Te Tali Ki ʼAkotou ʼu Fehuʼi

◼ ʼE kei lelei koa ke tou fai he ako Tohi-Tapu mo he tēhina peʼe ko he tuagaʼane kua fualoa tana mole kei fai faka mafola, he neʼe kole mai e he tēhina ʼo te Komite Gāue ʼo te kokelekasio ke tou fai te faʼahi ʼaia?

ʼE maʼua ki te kau tagata ʼāfea ke nātou tokaga ki te kokelekasio, ʼo kau ai mo nātou ʼaē kua fualoa tanatou mole kei fai faka mafola. ʼE nātou ʼaʼahi te ʼu tēhina mo tuagaʼane ʼaia pea mo vakaʼi peʼe lava tokoni feafeaʼi kia nātou. Mokā ʼe ʼaoga, ʼe lagi tonu anai ke fai hanatou ako Tohi-Tapu. ʼE fakamahino mai e te tohi Organisés pour accomplir notre ministère, ʼi te pasina 103, ko te Komite Gāue ʼo te kokelekasio ʼe ina fakatotonu anai pe ko ai ʼaē ʼe tonu ke tokoni ki ai.

Ko te taupau pelesita ʼe ina vakaʼi anai pe ko ai ʼaē ʼe feala ke ina takitaki te ako, pea mo te ʼu kapite ʼaē ʼe tonu ke vakaʼi, pea mo te tohi ʼaē ʼe feala ke tokoni moʼoni ki te tēhina peʼe ko te tuagaʼane. ʼE lagi lelei anai ke fili ia ia ʼaē neʼe ina fai tana ako ʼi te kamata peʼe ko he tahi ʼe fe­ʼiloʼi lelei ʼaki mo ia. ʼE feala ke kole ki he tuagaʼane kua aga fakapotopoto ke tokoni ki he tuagaʼane kua fualoa tana mole kei fai faka mafola. ʼI te agamāhani, ʼe mole ʼaoga ke ʼolo he toko lua ʼo fai te ako. Ka kole ki he kaugā fai faka mafola ke ina takitaki he ako feiā, pea ʼe feala ke lau te temi, mo te ʼu ʼaʼahi, pea mo te ako ʼi te pepa tānaki.​—Vakaʼi Te Minisitelio ʼo Te Puleʼaga Fakafalani ʼo ʼAukusito 1988, ʼi te pasina 7.

Mai tona ʼuhiga ʼaē ko ia ʼaē ʼe ako ʼe ko he tahi kua papitema, koia ʼi te agamāhani ʼe mole ʼaoga anai ke fualoa te ako. Ko te fakatuʼutuʼu ʼo te tokoni kia ia ʼaē ʼe kua fualoa tana mole kei fai faka mafola: ke toe kau ki te ʼu fono fuli ʼo te kokelekasio pea mo toe liliu ko he kaugā fai faka mafola ʼo te logo lelei ʼe gāue tuʼumaʼu. Ko te tēhina taupau ki te gāue ʼe ina vakavakaʼi anai te tuputupu ʼo te ako ʼaia. Ko te fakatuʼutuʼu ʼo te tokoni ʼofa ʼaia, ke lava fakahoko e te ʼu tēhina mo tuagaʼane ʼaia tonatou ʼu maʼua kia Sehova pea mo nātou “tauaka pea mo fakatafito” lelei ʼi te moʼoni.​—Ef. 3:​17; Kal. 6:⁠5.