Ko Te ʼu Fakahā ʼe Lagaʼi Ai Te Fia Logo
1 ʼE tonu anai ke tuʼumaʼu tatatou tokaga fakafiafia pea mo takitokotahi ki te ʼu hahaʼi ʼe felāveʼi mo tatou ʼi te fai faka mafola. Ko te fehuʼi age ʼaē ʼo tanatou manatu, ʼe tou fakahā ai ʼe tou fakaʼapaʼapa ki tanatou faʼahiga manatu. Ko te palalau ka tou vakaʼi pea mo te ʼu fehuʼi ʼe tou fai ʼe feala ai ke nātou fakakaukau pea mo feala ke lahi ai tanatou fia mahino ki te ʼAtua pea mo tana fakatuʼutuʼu ʼo ʼuhiga mo te malamanei.
2 ʼI sepetepeli, ʼe tou faigaʼi anai te hahaʼi ke nātou fakasiosio ki te moʼoni ʼo ʼuhiga mo te fakatupu ʼo fakahā te tohi La vie: comment est-elle apparue? Evolution ou création? Tou toʼo he temi moʼo toe vakaʼi ʼo te tohi ʼaia pea tou fili he ʼu manatu totonu ke fakahāhā. Ka tou palalau anai ki ni ʼu puani ʼo te tohi Création, tou avahi te tohi pea tou fakatoʼo age kia ia ʼaē ʼe palalau mo tatou. Tou fakahā age he ʼu paki pea mo te ʼu talanoa totonu. Ke tou fiafia mokā tou fakahā te maʼuhiga ʼo te tohi lelei ʼaia.
3 ʼI te ʼosi ʼo tatatou fakahā fakafiafia ia tatou, ʼe feala ke tou ʼui age:
◼ “Ko totatou temi kua hikihiki ki muʼa pea ʼe lahi te poto, ʼe ko he aga poto koa te tui ki he ʼAtua neʼe ina fakatupu tatou, ʼo toe feiā foki ki te fetuʼu taulekaleka ʼaenī ʼe tou nonofo ai? [Tuku ke fai mai hana tali.] Ka tou fakakaukauʼi te ʼu laulahi ʼo te kele pea mo te ʼatulaulau katoa, ʼo feiā foki ki te ʼu meʼa taulekaleka fuli ʼe ʼi ai, ʼe tou puna’maʼuli ki tona tokalelei pea mo tona faʼahiga fakatupu. ʼE mole koa la ko he fakamoʼoni ʼaia ʼe ʼi ai he Tupuʼaga? Koutou vakaʼi te fakakaukau ʼe fai e te Tohi-Tapu. [Lau ia Hepeleo 3:4.] ʼI te agamahani, ko te ʼapi fuli ʼe ko he gāue ia ʼa he tagata tohi fale pea mo he tagata laga fale. [Toʼo te tohi Création mai te kato pea avahi ʼi te paki ʼo te pasina 114.] Te ʼatulaulau ʼe fakatalakitupua! ʼE koutou manatu koa neʼe feala hana tupu tokotahi?” Tou avahi te tohi ʼi te pasina 122 pea tou lau te talanoa ʼaē ʼe tuʼu ʼi te lalo paki ʼo te ʼuasi. ʼE toe feala foki ke tou fakaʼaoga te paki ʼo te pasina 127 pea mo te vaega ʼaē ʼe tuʼu ʼi lalo ifo. ʼE tou maʼu anai ʼihi manatu ʼaoga ʼi te tohi Comment raisonner, ʼi te ʼu pasina 72 ki te 77.
4 Peʼe feala ke tou ʼui age:
◼ “ ʼI takotou tonu, koteā anai te meʼa ke fai ke maʼu e te hahaʼi te tokalelei pea mo te fiafia moʼoni ʼi te kele? [Tuku ke fai mai hana tali.] ʼE ʼui mai e te Tohi-Tapu ʼe tonu ke tou manavasiʼi ki te ʼAtua pea mo tou fakamoʼoni ko ia ko te Tupuʼaga ʼo te lagi pea mo te kele.” Tou lau ia Fakahā 14:7, pea tou avahi te tohi Création ʼi te ʼu pasina 140 pea mo 141 pea tou lau mo kapau ʼe feala te ʼu palakalafe 24 pea mo 25; ʼe nātou fakamahino mai ko te kele neʼe fakatupu ke nofoʼi e te tagata. Pea, tou fakamahino age ʼaki te kapite 19 ko te Palatiso ʼi te kele kua vave pe tona fakatuʼu.
5 Kapau ʼe ʼui mai ʼe he tahi ʼe mole faʼa tui ia ʼe ʼi ai he Tupuʼaga, ʼe feala ke tou ʼui age:
◼ “Tokolahi te ʼu hahaʼi ʼe manatu tahi mo koutou, tafito mokā ʼe nātou sisio ki te ʼu mamahi ʼaē ʼe tau mo te mālama. Kapau ʼe ʼi ai he ʼAtua, he koʼe ʼe ina fakagafua te mamahi? ʼE koutou maʼu koa he fakamatala fakapotopoto?” ʼO mulimuli ki te tali, ʼe feala ke hoko atu te fai palalau ʼo tou fakaʼaogaʼi te kapite 16 ʼo te tohi Création. Kapau ʼe mole faʼa fia logo ia ia ʼaē ʼe palalau mo tatou, ʼe feala pe ke tou fakahā he manatu tafito e tahi peʼe lua ʼo te alatike “He koʼe koa ko te hahaʼi agalelei ʼe nātou mamahi?”, ʼe hā ʼi Te Tule Leʼo ʼo te ʼaho 15 ʼo sepetepeli 1992. ʼE tou maʼu anai ʼihi ʼu tali ʼaoga ki te fehuʼi ʼaia ʼi te tohi Comment raisonner, ʼi te pasina 381. ʼI ʼihi temi ʼe ʼaoga te tuku ʼo te kiʼi pepa lotu ʼaē Pourquoi avoir confiance en la Bible.
6 Ko totatou maʼua ʼe mole gata pe ʼi te lagaʼi ʼo te fia logo ki te logo ʼo te Puleʼaga, kae kau ai foki mo te kamata ʼo he ʼu ako faka tohi-tapu. ʼE tou fiafia moʼoni ʼi tatatou maʼu te tohi ʼaia mo tana ʼu paki taulekaleka ʼaē ʼe ina fakahāhā te moʼoni ʼo ʼuhiga mo te fakatupu pea ʼe ina fakavikiviki totatou Tupuʼaga lahi. Ke tou fakaʼaoga fakaleleiʼi moʼo lagaʼi te fia logo ʼa te hahaʼi fakamalotoloto ʼaē ʼe felāveʼi anai mo tatou ʼi sepetepeli!