Kotou Tokoni Ki Te Hahaʼi Ke Natou Fakakaukau
1. Koteā te faʼahiga fai palalau ʼaē ʼe lelei age ki te minisitelio?
1 Koteā te faʼahiga fai palalau ʼaē ʼe lelei age ki te minisitelio—ko he tahi ʼe ina fakafihiʼi te ʼu manatu ʼa te hahaʼi, peʼe ko he tahi ʼe tokoni ki te hahaʼi ke natou fakakaukau pea mo natou maʼu te ʼu manatu ʼaē ʼe totonu? ʼI tana palalau ʼaē mo te kau Sutea ʼo Tesalonika, neʼe uga e te ʼapositolo ko Paulo ia te hahaʼi ʼaē neʼe natou fakalogo kiā ia ke natou fakakaukau, pea “neʼe tui leva ni ʼihi ʼo nātou.” (Gāue 17:2-4) Koteā ʼaē ʼe tonu ke kotou fai moʼo tokoni ki te hahaʼi ke natou fakakaukau?
2. ʼE feafeaʼi hatatou muliʼi te faʼifaʼitaki ʼa Paulo mokā ʼe tou fakamafola te logo lelei?
2 Kotou Tokagaʼi Te ʼu Meʼa ʼAē ʼi Tonatou Loto Mo Tonatou Haʼuʼaga: Ke kotou tokoni ki te hahaʼi ʼo tokotou telituale, ʼe tonu ke kotou tokagaʼi te ʼu meʼa ʼaē ʼi tonatou loto pea mo te ʼu akonaki ʼaē ʼe natou tui kiai. Neʼe kamata te akonaki ʼa Paulo ki te kau Keleka ʼi te ʼAleopasi, ʼo talanoa ki te ʼu meʼa ʼaē neʼe feala ke natou ʼiloʼi pea mo natou tali lelei. (Gāue 17:22-31) Koia, ʼi te teuteuʼi takotou ʼu ʼuluaki palalau, kotou tokagaʼi te ʼu meʼa ʼaē ʼe tui kiai te hahaʼi pea mo te ʼu meʼa ʼaē ʼe lau e te hahaʼi ʼo totatou telituale. (1 Ko. 9:19-22) Kapau ʼe fakafihiʼi e te hahaʼi ia te fai palalau, ʼe tonu ke kotou faiga ke kotou maʼu he ʼu faʼahi ke kotou felōgoi lelei ai mo nātou ke hoko atu te fai palalau.
3. ʼE feafeaʼi ia te fakaʼaogaʼi lelei ʼo te ʼu fehuʼi moʼo uga te hahaʼi ke lelei age hanatou fakakaukau?
3 Kotou Fakaʼaogaʼi Lelei Ia Te ʼu Fehuʼi: ʼE mole feala hatatou tokoni ki he tagata tulisi ʼo ʼuhiga mo te koga meʼa ʼaē ʼe fia ʼalu kiai, mo kapau ʼe mole tou ʼiloʼi te koga meʼa ʼaē ʼe tuʼu ai. ʼO toe fēia pē, ʼe mole feala ke tou tokoni ki he tahi ke ina maʼu te manatu ʼaē ʼe totonu mo kapau ʼe mole tou ʼiloʼi tana manatu. ʼI muʼa ʼi tana tokoni ki te hahaʼi ke natou fakakaukau, neʼe lagaʼi tuʼumaʼu e Sesu te ʼu fehuʼi ke ina ʼiloʼi tanatou ʼu manatu. Ohagē lā, neʼe fehuʼi age e te tagata kiā Sesu, “koteā te meʼa ʼaē ʼe tonu ke au fai ke feala ai anai ke au maʼu te maʼuli heʼegata?” ʼI muʼa ʼo te tali ʼa Sesu, neʼe ina fia ʼiloʼi te manatu ʼa te tagata. (Luka 10:25-28) ʼI te tahi lakaga, ʼi te tali hala ʼa Petelo, neʼe fakaʼaogaʼi lelei e Sesu te ʼu fehuʼi ke ina fakatonutonuʼi tana ʼu manatu. (Mat. 17:24-26) Koia, kapau ʼe fai fehuʼi mai ia te hahaʼi peʼe natou fai mai he tali ʼe hala, ʼe feala ke tou fakaʼaogaʼi he ʼu fehuʼi moʼo tokoni ke natou fakakaukau ʼo ʼuhiga mo te faʼahi ʼaia.
4. He koʼē ʼe tonu ke tou faigaʼi ke tou tokoni ki te hahaʼi ke natou fakakaukau?
4 Kapau ʼe tou tokoni ki te hahaʼi ke natou fakakaukau, ʼe tou faʼifaʼitakiʼi ia te Tagata Faiako Lahi, ko Sesu, pea mo ʼihi kau fai fakamafola faiva ʼo te ʼuluaki sēkulō. ʼE tou fakamaʼuhigaʼi te hahaʼi pea mo tou fakaʼapaʼapa kiā nātou. (1 Pet. 3:15) ʼI tatatou fai te faʼahi ʼaia, ʼe natou lotolelei anai ke tou toe liliu age ʼo ʼaʼahi ia nātou.