapau ʼe lagaʼi mai he fehuʼi, lagi ʼe lelei age hatatou hoko atu te fai palalau ʼi he tahi temi mokā kua tou fai he ʼu kumi moʼo tali kiai. ʼE toe feala pe foki ke tou tuku age he ʼu tohi faka Tohi-Tapu ʼe nātou toe fakaloloto te fai palalau. ʼAki te ʼu meʼa fuli ʼaia, ʼe tou fakahā ai tatatou tōkakaga fakamalotoloto ki te hahaʼi ke nātou ʼiloʼi ia Sehova.—2 Ko. 2:17.