Tou Fakaʼaogaʼi Te Tohi Comment raisonner ʼi Te ʼu Toe ʼAʼahi
1 “Ko ʼau neʼe ʼau to, ko Apolo neʼe ina fakavai”, ko te ʼui ʼaenī ʼa te ʼapositolo ko Paulo (1 Ko. 3:6). ʼE hā lelei mai ʼi te ʼu kupuʼi palalau ʼaenī te ʼu faʼahi e lua ʼe tonu ke fakahoko moʼo fai ʼo he ʼu tisipulo. Ko te ʼu ʼaʼahi ʼe fakatātā ki he “fakavai”. Ko te ʼu fahaʼi ʼaia ʼe pipiki tāfito ʼi te temi ʼaē ʼe fai ai te ʼuluaki ʼaʼahi pea mo te temi ʼaē ʼe liliu ai ia ko he tisipulo ʼo papitema. Ko te ʼu ʼaʼahi ʼe ko he faka fealagia kia tatou ‘ke faka mafola te mālama lelei’, ke fakavai te fua ʼaia ʼo aʼu ki te temi ʼe aka ai pea mo kamata ai hana ako faka tohi-tapu. — Tāʼaga Lea 15:7.
2 ʼE ʼi ai ʼihi ʼe lagi ʼe nātou tuʼania tanatou toe liliu mai mokā ʼe nātou sisio ifo ʼe fia logo he tahi, koteʼuhi ʼe mole nātou ʼiloʼi pe koteā te meʼa ka nātou palalau ki ai. Ko te tohi Comment raisonner à partir des Écritures ʼe hā ʼe ʼaoga lelei ki te gāue ʼaē ko te fakavai. ʼI te agamahani, ʼi muʼa ʼo te tali ʼe he tahi hana ako faka tohi-tapu, ʼe tonu ke lahi te fai ʼaʼahi ki ai ʼo fakanounou. Ko te tohi Comment raisonner ʼe ina fakahā te ʼu manatu tāfito ʼo ʼuhiga mo te ʼu kupu faka tohi-tapu ʼe feala ai ha kotou fai palalau mo ia. Teuteuʼi lelei te ʼaʼahi, ʼo lagi koutou muliʼi he manatu ʼe tahi pe ʼe lahi ʼi te ʼu manatu ʼe tuʼu mai ki muli.
3 Kapau neʼe koutou tuku he “Tule Leʼo” ʼo te ʼaho 15 ʼo ʼapelili 1992 ʼo ʼuhiga mo te faikole, ka koutou liliu mai ʼe feala takotou fehuʼi age:
■ “Koteā koa te ʼu tupuʼaga ʼaē ʼo te mole fakalogo ʼa te ʼAtua ki te ʼu faikole ʼa he tahi? ” ʼI te ʼosi ʼo takotou fakalogo ki tana tali mai, koutou toʼo takotou tohi Comment raisonner pea koutou avahi ʼi te pasina 287. Koutou fakasiosio mo ia he ʼu vaega ʼe tuʼu mai ʼi te kupu ʼaenī pea ke koutou tokoniʼi ia ia ke ina lau he ʼu fahaʼi ʼo te tohi ʼaia. Kapau ʼe koutou sisio ʼe fia logo moʼoni ia, ʼe feala ha kotou fai tonu ʼo fakahā ki ai te apone.
4 Lolotoga he tahi ʼaʼahi, ʼi te ʼosi ʼo takotou fehuʼi age ki ai pe koteā te ʼuhiga ʼo te Puleʼaga ʼo te ʼAtua kia ia, ʼaē ʼe fakahā ʼi te Tāmai ʼi selo, avahi te tohi ʼi te ʼu pasina 335 ki te 341. Kapau ʼe feʼauga te temi, koutou palalau mo ia ki te ʼu fehuʼi ʼaē “La bible parle-t-elle vraiment du Royume de Dieu comme dʼun gouvernement? ” pea “Que fera le Royaume de Dieu? ” Koutou fakatonutonuʼi te manatu hala ʼaē ʼe ʼui ko te Puleʼaga ʼe ʼi te loto ʼo te hahaʼi. Ko te Puleʼaga ʼe ko te puleʼaga moʼoni ia! ʼE mole ʼaoga ke vakaʼi fuli te alatike, koutou fai ni ʼu fehuʼi ke feala ai ha kotou toe liliu mai ʼo tali ki ai.
5 ʼI te tahi ʼu fahaʼi, neʼe tali ʼe ia ʼaē ʼe palalau mo koutou he nusipepa ʼo te Réveillez-vous! ʼo te ʼaho 22 ʼo ʼapelili 1992 ʼe palalau ai ki te fahaʼi ʼaenī “Ko te maʼuli: koteā koa tona ʼuhiga? ”
ʼE feala takotou fehuʼi age:
■ “ ʼE ʼi ai koa hatatou ʼu fakamoʼoni ko te sinoʼi tagata neʼe fakatupu ia ke maʼuli ʼo heʼe gata ʼi te kele? ” pe ʼe: “ ʼI takotou manatu ʼe ʼiloʼi koa e te kau mate te meʼa ʼaē ʼe fai e te hahaʼi kei maʼuʼuli? ” Ko te ʼu fehuʼi ʼaia ʼe feala ke uga ai ia ia ʼaē ʼe palalau mo tatou ke tupu ai hona fia logo koteʼuhi heʼe ʼaoga kia ia totonu te meʼa ʼaia. Koutou fai he ʼu fakatuʼutuʼu ke feala ai ha kotou toe liliu mai ʼo tali te ʼu fehuʼi aia, ʼe koutou maʼu anai ʼi te tohi Comment raisonner, ʼi te ʼu pasina 437, 438 pea mo te 255.
6 Kapau ko takoutou ʼuluaki fai palalau neʼe fai ʼo ʼuhiga mo te meʼa ka hoko ānai ki te kele ʼi te temi ka haʼu, ʼe feala takotou ʼui age:
■ “Ko te ʼAtua ʼe ina tuku anai koa te hahaʼi ke nātou maumauʼi te kele ʼo faiʼaki tonatou loto? ” Koutou avahi te tohi Comment raisonner ʼi te pasina 182 pea koutou fai palalau ʼo ʼuhiga mo te tali faka tohi-tapu. ʼE lagi fehuʼi anai ʼe ia ʼe palalau mo koutou: “Kapau ko te ʼu hahaʼi ʼe lauʼi miliale ʼe toe fakatuʼuake mai te mate, ʼe nātou maʼuʼuli anai koa ʼifea? ” ʼE koutou maʼu anai tona tali ʼi te tohi Comment raisonner ʼi te pasina 328.
7 Koutou tokaga naʼa lahi fau takotou palalau kae mole kei fia logo he tahi ki te ʼu moʼoni faka tohi-tapu. Fai he ʼu fehuʼi ke feala ai takotou toe liliu mai ʼo fakahā tona ʼu tali. Koteʼuhi ko tatou ko te kaugāue ʼa te ʼAtua, ʼe tou faiga anai ʼo to pea mo fakavai fakapotopoto ʼo fakaʼaogaʼi fakalelei te tohi Comment raisonner. ʼE tou ʼiloʼi papau ko te ʼAtua ʼe ina fakatuputupu anai.