Tou Fakavikiviki Ki Te ʼAtua Te Tupuʼaga
1 Ko te ʼu fuga fenua taulekaleka, te ʼu to ʼo te laʼā lanu kehekehe, he lagi ʼe fonu ai te ʼu fetuʼu, te hiva matamatalelei ʼo te ʼu manu lele: Ko ai koa ʼaē ʼe tau ke tou fakamālo ki ai ʼo ʼuhiga mo te ʼu meʼa fakatalakitupua ʼaia? Mole he mahalohalo ki ai, ʼe uga tatou ke tou fakavikiviki ki te ʼAtua te Tupuʼaga. ʼE tou kau mo te loto katoa ki te manatu ʼaē ʼe tuʼu ia Fakahā 4:11. ʼI tana fakatupu ia meʼa fuli, ko Sehova ʼAtua ʼe tau ia mo ʼatatou fakavikiviki.
2 Logope te fakamoʼoni ʼo te meʼa ʼaē neʼe fakatupu e te ʼAtua, ko te ʼu tagata ʼe nātou lagolago pe te manatu ʼaē ʼe ʼui ko te maʼuli neʼe hā fakafokifā mai, peʼe neʼe hoko ʼaki he evolisio. Ko te loi ʼaupito ʼaia ʼe fakahālaʼi pea mo fakaloto vaivai te hahaʼi. Pea, ʼe ko he lea kovi lahi ʼaia ki totatou Tupuʼaga lahi. — Tnk. 12:1; Lom. 1:20, 25.
3 ʼI sepetepeli, ia tatou ʼaenī ko te ʼu kaugana agatonu ʼa Sehova, ʼe ia tatou te fealagia ʼo fakahā te moʼoni ʼo ʼuhiga mo totatou Tupuʼaga pea mo tana ʼu gāue taulekaleka. ʼE tou fakahā te tohi La vie: comment est-elle apparue? Evolution ou création? ki te hahaʼi fuli ʼaē ʼe nātou holi fakamalotoloto ke nātou ʼiloʼi te kamataʼaga pea mo te ikuʼaga ʼo te maʼuli. Ko te tohi ʼaia ʼe ina teuteuʼi tatou ke tou tauʼi fakamālohi te moʼoni ʼo ʼuhiga mo te kamataʼaga ʼo te maʼuli.
4 Te ʼu telituale makehe: ʼI tuʼa atu ʼo te fai faka mafola ʼi te ʼu ʼapi, tou fai he faiga makehe moʼo palalau ki te hahaʼi ʼaē ʼe fia logo tafito ki te evolisio peʼe ko te fakatupu; tou palalau mo nātou ʼi te ʼu fahaʼi ʼe nātou gāue ai. Te ʼu avocats, te ʼu tōketā, te ʼu faiako neʼe nātou leleiʼia te ʼu kumi loloto pea mo te fakamoʼoni ʼaē ʼe tuʼu ʼi te tohi Création (yb87 p. 54). Ko nātou ʼaē ʼe felāveʼi anai mo tatou ʼe lagi nātou holi anai ke nātou maʼu te tohi ʼaia ʼe lahi ai te ʼu paki taulekaleka, ke feala ai hanatou fakaʼaogaʼi.
5 ʼE ko he aga poto te fakahā ʼi te temi fuli pe te tohi Création ki te ʼu hahaʼi ʼaē ʼe felāveʼi mo tatou. Kae kapau ʼe tou palalau ki he puani totonu e tahi peʼe lahi ʼo te tohi ʼaia ʼe ʼaoga ke akoʼi pea ʼe ina fakamālohi te tui ki he Tupuʼaga, ʼe tou maʼu anai he ʼu hahaʼi ʼe fakaʼamu ke lahi age tanatou ʼiloʼi. Ko nātou ʼaia ʼe tou fia fakahā ki ai te tohi Création.
6 Ke feala te tokoniʼi e te tohi ʼaia he hahaʼi ʼe tokolahi ke nātou mahino ki te loi ʼaē ʼo te fakatuʼutuʼu ʼo te evolisio, kae ke ia nātou te fakafetaʼi ʼo ʼuhiga mo te meʼa ʼofa ʼaē ko te maʼuli! Ko te tohi ʼaia ʼe ina lagaʼi ia nātou ke nātou holi ki te maʼuli heʼegata ʼi te kolōlia ʼo Ia ʼaē neʼe ina fai te meʼa ʼofa ko te maʼuli, “te Tupuʼaga ʼo te lagi pea mo te kele”. — Pes. 146:6.