Te ʼu ʼAʼahi Faigafua Pea Mo Fakapotopoto
1 ʼE tou tautau fai koa he ʼu ʼaʼahi, peʼe ʼi te agamahani ʼe tou lotovaivai ʼi tona fai koteʼuhi ʼe mole tou ʼiloʼi pe koteā te meʼa ke tou palalau ki ai? E mole ʼaoga te mataku ʼi te fai ʼo te ʼu ʼaʼahi. Moʼo fakapotopoto ʼi te gāue ʼaia, ʼe tonu ke tou tokaga ki te ʼu puani e tolu: 1) ke tou teuteu lelei; 2) ke feala hatatou fakahā he manatu e tahi peʼe lua ʼo ʼuhiga mo he ʼu talanoa faka tohi-tapu faigafua; 3) ke tou lotolelei ʼo fakalogo ki te manatu ʼa te hahaʼi.
2 Ka ʼe tou teuteu ʼo fai he ʼaʼahi, tou fakakaukauʼi he kupu ʼe ʼaoga ke tou fai palalau ki ai. Ko ia ʼaē ʼe palalau mo tatou ʼe ko he tahi koa kei ako? Neʼe tou lagaʼi koa he fehuʼi ʼi te fakaʼosi ʼo tatatou ʼaʼahi kua hili? Neʼe fia logo koa ia ki he faʼahi tāfito? Tou toe vakaʼi tatatou ʼu nota, pea tou kumi ʼi te tohi Comment raisonner te ʼu manatu ʼe ʼaoga kia tatou moʼo fai ʼo he ʼaʼahi fakapotopoto. Lolotoga te ʼaʼahi, ke tou loto māfana pea mo agaʼi kāiga. Tou fakamālo kia ia ʼo toʼo tona higoa.
3 Kapau neʼe ina tali Te Tule Leʼo pea mo te Koutou ʼaʼala! ʼi tatatou ʼaʼahi kua hili, ʼe feala ke tou fakatafito te fai palalau ki he manatu faigafua e tahi peʼe lua neʼe fili ʼi he nusipepa. Kapau neʼe tou tuku he kiʼi pepa lotu, ʼe feala pe ke tou fakamatala te kiʼi pepa lotu, peʼe hoko atu te fai palalau ʼo fakaʼaogaʼi he manatu ʼaoga ʼo he nusipepa peʼe ko he kaupepa.
4 Kapau neʼe tou tuku te kiʼi pepa lotu “Quel espoir y a-t-il pour nos chers disparus?”, ʼe feala hatatou kamata te fai palalau ʼaki te ʼu fakatokaga ʼaenī:
◼ “ ʼI te ʼosi ʼo tata felogoi fakamuli, neʼe ʼau tuku atu te kiʼi pepa lotu ko tona kupu Quel espoir y a-t-il pour nos chers disparus? Ko te palakalafe tolu ʼe ina lagaʼi te ʼu fehuʼi ʼaoga ʼaenī: ‘He koʼe koa ʼe mate te tagata? E ʼifea te kau mate? ʼE feafeaʼi tatatou ʼiloʼi papau ʼe feala tanatou toe maʼuʼuli?’ Ko te kupu ‘Ko te mate, pea mo te meʼa ʼaē ʼe hoko ʼi te mate’ ʼe tali ki te ʼu fehuʼi takitahi ʼaia. Neʼe ʼau haʼu mo te kiʼi pepa lotu ʼaia. Vakaʼi muʼa te meʼa ʼaē ʼe tuʼu ʼi te palakalafe fā.” ʼO tuku he fealagia kia ia ke ina muliʼi te lautohi, tou lau te palakalafe pea mo te ʼu vaega e lua ʼe tuʼu ʼi ai, ʼosi ʼaia pea tou fehuʼi age ki ai pe koteā la tana manatu. Tou fakalogo fakalelei ki tana tali pea hoko atu te fai palalau ʼo mulimuli ki tana manatu.
5 Lolotoga te fai palalau, ʼe feala ke tali mai e ia ʼaē ʼe fai palalau mo tatou he ʼu manatu hāla. ʼE mole ʼaoga ta kita fai he ʼu palalau moʼo fakafeagai. Tou faiga ke tou nofo tuʼumaʼu ʼi te manatu ʼe tou lolotoga palalau ki ai. ʼE feala anai ke tou fakatotonuʼi he ʼu manatu ʼe mole tuʼu ʼi te Tohi-Tapu lolotoga tatatou ʼu ʼaʼahi ki muli mai.
6 ʼI ʼapelili, tou kumi te ʼu faʼahiga meʼa moʼo taupau ʼo te fia logo ʼo fai he ʼu ʼaʼahi faigafua pea mo fakapotopoto.