Tou Fakaʼaogaʼi Te Tohi Mauli O Heegata ʼi Tatatou ʼu ʼAʼahi
1 Neʼe ʼiloʼi e te ʼapositolo ko Paulo te maʼuhiga ʼaē ʼo te tokaga lelei ki te ʼu hahaʼi ʼaē ʼe fia fai ki te moʼoni. Neʼe ina fakatā nātou ki te ʼu fuʼu ʼakau fakaʼeteʼete gataʼa, ʼaē ʼe tonu ke fakavai tuʼumaʼu pea mo tokaga lelei ki ai (1 Ko. 3:6-9). ʼO tatau mo te temi nei, ko te hahaʼi ʼaē ʼe fia logo ʼe ʼaoga kia nātou ke tou fakatokaga leleiʼi nātou mokā ʼe tou ʼaʼahi nātou ke haʼele ai ki muʼa tonatou tuputupu fakalaumālie.
2 Tou manatuʼi ko te ʼu hahaʼi ʼaē ʼe tou ʼaʼahi ʼe ʼaoga kia nātou ke tou fakamanatuʼi age tatatou fai palalau ki muʼa atu. Koia ʼe ʼaoga ai, ʼi te ʼaʼahi fuli, ke toe vakaʼi te ʼu manatu ʼaē neʼe tou vakaʼi fakamuli, ʼo fakamanatuʼi te ʼu puani tafito ʼaē neʼe ina leleiʼia. Faigaʼi ke kau mo ia ki te fai palalau pea ke koutou fakasiosioʼi te meʼa ʼe ʼaoga kia ia.
3 Lolotoga he ʼaʼahi, pe neʼe koutou tuku peʼe kailoa te tohi ʼaē “Mauli O Heegata”, ʼe lagi koutou fia kamata anai he ako faka tohi-tapu ʼaki te manatu fakahagatonu ʼaenī:
◼ “Tokolahi te hahaʼi ʼe palalau mo tatou neʼe nātou maʼu te ʼu tali ki tanatou ʼu fehuʼi ʼaē ʼo ʼuhiga mo te Tohi-Tapu ʼaki te tokoni ʼa te tohi ʼaenī.” ʼOsi ʼaia, ʼi te avahi ʼo te tohi Mauli O Heegata ʼi te tanakiʼaga, ʼe feala ha kotou fehuʼi age: “Ko te manatu fea ʼaē ʼe koutou fia ʼiloʼi? ” Koutou avahi te tohi ʼi te kapite ʼaē neʼe ina fili pea fakahā ki ai ko te ʼu palakalafe ʼe tuʼu numelo ʼe ʼalu tahi mo te ʼu fehuʼi ʼi lalo ʼo te pasina; ʼe feala ai foki tana fakasiosioʼi te ʼu manatu tāfito ʼo te ʼu palakalafe. Vakaʼi pe he ʼu manatu, ʼosi ʼaia pea koutou fakatuʼutuʼu mo ia he ʼaho totonu ke koutou toe haʼu ai.
4 ʼE feala foki ke koutou ʼui age:
◼ “Neʼe ʼau leleiʼia tata fai palalau ʼi te vāhaʼa kua ʼosi. Tokolahi te hahaʼi ʼe nātou fehufehuʼi pe koʼe ʼe hoholo tatatou ʼomai ki tonatou ʼu ʼapi. Neʼe ʼau manatu ki te meʼa ʼe tuʼu ʼi te pasina 29 ʼo te tohi ʼaenī, E Feala Keke Mauli O Heegata Ite Palatiso Ite Kele, naʼa ʼe ke fia logo ki ai. [Koutou lau te palakalafe 11.] ʼI te ʼu meʼa neʼe hoki ʼosi nei pe ʼi tata lau, ʼe feafeaʼi koa tatatou tauhi, ʼi takotou manatu, ke lelei ai ki te ʼAtua? [Tuku ke fai mai hana tali, ʼosi ʼaia pea fakamālo age ki ai.] ʼI te temi ʼo Sesu, neʼe ʼi ai te ʼu hahaʼi neʼe nātou manatu ʼe leleiʼia e te ʼAtua tanatou lotu. Koutou sio ki te meʼa neʼe ʼui ʼo ʼuhiga mo nātou ʼaia, ʼi te palakalafe 2 ʼo te kapite ʼaenī.” Koutou lau pea mo fakamahino te palakalafe ʼaia.
5 Ki he tahi neʼe ina tali te tohi “Mauli O Heegata”, ʼe feala ke koutou ʼui age:
◼ “ ʼI taku haʼu fakamuli, neʼe ta palalau ki te ʼaluʼaga faka malamanei, ʼaē ʼe ʼaoga ke fetogi. Neʼe kua koutou fehuʼi koa pe koʼe neʼe fakagafua e te ʼAtua te agakovi? ” Tuku ke fai mai hana tali, ʼosi ʼaia koutou avahi te tohi ʼi te pasina 99, ʼi te palakalafe 2, pea koutou fakahā age te ʼu fehuʼi ki te ako. Koutou lau te palakalafe ʼaia pea ke koutou fai palalau ki ai ʼo fakaʼaogaʼi te ʼu vaega. ʼE feala ke lelei takotou fai palalau ʼo fakahā age te ʼu fakatā neʼe tou fili ʼi te tohi ʼaia, ohage la ko te ʼu pasina 78, 84, 85, 119, 147, 149-153 pea 156-158.
6 Mokā neʼe tou tuku he kiʼi pepa lotu: ʼI ʼihi faʼahi, ʼe tou tuku he kiʼi pepa lotu ʼi tata ʼuluaki felogoi. ʼI te toe ʼaʼahi ʼo ia ʼaia, ʼe feala ke koutou fai palalau ki he palakalafe e tahi peʼe lua ʼi te kiʼi pepa lotu ʼaia ʼo feiā foki mo te ʼu vaega ʼe tuʼu ʼi ai. Fakahā age ki ai he vaega ʼe tuʼu ʼi te kiʼi pepa lotu ʼaia pea ʼe palalau ki ai te tohi Mauli O Heegata. Kapau ʼe fia logo ia, ʼe lagi feala anai ke koutou fakahā age te tohi Mauli O Heegata pea mo fakatuʼutuʼu mo ia he ʼaho ke toe hoko ai te fai palalau.
7 ʼI hatatou tokaga lelei anai ʼo fakapala te ʼu fuʼu ʼakau fakaʼeteʼete gataʼa ʼaē ʼe fakatupu e te tui faka kilisitiano pea kua tuku mai ke tou taupau, ʼe fakatuputupu anai nātou e te ʼAtua ke fakavikiviki pea mo faka kolōlia ʼo ia. — 1 Ko. 3:7.