Ke Tou Lototoʼa ʼo Fai Te ʼu ʼAʼahi

¹ ʼE koutou leleiʼia koa te fai ʼo te ʼu ʼaʼahi? ʼE lahi te ʼu kaugā fai faka mafola ʼe nātou leleiʼia te faʼahi ʼaia. ʼE lagi koutou matataku ʼi te kamata, tāfito la mo kapau ʼi takotou ʼuluaki fai palalau, neʼe mole faʼa fia logo ki takotou fai faka mafola. Kae ko te ‘lototoʼa ʼaē ʼe foaki atu e totatou ʼAtua, ke feala ai hakotou palalau ʼo ʼuhiga mo te logo lelei,’ ʼo koutou fai ni ʼu ʼaʼahi, pea ʼe lagi koutou punamaʼuli ai anai ʼi takotou sio ʼaē ʼe faigafua te gāue ʼaia, pea mo lahi te ʼu fakapale ʼaē ʼe koutou maʼu ai. (1 Tes. 2:2) ʼO feafeaʼi?

² ʼE moʼoni, ʼe ʼi ai te kehekehe ʼo te ʼaʼahi pea mo te ʼuluaki fai palalau. Ko te ʼaʼahi ʼe tou fai ki he tahi kua tou ʼiloʼi, kae mole ko he tahi ʼe mole tou ʼiloʼi, pea ʼi te agamāhani ʼe faigafua age te fai palalau mo he tahi ʼe tou ʼiloʼi ʼi hatatou fai palalau mo he tahi ʼe mole tou ʼiloʼi. ʼO ʼuhiga mo te ʼu fakapale ʼaē ʼe tou maʼu ʼi te gāue ʼaia, ʼaki te ʼu ʼaʼahi ʼe feala ke tou maʼu ai he ʼu ako Tohi-Tapu.

³ Ka tou fai faka mafola ʼi te ʼu ʼapi, ʼe tou ʼaʼahi tuʼumaʼu te ʼu hahaʼi ʼaē neʼe mole fia logo ʼi tatatou ʼuluaki ʼaʼahi ia nātou. Kae, he koʼe ʼe tou haga ʼaʼahi ia nātou? Kua tou fakatokagaʼi ʼe fetogi te ʼu ʼaluʼaga ʼo te maʼuli ʼa te hahaʼi, pea ko he tahi neʼe mole fia logo pe neʼe fakafeagai ʼi tatatou ʼuluaki ʼaʼahi, ʼe lagi fia logo anai ki te moʼoni ki muli mai. Kapau ʼe tou manatuʼi te faʼahi ʼaia, pea ʼe tou teuteu fakalelei anai pea mo tou faikole ke tapuakina tatou e Sehova, ke feala hatatou fai he ʼu palalau ʼi te temi ʼaia ʼe maʼu ai anai he ʼu fua lelei.

⁴ Kapau, ʼi tatatou fai faka mafola ʼi te ʼu ʼapi, ʼe tou tali lelei ke tou fai faka mafola ki te hahaʼi ʼaē ʼe mole fia logo ki te moʼoni, ʼe mole tonu koa la ke toe lahi age tatatou tali ʼaē ke tou liliu ʼo ʼaʼahi he tahi ʼe fia logo ki te logo ʼo te Puleʼaga?​—Gāue 10:34, 35.

⁵ Tokolahi ia tatou ʼi te ʼaho nei kua tou kau ʼi te moʼoni, koteʼuhi neʼe faʼa kātaki he kaugā fai faka mafola ʼo ʼaʼahi tatou. Kapau ʼe koutou kau ia nātou ʼaia, ʼe feala ke koutou fai te ʼu fehuʼi ʼaenī: ‘Neʼe ʼau tali feafeaʼi te kaugā fai faka mafola ʼaia ʼi te kamata? Neʼe ʼau tali koa te logo ʼo te Puleʼaga ʼi te moʼi temi pe ʼaia, ʼi taku ʼuluaki logo kiai? Neʼe manatu koa te kaugā fai faka mafola, ʼe mole ʼau fia logo ki te moʼoni?’ ʼE tonu ke tou fiafia ʼi te toe liliu mai ʼo te kaugā fai faka mafola ʼo ʼaʼahi tatou, pea ʼaki ‘te lototoʼa ʼaē neʼe foaki age e te ʼAtua,’ neʼe ina fai te ʼaʼahi ʼaia, mo ina akoʼi mai kia tatou te moʼoni. Kae e feafeaʼi ki te ʼu hahaʼi ʼaē ʼe hage ʼe nātou fia logo ʼi te kamata, kae ki muli age ʼe hage ʼe mole kei nātou faʼa loto ke tou ʼaʼahi ia nātou? ʼE mole tonu anai ke tou lotovaivai, ohage ko tona hā ʼi te faʼifaʼitaki ʼaenī.

⁶ Lolotoga tanā fagonogono ʼi te ʼu ala ʼi te tahi uhu, neʼe felāveʼi te ʼu kaugā fai faka mafola e toko lua mo te fafine ʼe ina toho tana tamasiʼi ʼi te kiʼi saliote. Neʼe tali e te fafine ʼaia te nusipepa, pea neʼe ina fakaafe te ʼu tuagaʼane ʼaia ke nā ʼolo age ki tona ʼapi ʼi te ʼAhotapu ʼo te vāhaʼa ka haʼu. Neʼe nā tautonu atu ki te temi ʼaē neʼe nātou fakatuʼutuʼu kiai, kae neʼe ʼui age e te fafine ʼe mole maʼu hona temi ke nātou fai palalau. Kae, neʼe ina fakapapau age ʼe hoki feala anai ʼi te vāhaʼa ka haʼu. Neʼe mole falala te ʼu tuagaʼane ʼe nā maʼu atu anai te fafine, kae ʼi tanā toe liliu ki ai, neʼe nā maʼu atu ʼe fakatalitali mai kia nāua. Neʼe kamata ai te ako Tohi-Tapu, pea neʼe fakaofoofo te tuputupu ʼa te fafine ʼaia ʼi te faʼahi fakalaumālie. Mole faʼa fualoa, pea kamata kau tuʼumaʼu ki te ʼu fono, pea mo kau ki te gāue fai faka mafola. ʼI te temi nei ʼe kua papitema te fafine ʼaia.

⁷ Tou Teuteuʼi Te Tafitoʼaga ʼi Te ʼUluaki Felogoi: Kapau ʼe tou loto ke ʼi ai he ʼu fua lelei ʼo te ʼaʼahi ʼaē ka tou fai, pea ʼe maʼua ke lelei te ʼuluaki fai palalau. Koutou fakalogo fakalelei ki te ʼu meʼa ʼaē ʼe fakamatala atu e ia ʼaē ʼe fai palalau. Koteā te meʼa ʼaē ʼe ina ʼui atu kia koutou? ʼE ina leleiʼia koa te lotu? ʼE tuʼania koa ʼo ʼuhiga mo te ʼu meʼa faka sosiale? ʼE fia logo koa ki te ʼu meʼa ʼo te poto fakatagata? ki te hisitolia? ki te te ʼu meʼa ʼo ʼuhiga mo te kele? ʼI te fakaʼosi ʼo te fai palalau, ʼe feala ke koutou lagaʼi he fehuʼi ke ina fakakaukauʼi pea mo koutou fakapapau age ʼe koutou toe liliu mai anai ʼo fakahā age ki ai te tali ʼa te Tohi-Tapu ki te faʼahi ʼaia.

⁸ Ohage la, kapau ʼe ina tali te fakapapau ʼa te Tohi-Tapu ʼo ʼuhiga mo te palatiso ʼi te kele, ʼe lagi lelei anai ke koutou toe palalau ki te puani ʼaia. ʼI muʼa ʼo takotou mavete, ʼe feala ke koutou fehuʼi age: “ ʼE lava feafeaʼi koa hatatou ʼiloʼi ʼe fakahoko anai e te ʼAtua te fakapapau ʼaia?” Pea toe ʼui age: “ ʼE lagi feala ke ʼau toe liliu mai mo kapau ʼe katoa fuli mai anai te famili, pea ʼe feala ke ʼau fakahā atu te tali ʼa te Tohi-Tapu ki te fehuʼi ʼaia.”

⁹ Kapau neʼe mole he puani neʼe fia palalau kiai, pea ʼe feala ke koutou lagaʼi he fehuʼi ʼi te ʼu fehuʼi ʼaē ʼe tuʼu ʼi te alatike ʼo te pasina fakamuli ʼo Te Minisitelio ʼo Te Puleʼaga, pea mo koutou fakaʼaogaʼi te fehuʼi ʼaia moʼo fakatafito kiai tatatou tahi fai palalau.

¹⁰ Tou Tohi Lelei Tatatou ʼu ʼAʼahi: Ko takotou pepa ʼaē ʼe koutou tohi ai takotou ʼu ʼaʼahi, ʼe tonu ke totonu pea mo katoa. ʼI muʼa ʼo takotou mavete, ʼe tonu ke koutou tohi te higoa pea mo te tuʼasila ʼo ia ʼaē neʼe fai palalau mo koutou. ʼAua naʼa koutou manatu ʼe koutou ʼiloʼi te numelo ʼo te ʼapi, peʼe ko te higoa ʼo te ʼu ala​—kae ke koutou vakaʼi lelei peʼe totonu te ʼu meʼa ʼaē neʼe koutou tohi. Koutou tohi te ʼu agaaga ʼo ia ʼaē neʼe palalau mo koutou. Koutou tohi te meʼa ʼaē neʼe koutou talanoa kiai, te ʼu vaega faka Tohi-Tapu ʼaē neʼe koutou lau, te tohi ʼaē neʼe koutou tuku ki ai, pea mo te fehuʼi ʼaē ʼe koutou liliu anai ʼo tali kiai. Koutou tohi te ʼaho pea mo te hola ʼo takotou ʼuluaki fai palalau, pea mo te ʼaho pea mo te hola ʼaē ka koutou fai ai anai te ʼaʼahi. ʼI temi leva ʼaē kua tohi katoa ai takotou pepa, koutou tokaga kiai! Koutou tuku lelei ki he faʼahi ʼe feala ke koutou maʼu ai. Koutou manatuʼi ia ia ʼaē neʼe koutou fai palalau mo ia, pea mo te faʼahiga fai ʼo te ʼaʼahi ʼaē ka koutou fai.

¹¹ ʼE Tonu Ke Koutou ʼIloʼi Pe Koteā Takotou ʼu Fakatuʼutuʼu: ʼUluaki, ke koutou aga fakakāiga pea mo agalelei, ʼo koutou faiga fakamalotoloto ke leleiʼia te fai palalau e ia ʼaē ʼe koutou faka mafola ki ai. Koutou fakahā age ki ai ʼe koutou fia feʼiloʼiʼaki mo ia, ka mole koutou fia ʼiloʼi meʼa fuli. ʼOsi ʼaia, pea koutou fakamanatuʼi age ki ai te fehuʼi ʼaē neʼe koutou lagaʼi ʼi takotou ʼuluaki fai palalau. Koutou fagono fakalelei ki tana manatu, pea koutou fakamālo age ki ai ʼi tana fakahā atu tana manatu. ʼOsi ʼaia, pea koutou fakahā age ki ai pe koʼe ʼe ʼaoga te manatu faka Tohi-Tapu. Kapau ʼe feala, pea koutou fakatokagaʼi kia ia he manatu ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe ʼalutahi mo te meʼa ʼaē ʼe koutou palalau kiai. Koutou manatuʼi ko takotou fakatuʼutuʼu tāfito mokā koutou fai he ʼu ʼaʼahi, ʼe ko te kamata ʼo he ako Tohi-Tapu.

¹² Ko te talanoa fakahagatonu ʼi te tohi Te ʼAtamai Mālama, neʼe ina uga ai te tokolahi ʼo tatou ‘ke tou lototoʼa’ ʼi te ʼu ako faka Tohi-Tapu, ʼo fakaloto mālohiʼi te kau ako ke nātou kau ki te ʼu fono pea ke nātou fakatahitahi mo te kautahi ʼa Sehova. Ki muʼa atu, neʼe tou talitali ke fuafualoa te ako ʼa te hahaʼi, pea hoki fakaafe ke nātou kau ki te ʼu fono. ʼI te temi nei, ko te tokolahi ʼo te kau ako ʼe nātou kau ki te ʼu fono ʼi te temi pe ʼaē ʼe nātou kamata ako ai te Tohi-Tapu, pea ʼe vave ai tanatou tuputupu ʼi te faʼahi fakalaumālie.

¹³ Ko te taumatuʼa ko te ʼu Fakamoʼoni ʼa Sehova, neʼe nā fagonogono faigamālie ki tonā kaugā gāue. ʼI te temi ʼaē neʼe ina fakahā ai tana fia logo ki te moʼoni, neʼe nā fakaafe ia ia ke ina ako te Tohi-Tapu ʼaki te tohi Te ʼAtamai Mālama. ʼI te temi pe ʼaia, neʼe nā ʼui age ki ai ʼe tonu ke kau ki te ʼu fono, heʼe ina maʼu ai anai te tali ʼo tana ʼu tuʼuga fehuʼi. Neʼe ina tali te fakaafe ʼaia, pea neʼe ina fai tuʼa lua tana ako ʼi te vāhaʼa, pea neʼe kamata ai tana ʼalu tuʼumaʼu ki te ʼu fono ʼe fai ʼi te Fale ʼo te Puleʼaga.

¹⁴ Tou Fakaʼaogaʼi Te Kaupepa Koteā ʼAē ʼe Fakamaʼua Mai e Te ʼAtua Kia Tatou?: ʼI te Fakatahi Faka Tisitilike “Te Kau ʼAve Logo ʼo Te Tokalelei Fakaʼatua,” neʼe tou maʼu ai te kaupepa Koteā ʼAē ʼe Fakamaʼua Mai e Te ʼAtua Kia Tatou? Ko te kaupepa ʼaia ʼe lelei moʼo kamata ʼo he ʼu ako Tohi-Tapu mo te hahaʼi ʼaē ʼe manavasiʼi ki te ʼAtua, tatau aipe pe neʼe lelei tanatou ako peʼe kailoa. ʼE mahino gafua te ʼu meʼa ʼaē ʼe tuʼu ʼi te kaupepa ʼaia, heʼe ko te ʼu akonaki tāfito ʼo te Tohi-Tapu. ʼE ʼaoga lelei anai te kaupepa ʼaia moʼo fakahā te ʼatamai mālama ʼaē ʼo ʼuhiga mo te ʼAtua. ʼE mahino lelei pea mo faigafua te fakahā ʼo te moʼoni ʼi te kaupepa ʼaia, koia ʼe feala anai kia tatou fuli ke tou fakaʼaogaʼi moʼo akoʼi ʼo te ʼu fakatuʼutuʼu ʼa te ʼAtua ki te hahaʼi. ʼE mahino ia, ʼe lahi te ʼu kaugā fai faka mafola ʼe nātou maʼu anai te pilivilesio ʼaē ko te fai ʼo he ʼu ako Tohi-Tapu ʼaki te kaupepa ʼaia.

¹⁵ Ko te hahaʼi ʼaē ʼe mole maʼu honatou temi moʼo ako te tohi Te ʼAtamai Mālama, ʼe lagi nātou lotolelei ke nātou fai he ʼu ako nounou ʼaki te kaupepa Fakamaʼua. ʼE nātou fiafia anai ʼi te ʼu meʼa ʼaē ka nātou ako! ʼI te ʼu pasina e lua peʼe tolu, ʼe nātou maʼu anai te ʼu tali ki te ʼu fehuʼi ʼe fai e te hahaʼi talu mai ni ʼu sēkulō: Ko Ai Te ʼAtua? Ko Ai Te Tevolo? Te Fakatuʼutuʼu ʼa Te ʼAtua Ki Te Kele? Koteā Te Puleʼaga ʼo Te ʼAtua? ʼE Lava Feafeaʼi Hakotou Maʼu Te Lotu Moʼoni? Logope la ko te kaupepa ʼaia ʼe ina fakahā te moʼoni ʼaki he ʼu kupu faigafua, kae ko tana logo ʼe mālohi ʼaupito. ʼE ina fakahā te ʼu puani tāfito ʼaē ʼe tonu ke toe vakaʼi anai e te kau tagata ʼāfea mo nātou ʼaē ʼe fia papitema, pea ko te kaupepa ʼaia ʼe ko he teuteuʼi anai ʼo te ako ʼaē ka fai ʼaki te tohi Te ʼAtamai Mālama.

¹⁶ Moʼo Kamata He Ako ʼi Te ʼAʼahi, ʼe Feala Ke Koutou ʼUi Age Fēnei: “ ʼE koutou ʼiloʼi koa la, lolotoga he ʼu kiʼi minuta, ʼe feala ke koutou maʼu he tali ki te fehuʼi maʼuhiga ʼo te Tohi-Tapu?” Pea koutou fai he fehuʼi ʼe tuʼu ʼi te kamata ʼo te ʼu ako ʼo te kaupepa. Ohage la, kapau ʼe koutou palalau ki he tahi kua matuʼa, ʼe feala ke koutou ʼui fēnei: “ ʼE tou ʼiloʼi neʼe fakamālōlō e Sesu te hahaʼi ʼi te temi muʼa. Kae ʼi te temi ka haʼu, koteā anai te meʼa ʼaē ka fai e Sesu ʼo ʼuhiga mo te kau mahaki? te hahaʼi ʼaē kua matutuʼa? mo te kau mate?” ʼE tou maʼu te ʼu tali ki te ʼu fehuʼi ʼaia ʼi te ako 5. Ko he tahi ʼe tauhi lotu ʼe lagi ina fia maʼu he tali ki te fehuʼi ʼaenī: “ ʼE fagono koa te ʼAtua ki te ʼu faikole fuli pe?” ʼE tuʼu tona tali ʼi te ako 7. ʼE lagi fia ʼiloʼi anai e te ʼu famili pe “Koteā ʼaē ʼe fakamaʼua mai e Sehova ki te ʼu mātuʼa pea mo te fānau?” ʼE nātou maʼu anai te tali ki te fehuʼi ʼaia ʼi te ako 8. Koʼeni te tahi ʼu fehuʼi: “ ʼE feala koa ki te kau mate ke nātou fai he ʼu meʼa ʼe kovi ki te kau maʼuʼuli?” ʼe fakamahino te faʼahi ʼaia ʼi te ako 11; “He koʼe ʼe lahi te ʼatu ʼu lotu ʼe nātou lau ko nātou ko te kau Kilisitiano?” ʼaē ʼe talanoa kiai te ako 13; pea “Koteā ʼaē ʼe tonu ke koutou fai ke koutou liliu ai ko he kaumeʼa ʼo te ʼAtua?” ʼaē ʼe tuʼu ʼi te ako 16.

¹⁷ Tou Tokoni Kia Nātou ʼAē ʼe Mole Lea Tahi Mo Tatou: ʼE feafeaʼi anai ki te hahaʼi ʼaē ʼe palalau ki he tahi lea? Kapau ʼe feala, pea ʼe tonu anai ke nātou ako ʼi te lea ʼaē ʼe nātou ʼiloʼi lelei. (1 Ko. 14:⁠9) Kapau ʼe lelei age te mahino ʼa he tahi ki te lea Fakafalani, pea ʼe tonu anai ke fai te ako ʼi te lea ʼaia, pea ʼe lagi tonu anai ke fekauʼi ia ia ki he kokelekasio lea Fakafalani. ʼO ʼuhiga mo te faʼahi ʼaia, ʼe tonu anai ke faka felogoi mo te tagata taupau ki te gāue ʼo te kokelekasio Fakafalani, ke fai he fakatuʼutuʼu pe ko ai ʼaē ka ina fai anai te ako ʼaia. Tatau aipe peʼe tou fia fai he fakatuʼutuʼu mo he kaugā fai faka mafola ʼi te kokelekasio Fakafalani, ʼe tonu anai ke tou fakahā te faʼahi ʼaia ki te tagata taupau ki te gāue ʼo totatou kokelekasio ʼi muʼa ʼo te foaki ʼo te ako ʼaia.

¹⁸ Ko he kaugā fai faka mafola ʼe palalau Fakapilitānia, neʼe ina kamata te ako mo te tagata ʼe lea faka Vietnamienne pea mo tona ʼohoana ʼaē ʼe lea faka Thaï. Neʼe nātou fakaʼaogaʼi lolotoga te ako te ʼu tohi pea mo te ʼu Tohi-Tapu Fakapilitānia, faka Vietnamienne, pea mo te lea faka Thaï. Logope la ʼi te kamata neʼe faigataʼa ʼuhi ko te lea, kae ʼe ʼui fēnei e te kaugā fai faka mafola: “Neʼe vave te tuputupu fakalaumālie ʼa te taumatuʼa. Neʼe nā fakatokagaʼi te maʼuhiga ʼaē ke nā kamata ʼolo ki te ʼu fono mo tanā ʼu tamaliki e toko lua, pea ʼe nātou lau faka famili te Tohi-Tapu ʼi te po fuli. Ko tanā taʼahine ʼaē ʼe taʼu ono, ʼe ina fai te ako Tohi-Tapu.”

¹⁹ Ka tou ako mo te hahaʼi ʼaē ʼe palalau ʼi he tahi lea, tou palalau māmālie, mo tou palalau ke mahino, pea ke tou fakaʼaogaʼi he ʼu kupu pea mo he ʼu palalau ʼe faigafua. Kae, ke tou manatuʼi, ko te hahaʼi ʼaia ʼaē ʼe palalau ʼi he tahi lea ʼe tonu ke gaohi fakaleleiʼi ia nātou. ʼE mole tonu ke gaohi nātou ohage ko he ʼu kiʼi tamaliki.

²⁰ Tou fakaʼaogaʼi fakalelei te ʼu paki ʼaē ʼo te kaupepa Fakamaʼua. Kapau “ ʼe maʼuhiga age he paki ʼi he ʼu palalau ʼe lauʼi afe,” pea ʼe mahino ia ko te ʼu tuʼuga paki ʼo te kaupepa ʼe ʼaoga ʼaupito anai kia ia ʼaē ʼe fai palalau mo tatou.

²¹ Tou Foimo Fai Te ʼu ʼAʼahi: Ko temi ʼe fia ʼaē ʼe tonu ke koutou talitali ai ʼi muʼa ʼo takotou fai he ʼaʼahi? Ko ʼihi ʼu kaugā fai faka mafola ʼe nātou liliu ʼi te hili ʼo he ʼaho e tahi peʼe lua ki te ʼuluaki fai palalau. Ko ʼihi ʼe nātou liliu ʼi he tahi temi ʼi te ʼaho pe ʼaia neʼe nātou fai palalau ai! ʼE vave fau koa tona fai? ʼI te agamāhani, ʼe mole koviʼia e te hahaʼi. Kae, ʼe ko te kaugā fai faka mafola ʼaē ʼe ina fai te ʼaʼahi, ʼaē ʼe tonu ke loto falala pea mo lototoʼa. Tou vakaʼi te ʼu faʼifaʼitaki ʼaē ʼe hoa mai.

²² Ko te kaugā fai faka mafola ʼe taʼu 13 neʼe fai faka mafola ʼi te tahi ʼaho, pea neʼe sio ki te ʼu fafine e toko lua ʼe nā ʼevaʼeva. ʼI tana manatuʼi te fakaloto mālohi ʼaē neʼe ʼui ai ke tou fai faka mafola ki te hahaʼi ʼi he potu pe ʼe tou maʼu atu kiai ia nātou, koia neʼe fakaōvi atu ai ki te ʼu fafine e toko lua ʼaia ʼaē neʼe haʼeʼele ʼi te ala. Neʼe nā fia logo ki te logo ʼo te Puleʼaga pea neʼe nā toʼo takitahi tanā tohi Te ʼAtamai Mālama. Neʼe nā tuku age ki te tēhina tūpulaga ʼaia tonā tuʼasila, pea hili kiai ʼaho e lua, pea neʼe toe liliu ʼo ʼaʼahi ia nāua, pea neʼe ina kamata ai tanā ʼu ako Tohi-Tapu.

²³ Ko he tuagaʼane neʼe ina fakatuʼutuʼu ke ina fai tana ʼaʼahi ʼi te vāhaʼa ʼaē ʼe hoa mai. Kae hili te ʼaho e tahi peʼe lua ki tanā ʼuluaki fai palalau pea neʼe ʼalu ʼo ʼave te nusipepa ki tana ʼaʼahi, ko te nusipepa ʼe talanoa ki te meʼa ʼaē neʼe nā ʼuluaki palalau kiai. Neʼe ina ʼui fēnei age ki ai: “Neʼe ʼau fakatokagaʼi te alatike ʼaenī pea ʼe ʼau ʼiloʼi ʼe ke fia lau anai te alatike ʼaia. ʼE mole feala anai hatā palalau fualoa, kae ʼe ʼau toe fia liliu mai anai ʼi te Feliafā hili hoʼatā ohage ko te meʼa neʼe tā fakatuʼutuʼu kiai. ʼE ke ava anai koa ʼi te ʼaho ʼaia?”

²⁴ Ka fia logo he tahi ki te moʼoni, ʼe tou ʼiloʼi papau ʼe hoko anai kia ia te ʼu fakafeagai. Ko tatatou foimo liliu ʼo ʼaʼahi ia ia, ʼe ina fakaloto mālohiʼi anai ia ia ke ina tauʼi te ʼu fihifihia ʼe fakatupu e tona ʼu famili, tona ʼu kāiga, pea mo ʼihi hahaʼi.

²⁵ Tou Uga Te Fia Logo ʼa Te Hahaʼi ʼAē ʼe Tou Maʼu ʼi Te ʼu Koga Meʼa ʼAē ʼe Kaugamālie Ai Te Hahaʼi: Tokolahi ia tatou ʼe tou leleiʼia te fai faka mafola ʼi te ʼu ala, ʼi te ʼu taulaga motokā, ʼi te ʼu kā, ʼi te ʼu fale koloā, ʼi te ʼu lotoʼā, pea mo te tahi ʼu faʼahi. ʼO hilifaki ki te tufa ʼo te ʼu tohi, ʼe tonu ke tou uga te fia logo ʼa te hahaʼi. ʼO ʼuhiga mo te fakatuʼutuʼu ʼaia, ʼe tonu anai ke tou faiga ke tou ʼiloʼi te ʼu higoa ʼo te hahaʼi ʼaē neʼe felāveʼi mo tatou, tonatou ʼu tuʼasila pea kapau ʼe feala, ke tou ʼiloʼi tonatou ʼu numelo telefoni. ʼE mole ko he meʼa faigataʼa te faʼahi ʼaia, mo kapau ʼe tou kole age kia nātou te ʼu meʼa ʼaia. ʼI te ʼosi ʼo te fai palalau, koutou toʼo takotou kaupepa pea koutou fehuʼi age: “ ʼE feala koa ke tā toe felāveʼi ʼi he tahi ʼaho ke hoko atu tatā fai palalau?” Peʼe tou ʼui fēnei: “ ʼE ʼau loto ke ke lau te alatike, ʼe ʼau ʼiloʼi papau ʼe ke leleiʼia anai. ʼE ke loto koa ke ʼau ʼaumai te nusipepa ʼaia ki tou ʼapi, peʼe ki te fale ʼaē ʼe ke gāue ai?” Ko te tahi tēhina ʼe ina fehuʼi fēnei age: “Koteā tou numelo telefoni, ke feala ai haku telefoni atu kia koe?” ʼE ina fakamatala fēnei, ia māhina e tolu ko te foʼi toko tolu neʼe nātou foaki age kia ia tonatou ʼu numelo telefoni.

²⁶ Tou Fakaʼaogaʼi Te Telefoni Ke Tou Maʼu Te Hahaʼi Pea Mo Tou Fakatuputupu Tanatou Fia Logo: Ko te tuagaʼane pionie ʼe ina fakaʼaogaʼi te telefoni moʼo faka mafola ki te hahaʼi ʼaē ʼe nonofo ʼi te ʼu falefata ʼaē ʼe mole feala hatatou hū kiai. Pea ʼaki te telefoni ʼe ina fai tana ʼu ʼaʼahi. ʼI tana ʼuluaki palalau, ʼe ina ʼui fēnei: “ ʼE ʼau ʼiloʼi ʼe mole ke ʼiloʼi ʼau. ʼE ʼau fia palalau mo te hahaʼi ʼo tokotou falefata, heʼe ʼau fia fakahā atu te manatu faka Tohi-Tapu. Kapau ʼe ʼi ai hou kiʼi temi, ʼe ʼau fia lau atu te fakapapau ʼaē ʼe tou maʼu ʼi te . . .” ʼI tana ʼosi lau te vaega, ʼe ina ʼui fēnei: “ ʼE mole lelei koa la mo kapau ʼe feala ke tou sio ki te hoko mai ʼo te temi ʼaia. Neʼe ʼau fiafia ʼi te lau atu ʼo te manatu ʼaenī. Kapau neʼe ke leleiʼia te manatu ʼaia, pea ʼe ʼau toe telefoni atu anai ke tā palalau ki he tahi vaega faka Tohi-Tapu.”

²⁷ ʼI tana lua telefoni, ʼe ina fakamanatuʼi kia ia tanā ʼuluaki fai palalau, pea mo ina ʼui age ʼe ina fia lau age kia ia ʼi te Tohi-Tapu te ʼu ʼaluʼaga ʼaē ka tou maʼu mokā pulihi anai te agakovi. Pea ʼe nā fai palalau fakanounou. ʼI tana ʼu fai telefoni, neʼe fakaafe ia ia e te toko 35 hahaʼi ki tonatou ʼapi, pea neʼe kamata ai te ʼu ako Tohi-Tapu e fitu! ʼI ʼihi temi ʼe faigataʼa koa kia koutou te ʼaʼahi ʼo te hahaʼi ʼaē ʼe fia logo ki te moʼoni, ʼuhi ko te tokakovi ʼo te ʼu ala, mo te ʼu afā, peʼe ko te mahaki? Kapau koia ʼaia, he koʼe koa ʼe mole koutou faka felogoi mo nātou ʼi te telefoni?

²⁸ Tou Taupau Te Fia Logo ʼa Nātou ʼAē ʼe Tou Maʼu ʼi Te ʼu Fale Gāue: ʼE lahi ʼaupito te gāue ʼaē ʼe tonu ke tou fai ʼi te ʼu fale koloā, ka mole gata ʼaki pe tatatou tufa ʼo te nusipepa. ʼE lahi te ʼu hahaʼi gāue koloā ʼe nātou fia logo ki te moʼoni, pea ʼe tonu ke tou gāueʼi te fia logo ʼaia. ʼI te tahi ʼu lakaga, ʼe feala ke tou fai palalau ki te Tohi-Tapu ʼi tonatou fale gāue, peʼe tou ako ai mo nātou te Tohi-Tapu. ʼI te tahi ʼu ʼaluʼaga, ko koutou pea mo ia ʼaē neʼe fia logo ki te moʼoni ʼe feala ke koulua fai palalau ʼi te temi mālōlō ʼi te fetapā, peʼe ʼi he tahi ʼu temi ʼe koutou fealagia ai.

²⁹ Ko te tagata taupau feʼaluʼaki neʼe fai palalau mo te tagata ʼe ʼi ai tona kiʼi fale koloā, pea ina ʼui age ki ai ʼe ina fia fakahā age peʼe feafeaʼi te fai ʼo te ako Tohi-Tapu. ʼI tana fehuʼi age ʼaē peʼe fualoa anai te fai ʼo te faʼahi ʼaia, neʼe tala age e te tagata taupau feʼaluʼaki ʼe fai pe anai ʼi te ʼu minuta e 15. Koia, neʼe ʼai e te tagata ʼo te fale koloā te pepa ki tona matapā, ʼe tohi ai: “ ʼE ʼau toe liliu mai ia minuta e 20,” pea neʼe nā heheka, ʼo nā fai palalau ai ki te ʼu ʼuluaki palakalafe e nima ʼo te tohi Te ʼAtamai Mālama. Neʼe ōfo ai te tagata fakamalotoloto ʼaia ʼi te ʼu meʼa ʼaē neʼe ina ako, pea neʼe ʼalu ai ʼi te ʼAhotapu ʼo te vāhaʼa ʼaia ʼo fakalogo ki te akonaki ʼaē ʼe fai ki te Kaugamālie pea mo te ako ʼo Te Tule Leʼo pea neʼe ina tali ke hoko atu te ako ʼi te vāhaʼa ka haʼu.

³⁰ Moʼo fakahā ʼo he ako ʼi he fale gāue, ʼe feala ke koutou fai te ʼu palalau ʼaenī: “ ʼE feala ke ʼau fakahā atu ia minuta e 15 peʼe feafeaʼi tamatou fai ʼo te ako Tohi-Tapu. Kapau ʼe feala, pea ʼe ʼau fiafia anai ʼi te fakahā atu kia koe peʼe feafeaʼi tona fai.” Pea koutou mulimuli ki te temi ʼaē neʼe koutou faka tuʼakoi kiai. Kapau ʼe mole feala ke loaloaga te fai palalau ʼi he fale gāue, pea ʼe lagi lelei age anai ke koutou fai palalau mo te tagata fai koloā ʼi tona ʼapi.

³¹ Tou ʼAʼahi Te Hahaʼi Tatau Aipe Peʼe Mole Nātou Toʼo He Tohi: Kapau ʼe koutou fakatokagaʼi ʼe fia logo he tahi ki takotou fai faka mafola, pea ʼe tonu ke koutou toe liliu ʼo ʼaʼahi ia ia, tatau aipe pe neʼe tou tuku he tohi ki ai peʼe kailoa. ʼE mahino ia, kapau ʼe koutou fakatokagaʼi ʼe mole fia fai moʼoni ia ki te logo ʼo te Puleʼaga, pea ʼe lelei anai takotou faiga ke koutou ʼolo ʼo faka mafola ki he tahi ʼu hahaʼi.

³² ʼI te gāue fai faka mafola, neʼe felāveʼi te tuagaʼane mo te fafine neʼe agalelei, kae neʼe mole ina tali te ʼu nusipepa. ʼE fakamatala fēnei e te kaugā fai faka mafola: “Lolotoga te ʼu ʼaho neʼe ʼau manatuʼi te fafine ʼaia, pea neʼe ʼau fakatuʼutuʼu ke ʼau toe ʼalu ʼo palalau mo ia.” Pea neʼe faikole te tuagaʼane, ʼo ina maʼu te lototoʼa, pea neʼe ʼalu ʼo fisifisi ʼi te matapā ʼo te ʼapi ʼo te fafine ʼaia. Neʼe fiafia ia ia he neʼe fakaafe e te fafine ke hū age ki fale. Neʼe kamata ai te ako Tohi-Tapu, pea neʼe toe hoko atu ʼi te ʼaho ake. ʼAki te temi, neʼe hū te fafine ʼaia ki te moʼoni.

³³ Tou Fakatuʼutuʼu Fakatomuʼa Ke Lahi Te ʼu Gāue ʼAē Ka Tou Fai: ʼE fakaloto mālohiʼi tatou ke tou fakaʼaogaʼi he temi ʼi te vāhaʼa fuli moʼo fai te ʼu ʼaʼahi. ʼE feala ke lahi te ʼu ʼaʼahi ʼaē ʼe tou fai mo kapau ʼe tou fai he ʼu fakatuʼutuʼu lelei. Koutou fakatuʼutuʼu ke koutou fai te ʼaʼahi ʼi te kolo ʼaē ka koutou fai faka mafola ai. Kapau ʼe koutou ʼolo motokā ki takotou fai faka mafola, ʼe tonu ke koutou fakatuʼutuʼu ke mole koutou hahaʼi fau, ke feala ai hakotou fai fuli te ʼu ʼaʼahi. ʼE tonu ke ʼiloʼi fakatomuʼa ʼe ia ʼaē ʼe ina uli te motokā pe kofea ʼaē ka fai ai te ʼu ʼaʼahi, ke ʼaua naʼa pulinoa totatou temi.

³⁴ Ko nātou ʼaē ʼe fua lelei tanatou fai te ʼu ʼaʼahi pea mo kamata te ʼu ako Tohi-Tapu, ʼe nātou ʼui ʼe tonu ke tou tokaga fakamalotoloto ki te hahaʼi, pea mo tou haga manatuʼi ia nātou ʼi te ʼosi fai ʼo te ʼaʼahi. ʼE toe ʼaoga foki ke tou teuteuʼi he manatu faka Tohi-Tapu ke tou palalau kiai, pea mo tou fakatuʼu te fakatafito ki te ʼaʼahi ʼi muʼa ʼo takita mavae. Tahi ʼaē meʼa, ʼe maʼuhiga ke tou foimo liliu ʼo fai te ʼaʼahi, moʼo taupau ai tana fia logo. ʼE tonu ke tou manatuʼi tuʼumaʼu ko tatatou fakatuʼutuʼu ʼe ko te kamata ʼo he ako Tohi-Tapu.

³⁵ Ko te lototoʼa ʼe ko he kalitate maʼuhiga ʼaia, mo kapau ʼe tou loto ke fua lelei te ʼu ʼaʼahi. ʼE tou maʼu feafeaʼi te kalitate ʼaia? ʼE tali e te ʼapositolo ko Paulo ʼo ina ʼui ‘ke tou lototoʼa’ ʼo fakahā te logo lelei ki te hahaʼi “ ʼuhi ko totatou ʼAtua.” Kapau ʼe tonu ke koutou tuputupu ʼi te faʼahi ʼaia, koutou faikole kia Sehova ke tokoni atu kia koutou. Pea ʼo mulimuli ki takotou faikole, koutou ʼaʼahi te hahaʼi ʼaē ʼe fia logo ki te moʼoni. ʼE mahino ia ʼe tapuakina anai e Sehova takotou ʼu faiga!

[Talanoa ʼo te pasina 3]

Koteā ʼAē ʼe Tonu Ke Koutou Fai Ke Fua Lelei Ai Takotou ʼu ʼAʼahi

■ Koutou fakahā ʼe koutou tokaga moʼoni ki te hahaʼi.

■ Koutou fili he manatu faka Tohi-Tapu ke koutou palalau kiai.

■ Koutou teuteuʼi te tafitoʼaga ʼo takotou ʼu ʼaʼahi.

■ ʼI takotou mavete, koutou manatuʼi ia ia ʼaē neʼe fai palalau mo koutou.

■ Koutou liliu ʼi he ʼaho e tahi peʼe lua ki muli mai ʼo fai te ʼaʼahi.

■ Koutou manatuʼi ko takotou fakatuʼutuʼu ʼe ko te kamata ʼo he ako Tohi-Tapu.

■ Koutou faikole ke koutou lototoʼa ʼo fai te gāue ʼaia.