Ko He Tokoni ʼe Faigafua Tona Maʼu
1. Koteā ʼaē ʼe feala ke vaivai ai he tahi ʼi te faʼahi fakalaumālie?
1 Ko Anna, ko te tuagaʼane neʼe mole kau tona ʼohoana ʼi te kau Fakamoʼoni pea neʼe maʼumaʼua ʼaupito ʼuhi ko tana gāue, neʼe faigataʼa kiā ia te kau tuʼumaʼu ki te ʼu fono, mo tana fai faka mafola, pea mo tana ako ia te Folafola ʼa te ʼAtua. Neʼe kei ʼofa kiā Sehova, kae neʼe mole kei kau ki te ʼu gāue ʼo te kokelekasio. Pea neʼe tokoni age te kau tagata ʼāfea ki tona maʼuli fakalaumālie.
2. ʼE lava liliu feafeaʼi te kau Kilisitiano fuli ko he tokoni ʼe faigafua tona maʼu?
2 Ko he tahi ʼe ina tali te tokoni fakalaumālie mai te kokelekasio, ʼe ina fakahā ai tana falala ʼaē kiā Sehova. ʼE faʼifaʼitakiʼi e te ʼu tagata ʼāfea ia te tokaga fonu ʼi te ʼofa ʼa Sesu Kilisito, ʼo nātou kumi he ʼu faigamālie moʼo fakaloto mālohi pea mo tokoni kiā nātou ʼaē ʼe faigataʼaʼia ʼi te faʼahi fakalaumālie. (1 Tes. 5:14) ʼI ʼihi temi, ʼe lagi ʼaoga pe he ʼu palalau fakaloto mālohi ʼaki he ʼu vaega faka Tohi-Tapu ʼe fakaloto fīmālie. ʼE mole ko te kau tagata ʼāfea pe ʼaē ʼe feala ke nātou tokoni kiā nātou ʼaē ʼe vaivavai faka temi, kae ʼe ko te kau Kilisitiano fuli. ʼE mahino ia ʼe tou ʼiloʼi fuli te mālohi ʼo “he palalau [agalelei] ʼe fai ʼi tona lakaga totonu.”—Taag. 25:11; Isa. 35:3, 4.
3, 4. Koteā ʼaē ʼe tonu ke tou fai moʼo tokoni ki ʼihi, pea ʼe feafeaʼi hatatou fai ia te faʼahi ʼaia?
3 Tou Fai Hatatou Fakatuʼutuʼu Takitokotahi Moʼo Tokoni: Kapau ʼe tou fia fakahā tatatou ʼofa kiā nātou ʼaē ʼe ʼaoga kiai he tokoni, pea ʼe tou fai anai hatatou fakatuʼutuʼu takitokotahi, mo tou loto mahino, pea mo loto fakamalotoloto. ʼI te temi ʼaē neʼe ʼiloʼi ai e Sonatane neʼe nofo Tavite ʼi te faigataʼaʼia, neʼe “tuʼu ake ʼo ʼalu kiā Tavite ʼi Olesi, moʼo fakaloto mālohiʼi ia ia ʼo ʼuhiga mo te ʼAtua.” (1 Sam. 23:15, 16) Koutou tokoni ʼaki he agalelei. Kapau ʼe tou fai he ʼu palalau ʼaki te ʼofa moʼoni, pea ʼe fua lelei ʼaupito anai. Tahi ʼaē meʼa, ʼaki he lea fakatātā, neʼe fakahā lelei e Sesu ko te toe maʼu ʼo totatou tēhina peʼe ko totatou tuagaʼane fakalaumālie, ʼe fakamaʼua kiai he ʼu faiga mālohi. (Luka 15:4) Kapau ʼe tou fia tokoni moʼoni ki he tahi, ʼe tou faʼa kātaki anai ʼo tokoni ki ai tatau aipe peʼe mole ʼiloga vave anai he ʼu fetogi iā ia.
4 ʼE ko he meʼa fakaloto mālohi mokā tou ʼolo ʼo kole ki ʼihi, ohage ko nātou ʼo totatou ako tohi, ke tou gāue fakatahi ʼi te minisitelio! Ka tou tokoni ki hotatou tēhina ʼi te minisitelio, ʼe ko he faigamālie ʼaia ke tou fakaloto mālohiʼi ia ia ke lagolago lelei ki te gāueʼaia. Ko te ʼu temi fakafiafia ʼaia ʼaē ʼe tou fakaʼaogaʼi ʼi te tauhi kiā Sehova, ʼe fakaloto mālohi tāfito kiā nātou ʼaē ʼe nātou faiga ke nātou toe maʼu tonatou mālohi fakalaumālie.
5. ʼI ʼihi ʼu ʼaluʼaga, koteā te tokoni ʼaē ʼe feala ke foaki e te kau tagata ʼāfea?
5 Ko He Fakatuʼutuʼu ʼOfa: Ko nātou ʼaē kua fualoa tanatou mole kei kau ki te gāue fai faka mafola peʼe mole kei fakatahi mo te kokelekasio, ʼe feala ke tou toe tokoni kiā nātou ke toe mālohi tanatou tui. ʼE lagi tonu anai ke tou toe fai hanatou ako Tohi-Tapu ʼaki te tohi Koutou Atolasio Ki Te ʼAtua Moʼoni Pe e Tahi, te tohi Approhez-vous de Dieu, peʼe ko te tohi Koteā ʼAē ʼe Akoʼi Moʼoni Mai ʼi Te Tohi-Tapu? Kapau ʼe kua papitema, pea ʼi te agamāhani ʼe mole ʼaoga anai ke fualoa te ako Tohi-Tapu ʼaia. Ko te komite gāue ʼo te kokelekasio ʼe tonu ke ina vakaʼi peʼe ko ai ʼaē ʼe ʼaoga anai ki ai ia te fakatuʼutuʼu ʼaia.—Vakaʼi Te Tali Ki ʼAkotou Fehuʼi ʼo Te Minisitelio ʼo Te Puleʼaga ʼo Novepeli 1998 pea mo Novepeli 2000.
6. Koteā ʼaē neʼe ina faka fealagia ki he tuagaʼane ke toe mālohi ʼi te faʼahi fakalaumālie?
6 Ko Anna, ʼaē neʼe tou talanoa ki ai ʼi te kamata, neʼe ina tali te tokoni ʼa te kau tagata ʼāfea, ke fai hana ako mo he tuagaʼane kua fotufotuʼa ʼi te faʼahi fakalaumālie. Hili pe te tuʼa fā ʼo tana ako, pea neʼe toe fakaōvi ai kiā Sehova. Neʼe toe kau ki te ʼu fono pea neʼe toe fia fakavikiviki kiā Sehova ʼAtua iā muʼa ʼo te hahaʼi. Neʼe toe tokoni kiā ia te tuagaʼane fotufotuʼa ʼi te minisitelio, ʼo nā kaugā olo ki te ʼu ako Tohi-Tapu ʼo aʼu ki tana kua mālohi moʼo fai faka mafola ʼi te ʼu ʼapi. Ko te meʼa ʼaē neʼe ʼaoga tāfito kiā ia, neʼe ko he tokoni ʼofa ke feala hana toe kau ki te ʼu gāue fakalaumālie.
7. Koteā te ʼu tapuakina ʼaē ʼe tou maʼu ʼi tatatou fe fakalotomālohiʼaki ʼi te faʼahi fakalaumālie?
7 ʼE tou maʼu fuli he ʼu tapuakina mokā tou fakaloto mālohiʼi ia nātou ʼaē ʼe faigataʼaʼia. Ko ia ʼaē ʼe tokoniʼi ʼe ina maʼu te fiafia ʼaē ko te fakaōvi kiā Sehova pea mo toe kau ki te ʼu gāue ʼo Tana kautahi. ʼE fiafia te kau tagata ʼāfea ʼi tanatou sisio ki te tuputupu fakalaumālie ʼaia. (Luka 15:5, 6) ʼE felogoi lelei te kokelekasio ʼi te logo tahi, heʼe nātou fefakahāʼaki fuli te feʼofaʼofani. (Kol. 3:12-14) ʼE ko te ʼu tupuʼaga lelei ʼaia ke tou faʼifaʼitakiʼi ia Sehova, ʼaē ko he tokoni ʼe faigafua tona maʼu!—Ef. 5:1.