Ke Lelei Age Tatatou Minisitelio: Ke Ke Fakaha Tau Tokaga Ki ʼIhi
He Koʼe ʼe Maʼuhiga? Neʼe tokagaʼi e Sesu te hahaʼi fuli pea neʼe ina fakaha tona ʼofa kia natou. Ohage la, ʼi te tahi ʼaho, neʼe tokagaʼi e Sesu ia te ufiufi ʼae neʼe logoʼi e te tagata tuli. Pea ʼi muʼa ʼo tana fakamalolo ia ia, neʼe ina ʼave ia ia ki he koga meʼa lavaki ke mole sisio ki ai te hahaʼi. (Mko. 7:31-35) Neʼe ina fakaha tona ʼofa ki ʼana tisipulo ʼaki tana lotomahino ʼae ki ʼonatou tuʼakoi pea neʼe mole ina foaki age he ʼu fakamatala ʼe lahi fau. (Soa. 16:12) Maʼia mo tana ʼafio ʼi te lagi, ʼe hoko atu aipe te tokaga ʼae ʼa Sesu kia tatou. (2 Tim. 4:17) Pea ʼi totatou ʼuhiga tisipulo ʼa Kilisito, ʼe tonu ke tou faʼifaʼitakiʼi ia ia. (1 Pet. 2:21; 1 Soa. 3:16, 18) ʼE toe fua lelei foki ki tatatou minisitelio mo kapau ʼe tou tokagaʼi te aluʼaga ʼae ʼe tau mo te hahaʼi, mo te ʼu tuʼania ʼe natou hoha ki ai. ʼE tonu ke tou fakaha age kia natou ʼe tou tokagaʼi ia natou pea ʼe mole tou ʼomai pe ʼo foaki age he logo. Kapau ʼe tou fai te faʼahi ʼaia pea ʼe natou fia fakalogo mai anai.
ʼAhiʼahi Fai Te Faʼahi ʼAeni Lolotoga Te Mahina:
Ke ke akoako te faʼahi ʼaia ʼi takotou ako fakafamili. Peʼe moka ke faifakamafola mo he tahi, ʼe feala tau faʼifaʼitakiʼi mo ia he ʼu ʼuluaki palalau moka palalau age he tahi.
Lolotoga te fono ʼae ki te gaue faifakamafola, ʼe feala ki te tehina ʼae ʼe ina takitaki te fono ʼaia, ke palalau ki ai peʼe ke ina fai he ʼu faʼifaʼitaki ʼe fakaha ai ʼe tou tokagaʼi ʼihi.