Tou ʼOʼofa Ki Te Hahaʼi—ʼO Tou Fakasiosio Lelei
1 Ko Sehova ʼAtua pea mo Kilisito Sesu ʼe nā ʼiloʼi lelei ia te ʼu tokoni pea mo te ʼu meʼa ʼaē ʼe ʼaoga ki te hahaʼi. (2 Fkma. 16:9; Mko. 6:34) Ka tou ʼiloʼi ia te ʼu meʼa ʼaē ʼe fia logo kiai te hahaʼi pea mo tanatou ʼu tuʼania, ʼe faigafua age anai hatatou fakahā ia te logo lelei ʼo mulimuli ki te ʼu ʼaluʼaga ʼaia.
2 Tou Fakasiosio Lelei: Ko Sesu neʼe ina fakasiosio ia te ʼu meʼa ʼaē neʼe fai e te hahaʼi. (Mko. 12:41-43; Luka 19:1-6) ʼO feiā mo tatou, ka tou ʼolo ki he ʼapi tou fakasiosio lelei, peʼe ʼi ai he ʼu fakatātā, peʼe koteā te ʼu meʼa ʼaē ʼe tohi ʼi te ʼu kiʼi pepa ʼaē ʼe pulusi ʼi te ʼu motokā, peʼe ʼi ai he ʼu kiʼi meʼa gaoʼi ʼi te malaʼe, heʼe feala ai leva ke tou maʼu he ʼu faigamālie moʼo fai he fagonogono lelei ʼo ʼuhiga mo te logo lelei.
3 ʼE tou lava ʼiloʼi te meʼa ʼaē ʼi te loto ʼo he tahi, mokā tou sioʼi te agaaga ʼo tona fofoga pea mo tana aga. (Taag. 15:13) ʼE lagi ʼaoga kiā ia he fakaloto fīmālie heʼe kua mate he tahi neʼe ʼofa mamahi ai, peʼe lagi nofo mo he faigataʼaʼia. ʼE lagi fiafia anai mo kapau ʼe tou lau age he ʼu vaega Tohi-Tapu. (Taag. 16:24) ʼE fakavilivili koa ia ia ʼaē ʼo te ʼapi, peʼe ina fua koa he kiʼi tamasiʼi ʼe lolotoga tagi? Kapau koia, pea ʼe lagi lelei age ke tou fakatuʼutuʼu te fai palalau ki he tahi temi. ʼI tatatou aga fakaʼapaʼapa pea mo lotomahino, ʼe tou lava uga anai ke fia fakalogo mokā tou toe liliu mai anai ʼo ʼaʼahi ia ia.—1 Pet. 3:8.
4 Tou Fai He ʼu Palalau ʼe Fakatupu Anai He Fia Logo: Neʼe tokagaʼi e te ʼapositolo ko Paulo, neʼe tuʼu ʼi te kolo ʼo Ateni te ʼaletale neʼe tohi ai “ki te Atua hee ilo.” Neʼe ina fakaʼaogaʼi te faʼahi ʼaia moʼo fakahā age te logo lelei, he neʼe ina ʼui fēnei: “Ko te mea ae e koutou tauhi kae e mole koutou iloi, e ko ia ae e au fagonogono kia koutou.” Ko te palalau fakapotopoto ʼaia ʼa Paulo neʼe ina uga ʼihi ʼo te hahaʼi ke nātou fakalogo lelei ki te logo ʼo te Puleʼaga pea ke nātou liliu ko he hahaʼi tui.—Gaue 17:23, 34.
5 ʼO toe feiā aipe, kapau ʼe tou fakasiosio lelei ʼe feala anai ke tou ʼiloʼi te ʼu faʼahi ʼaē ʼe fia logo kiai he tahi, pea ʼe feala ai leva ke tou fai ni ʼu palalau ʼe ina fakatupu anai hana fia logo. Tou fakaʼaogaʼi te ʼu fehuʼi ʼaē ka ina faka fealagia anai kiā ia ʼo te ʼapi ke fai palalau mo tatou. Tou manatuʼi he ʼu vaega ʼe feala ke tou fakaʼaogaʼi moʼo fakatupu tana fia logo. (Taag. 20:5) Ko tatatou fakasiosio lelei pea mo tatatou ʼofa moʼoni ki te hahaʼi, ʼe ina faka fealagia mai anai ke tou faiva ʼi te faka mafola ia te logo lelei.