Te Tali Ki ʼAkotou ʼu Fehuʼi
◼ ʼE tou lava tokoni feafeaʼi ki he tahi neʼe mole kei faka mafola talu mai fualoa, ke toe liliu ko he kaugā fai faka mafola ʼo te logo lelei?
Ko he meʼa fakafiafia mokā fakahā e he tahi neʼe mole kei fai faka mafola, tana toe holi ʼaē ke tauhi kia Sehova. (Luka 15:4-6) Neʼe lagi mole kei fai hana ako takitokotahi, mo kau ki te ʼu fono, pea mo kau ki te fai faka mafola ʼuhi ko te ʼu fakafeagai peʼe ko te ʼu faigataʼaʼia ʼo te maʼuli. Koteā te tokoni lelei ʼe feala ke tou foaki ke tuputupu ʼi te faʼahi fakalaumālie?
ʼE tonu kia tatou fuli ke tou fakahā kia ia totatou ʼofa faka Kilisitiano moʼoni. ʼE foimo vakaʼi anai e te ʼu tagata ʼāfea te ʼu meʼa ʼaē ʼe ʼaoga tāfito kia ia ʼi te faʼahi fakalaumālie. (Skp. 5:14, 15) Kapau neʼe mole heʼeki faʼa fualoa tana mole kei fai faka mafola, pea ʼe feala ke tokoni age he tēhina peʼe ko he tuagaʼane kua māhani ke toe kau ki te gāue fai faka mafola. Kae kapau kua fualoa tana mole kei fakatahi mo te kokelekasio, pea ʼe lagi ʼaoga ki ai he tahi age tokoni. ʼE feala ke tokoni age ke fai hana ako Tohi-Tapu ʼaki he tohi ʼe ʼalutahi mo tona fihifihia, ke toe lagaʼi ake tana tui pea mo tana loto fakafetaʼi. ʼI te faʼahi ʼaia, ʼe fakatuʼutuʼu anai e te tēhina taupau gāue ke fai tana ako e he tēhina peʼe ko he tuagaʼane mālohi. (Hep. 5:12-14; vakaʼi te alatike Te Tali Ki ʼAkotou ʼu Fehuʼi, ʼi Te Minisitelio ʼo Te Puleʼaga ʼo Novepeli 1998.) Kapau ʼe koutou ʼiloʼi he tahi ʼe ʼaoga ki ai te tokoni ʼaia, pea koutou fakahā ki te tēhina taupau gāue ʼo takotou kokelekasio.
ʼI muʼa ʼo takotou fakaafe he tahi kua fualoa tana mole kei faka mafola ke kau ki te minisitelio, ʼe lelei anai ke ʼuluaki palalau muʼa mo he ʼu tagata ʼāfea e lua ke vakaʼi peʼe feala ke liliu ko he kaugā fagona ʼo te Puleʼaga. ʼE nā fai anai ohage ko tanā fai palalau mo te hahaʼi foʼou ʼaē ʼe fia liliu ko he ʼu kaugā fai faka mafola ʼo te logo lelei. (Vakaʼi Te Tule Leʼo Fakafalani ʼo te ʼaho 15 ʼo Novepeli 1988, pasina 17.) Ko ia ʼaē neʼe mole kei fai faka mafola, ʼe tonu ke ina fia vaevae moʼoni te logo lelei ki te hahaʼi. ʼE tonu pe foki ke ina fai te ʼu meʼa ʼaē ʼe fakamaʼua tāfito kia ia, ʼaē ʼe fakahā lelei ʼi te pasina 98-99 ʼo te tohi Notre ministère pea mo kau tuʼumaʼu ki te ʼu fono.
Kapau ʼe ʼi ai hana polokalama fakalaumālie lelei, pea ʼe tokoni lahi anai kia ia ʼaē ʼe toe liliu mai, ke mālohi pea mo ina taupau tana ʼu felogoi lelei mo Sehova pea mo haga haʼele ʼi te ala ʼaē ʼe ina taki ki te maʼuli heʼegata. (Mat. 7:14; Hep. 10:23-25) Kapau ʼe “faiga mālohi” pea mo ina fakatuputupu he ʼu kalitate faka Kilisitiano ʼe tologa, pea ʼe mole toe liliu anai ʼo “fakaʼaoʼaoganoa pea mo heʼe fua” ʼi tona ʼuhiga Kilisitiano.—2 Pet. 1:5-8, MN.