ʼAua Naʼa Tou Galoʼi Ia Nātou ʼAē ʼe Mole Kei Lagolago Ki Te ʼu Gāue ʼo Te Kōkelekāsio
1. He koʼē ʼe tonu ke tou faiga ke tou fakaloto mālohiʼi ia nātou ʼaē ʼe mole kei lagolago ki te ʼu gāue ʼo te kōkelekāsio?
1 ʼE kotou ʼiloʼi koa he tahi ʼe mole kei lagolago ki te ʼu gāue ʼo te kōkelekāsio? Lagi mole kei fakatahi mo te kōkelekāsio pea kua hēhē. ʼE lagi feala ke kotou felāveʼi mo he tahi ʼe fēia ʼi takotou fai faka mafola ʼi te ʼu ʼapi. ʼE tonu ke tou manatuʼi ʼe kei kau pē ʼi totatou ʼu tehina fakalaumālie. ʼE tou fia fakahā totatou ʼofa kiā ia pea mo tokoni ke toe liliu mai ki te kōkelekāsio pea ki ‘te tauhi ovi pea mo te tagata leʼoleʼo ʼo totatou ʼu nefesi.’—1 Pet. 2:25.
2. Koteā ʼaē ʼe tou lava fai moʼo foaki ʼo he fakaloto mālohi ki he tehina peʼe ko he tuagaʼane ʼe mole kei lagolago ki te ʼu gāue ʼo te kōkelekāsio?
2 Tou Fakahā Age Totatou ʼOfa: Kapau ʼe tou pāui ʼi te telefoni peʼe tou ʼolo ʼo ʼaʼahi ia ia ʼaē ʼe mole kei lagolago ki te ʼu gāue ʼo te kōkelekāsio, pea ʼe ina ʼiloʼi papau ai ʼe mole tou galoʼi ia ia. Koteā ʼaē ʼe feala ke tou ʼui age kiā ia? ʼE tou lava fakaloto mālohiʼi ia ia mo kapau ʼe tou ʼui ʼe tou manatuʼi ia ia. Kotou fai he ʼu palalau fakaloto mālohi. (Filp. 4:8) ʼE feala ke tou palalau ʼo ʼuhiga mo he puani neʼe tou leleiʼia ʼi te fono. ʼE toe feala foki ke tou fakaafe ia ia ki te fono peʼe ki he fakatahi, pea mo tou kole age peʼe ina loto ke tou tāʼofi hona hekaʼaga peʼe ke tou ʼolo ʼo kumi mai ia ia.
3. Koteā ʼaē neʼe tupu ai te toe lagolago ʼa te tuagaʼane ki te ʼu gāue ʼo te kōkelekāsio?
3 Ko te tuagaʼane neʼe maʼu ʼi te telituale, neʼe mole kei lagolago ki te ʼu gāue ʼo te kōkelekāsio kua taʼu 20 tupu. Logolā neʼe mole ina tali ke toe fai hana ako Tohi-Tapu, kae ko te tuagaʼane ʼaē neʼe ina maʼu ia ia neʼe toe liliu age, ʼo ina tuku ki ai te ʼu nusipepa fakamuli. Hili te fakatahi faka tisitilike, neʼe vaevae mo ia e te tuagaʼane he ʼu manatu maʼuhiga ʼo te fakatahi, pea ki muli age neʼe toe lagolago ki te ʼu gāue ʼo te kōkelekāsio.
4. ʼE tonu ke tou tali feafeaʼi mo kapau ʼe toe haʼu ki te ʼu fono he tehina neʼe mole kei lagolago ki te ʼu gāue ʼo te kōkelekāsio?
4 Kā Toe Liliu Mai He Tahi: Kapau ko he tehina neʼe mole kei lagolago ki te ʼu gāue ʼo te kōkelekāsio, ʼe toe haʼu ki te ʼu fono, ʼe tonu ke tou tali feafeaʼi ia ia? Neʼe feafeaʼi ia Sesu ki tana kau tisipulo, ʼi tanatou liʼaki fakatemi ia ia? ʼAki he lotoʼofa, neʼe ina pāui ia nātou ko tona ʼu “tehina” pea neʼe falala kiā nātou. Neʼe ina toe foaki foki kiā nātou he gāue maʼuhiga. (Mat. 28:10, 18, 19) Mole faʼa fualoa, pea neʼe natou maʼumaʼua moʼo tala ia te logo lelei “tuʼumaʼu pē.”—Gaue 5:42, MN.
5. Kotou fakahā he ʼu ʼaluʼaga ʼe tonu ai ke tou palalau ai ki te kau tagata ʼāfea ʼo ʼuhiga mo he tahi ʼe mole kei lagolago ki te ʼu gāue ʼo te kōkelekāsio.
5 ʼI muʼa ʼo te kole ʼaē ki he tahi ʼe mole kei lagolago ki te ʼu gāue ʼo te kōkelekāsio, ke fai hana ako Tohi-Tapu peʼe fakaafe he tehina ʼe mole kei lagolago ki te ʼu gāue ʼo te kōkelekāsio talu mai fualoa ke tou kaugā fai faka mafola, ʼe tonu ke tou kumi tokoni ki te kau tagata ʼāfea. Kā tou felāveʼi ʼi te telituale mo he tahi ʼe mole kei lagolago ki te ʼu gāue ʼo te kōkelekāsio, pea ʼe tonu ke tou fakahā ki te kau tagata ʼāfea ke feala hanatou foaki te tokoni ʼaē ʼe ʼaoga.
6. Koteā te fiafia ʼaē kā tou maʼu mo kapau ʼe tou tokoni kiā nātou ʼaē ʼe mole kei lagolago ki te ʼu gāue ʼo te kōkelekāsio?
6 Ohagē ko tona fakahā lelei mai ʼi te Tohi-Tapu, ʼe haofaki pē anai ia nātou ʼaē kā lele ʼo aʼu ki te fakaʼosi. (Mat. 24:13) Koia kotou manatuʼi ia nātou ʼaē kua lakahala peʼe kua hēhē. Kapau ʼe tou fakahā ʼaki he faʼa kātaki ia te ʼofa ʼo Sehova ʼo tou tōkakaga moʼoni kiā nātou ʼaia, pea ʼe tou fiafia anai ʼi tatatou sisio ki tanatou toe kau mai mo tātou ʼo fai ia te selevisi taputapu.—Luka 15:4-10.