ʼE Feala Koa Hatatou Lagaʼi Te Fia Logo?
1 “Manuʼia ia nātou ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou.” (Mat. 5:3). Ko te ʼu palalau ʼaia neʼe fai e Sesu ʼi tana Akonaki ʼi te moʼuga ʼe ʼi ai tona ʼuhiga tafito. Tokosiʼi pe te hahaʼi ʼaē ʼe nātou ʼiloʼi ko te maʼuli fīmālie pea ʼe ʼi ai hona ʼuhiga ʼe pipiki tahi ki te ʼu fehuʼi fakalaumālie. Ko ʼihi neʼe nātou ʼiloʼi ʼi he kiʼi temi te maʼuhiga ʼo te ʼu meʼa fakalaumālie kia nātou, ʼosi ʼaia pea puli te manatu ʼaia ia nātou. ʼOnatou maliu mai ʼi te ala ʼaē ʼe maʼu ai te ʼu manuʼia moʼoni. Koia ʼaē neʼe fai ai te fehuʼi ʼaenī: ʼe feala koa hatatou toe lagaʼi te fia logo ʼa he ʼu hahaʼi feiā? ʼE ko he meʼa manuʼia ia, heʼe feala te faʼahi ʼaia ki niʼihi.
2 ʼE lagi ʼe feala hatatou ʼiloʼi he tahi neʼe ina ako te Tohi-Tapu mo te kau Fakamoʼoni ʼa Sehova kua hili ki ai he ʼu taʼu, peʼe lagi ʼi tona kei veliveli, kae ʼe mole kei fakatahi ia mo te ʼu kaugana ʼa te ʼAtua. Kae, neʼe mole galo ia te ia te ʼu meʼa ʼaē neʼe ina akoʼi pea mo te ʼu fakatuʼutuʼu totonu ʼa te Tohi-Tapu ʼaē neʼe lave ki ai. ʼUhi ko te ʼu faʼahiga meʼa ʼo te mālama kua ʼāsili kovi ia pea ko te ʼu ʼaluʼaga ʼo te maʼuli kua fetogi ia, ʼe ina manatuʼi te ʼu meʼa ʼaē neʼe ina ako. ʼE feala anai ke haga ki te ʼAtua pea mo loto ke ina maʼu ʼo lahi age tana mālama faka tohi-tapu. ʼE feala ai ke tou maʼu he ʼu ikuʼaga lelei mokā ʼe tou ʼolo ʼo ʼaʼahi he ʼu hahaʼi feiā ʼaki te manatu ʼaē ke toe fai te ako faka tohi-tapu.
3 ʼI he tahi ʼu temi, tou faiga ʼo ʼaʼahi ia nātou ʼaē neʼe ʼomai ki te ʼaho Fakamanatu. Tou fakahā age ʼe tou loto fakamalotoloto ki tonatou ʼu lelei fakalaumālie, pea tou fakaafe nātou ke fai hanatou ako faka tohi-tapu mo tatou. ʼE tonu foki ke tou fai he faiga makehe moʼo tokoniʼi ʼonatou ʼaē neʼe hoki ʼomai ki te fakatahi faka tisitilike “Toʼo ʼo te mālama”. ʼI ʼihi temi, ʼe lelei ke ʼaʼahi ʼe he tahi kehe ʼi te kau faka mafola he tahi neʼe tuku tana ako ʼuhi he neʼe mole haʼele ia ki muʼa.
4 ʼE moʼoni ia ko te ʼu hahaʼi ʼaē ʼe ako mo tatou ʼe tonu ke nātou fai fakamalotoloto te tauhi ʼo Sehova pea ke nātou fakahā ʼo hoholo atu tanatou ako te Tohi-Tapu. Kae, ki totatou fahaʼi, tou tokaga ʼo vakaʼi pe neʼe tou fai ia meʼa fuli moʼo tokoniʼi ʼonatou, pea ke ia tatou te ʼu kalitate ʼo ʼuhiga mo te kāiga ohage ko te apositolo ko Paulo ʼi tana ʼui ʼaē: “ ʼE ʼau maʼa ʼi te toto ʼo te tagata fuli pe.” — Gāue 20:26.