Tou Taupau Te Fia Logo ʼo Fai He ʼu ʼAʼahi Fakapotopoto
1 Ko te akonaki fuli ʼe teuteu lelei ʼe ʼi ai tona ʼuluaki palalau ʼe lagaʼi ai te fia logo, te hoko pea mo he fakaʼosi palalau ke uga ai ki te fai ʼo he meʼa. Ko te ʼuluaki palalau ʼe ina faigaʼi ke fakalogo age nātou ʼaē ʼi te fono, kae kapau ʼe mole ʼi ai tona hoko pea mo te fakaʼosi palalau, ʼe mole katoa anai te akonaki. ʼE feiā aipe mo totatou minisitelio. ʼE lelei ia ke lagaʼi te fia logo ʼa he tahi lolotoga te ʼuluaki fai palalau, kae ʼe tonu ke hoko atu tatatou taupau te fia logo ʼaia ʼo fai he ʼu ʼaʼahi fakapotopoto.
2 He koʼe ʼe fakagafua e te ʼAtua te mamahi? ʼE ko he fehuʼi ʼaia ʼe uga ai ke fakakaukau. ʼE mole tuʼania ia koa te fahaʼi ʼaia e te hahaʼi e tokolahi ia ʼaho nei? Koia, ʼi te alatike ʼi ʼoluga, neʼe ʼekenakiʼi tatou ke tou lagaʼi te fehuʼi ʼaia ʼi te fakaʼosi ʼo te ʼuluaki fai palalau, ke feala ai hatatou tali ʼi te ʼaʼahi ki muli mai.
3 ʼE feala hatatou ʼui age:
◼ “Mālo tagata (peʼe fafine). ʼI tatā felogoi talu mai, neʼe tā vakaʼi te fehuʼi ʼaē ‘He koʼe ʼe fakagafua e te ʼAtua te mamahi?’ pea neʼe ʼau fakapapau atu ʼe ʼau toe liliu mai ʼo fakahā atu he ʼu manatu ki te faʼahi ʼaia. Tokolahi te hahaʼi ʼe ʼui maʼa nātou ka na pau la neʼe tokaga moʼoni te ʼAtua kia tatou ka na ʼaua la kua ʼosi ina pulihi te mamahi. ʼE lagi feiā foki takotou manatu? (Tuku ke fai mai hana tali.) ʼE fakamoʼoni mai te Tohi-Tapu ʼe tokaga moʼoni te ʼAtua kia tatou. [Lau ia 1 Soane 4:8.] ʼE ʼi ai te ʼu tupuʼaga lelei ʼo te fakagafua e te ʼAtua te mamahi ʼo aʼu mai ki te temi nei. Ko he tahi tupuʼaga ʼe tuʼu ia 2 Petelo 3:9. [Lau.] Ko ʼihi ʼatu tupuʼaga ʼe tuʼu ʼi te kaupepa ʼaenī.” Tou avahi te kaupepa ʼE tokaga moʼoni koa te ʼAtua kia tatou? ʼi te ʼu pasina 12 ki te 14 pea ke tou fakasiosio he manatu ʼaoga.
4 Ko ʼihi hahaʼi ʼe nātou loto anai ki he ʼu fakamahino loloto; ʼe lagi tonu anai ke tuʼa lahi tonatou ʼaʼahi ʼi muʼa ʼo hanatou loto katoa ki ai. Ko te ʼu kaupepa lalahi kehekehe ʼo te Sosiete ʼe tuʼu ai te ʼu manatu ʼe feala hatatou fakasiosio fakalelei te fehuʼi ʼaia.
5 ʼI te temi ʼaē ʼe fakaʼosi ai tatatou fai palalau, tou lagaʼi he tahi fehuʼi pea tou ʼui age ki ai ʼe tou fiafia anai mokā tou liliu mai ʼo fakahā age ki ai ʼihi ʼu manatu ʼe ʼaoga. Tokolahi ʼe nātou fia ʼiloʼi pe koteā te meʼa ʼe hoko ʼi te ʼosi ʼo te mate. He koʼe ʼe mole koutou fakatuʼutuʼu he ʼaho ke koutou fakasiosio ai te ʼu manatu ʼaia ʼi he temi ʼe ʼaoga?
6 ʼE ʼaoga anai ia ke taupau maʼu ʼi ta kita fakakaukau te ʼu fakatuʼutuʼu tāfito e tolu. Ke tau tatatou aga. Ko ia ʼaē ʼe palalau mo tatou ʼe lagi ʼe mole māhani ki te tāʼofi ʼo he temi totonu moʼo fai ai he fai palalau faka tohi-tapu. Ke fakanounou. Vakaʼi naʼa tou nofo fualoa peʼe lahi he ʼu manatu ʼe tou palalau ki ai ʼi te kamataʼaga. ʼI ʼihi fahaʼi, ʼe lagi leleiʼia anai tatatou ʼu ʼaʼahi ʼe ia ʼaē ʼe fai palalau mo tatou mokā tou palalau pe ki he ʼu kiʼi puani, pea ke fakanounou. Ke tou fiafia pea mo agaʼi kāiga. Tou fakahā age kia ia ʼe tou holi moʼoni ki ai.
7 Ko tatatou ʼuluaki fakatuʼutuʼu, ke kamata he fai palalau faka tohi-tapu mo he tahi. ʼOsi ʼaia, ʼe tou loto anai ke kamata he ako faka tohi-tapu ʼi tona ʼapi ke haʼele ki muʼa ʼi he tohi ʼe ʼaoga ki te fahaʼi ʼaia, ohage ko te tohi Mauli heegata. ʼE feala ke tou ʼiloʼi te fiafia ʼaia mokā ʼe tou taupau maʼu te fia logo ʼa he tahi ʼo fai he ʼu ʼaʼahi fakapotopoto.